ଗୌହାଟୀ: ଆସାମରେ କମୁନି ବନ୍ୟା ଦୁର୍ଦ୍ଦଶା। ବନ୍ୟା ଯୋଗୁଁ ମୃତ୍ୟୁ ସଂଖ୍ୟା ଦିନକୁ ଦିନ ବୃଦ୍ଧି ହେବାରେ ଲାଗିଛି । ଗତ ୨୪ ଘଣ୍ଟା ମଧ୍ୟରେ ୪ଜଣଙ୍କର ମୃତ୍ୟୁ ହୋଇଛି । ଏହାକୁ ମିଶାଇ ମୋଟ ମୃତ୍ୟୁ ସଂଖ୍ୟା ୧୨୧କୁ ବୃଦ୍ଧି ହୋଇଛି । ସମସ୍ତ ମୃତକ ବରପେଟା, କାଚର, ଡାରଙ୍ଗ ଓ ଗୋଲଘଟରୁ ହୋଇଥିବା ଜଣାପଡିଛି । ବର୍ଷା କମିଥିଲେ ସୁଦ୍ଧା ଏବେ ବି ୨୭ଟି ଜିଲ୍ଲାର ୨,୮୯୪ ଟି ଗାଁରେ ୨୫ଲକ୍ଷ ୧୦ ହଜାର ଲୋକ ଜଳବନ୍ଦୀ ହୋଇ ରହିଛନ୍ତି ।
ରାଜ୍ୟ ପରିଚାଳନା ବିପର୍ଯ୍ୟୟ ପ୍ରାଧିକରଣ (ASDMA) ତରଫରୁ ସୂଚନା ପ୍ରଦାନ କରାଯାଇଛି । ବାରପେଟା ଜିଲ୍ଲାରେ ପ୍ରାୟ ୭.୫୦ ଲକ୍ଷ ଲୋକ ପ୍ରଭାବିତ ହୋଇଥିବାବେଳେ, ସବୁଠାରୁ ଅଧିକ ପ୍ରଭାବିତ ଜିଲ୍ଲା ଭାବରେ ଅବ୍ୟାହତ ରହିଆସିଛି । ବନ୍ୟା ପ୍ରଭାବିତଙ୍କୁ ୬୩୭ ରିଲିଫ୍ କ୍ୟାମ୍ପରେ ରହିଥିବା ବେଳେ ୨.୩୩ ଲକ୍ଷରୁ ଅଧିକ ଲୋକ ଏବେ ବି ଅସୁବିଧାରେ ରହିଛନ୍ତି । ୮୦,୩୪୬ ହେକ୍ଟରରୁ ଅଧିକ କୃଷି ଜମି ବନ୍ୟା ଜଳ ଦ୍ୱାରା ପ୍ରଭାବିତ ହୋଇଛି ।
ଦକ୍ଷିଣ ଆସାମର କାଚର ଜିଲ୍ଲାର ସିଲଚର ଟାଉନରେ ଅନେକ ଅଞ୍ଚଳ ଜଳମଗ୍ନ ହୋଇ ରହିଛି । ସହରଠାରୁ ପ୍ରାୟ ଚାରି କିଲୋମିଟର ଦୂରରେ ଥିବା ବେଥୁକାଣ୍ଡିଠାରେ ଦୁଇ ଲକ୍ଷରୁ ଅଧିକ ଲୋକ ବନ୍ୟା ଜଳ ଦ୍ୱାରା ଗୁରୁତର ଭାବରେ ପ୍ରଭାବିତ ହୋଇଛନ୍ତି ।
