ଗୌହାଟୀ: ଆସାମରେ ଭୟଙ୍କର ବନ୍ୟାସ୍ଥିତି । ଚାରିଆଡ଼େ ଦେଖିବାକୁ ମିଳିଛି ଜଳ ପ୍ରଳୟର ଚିତ୍ର । ବନ୍ୟା ଯୋଗୁଁ ରାଜ୍ୟ ଅନେକ ଜିଲ୍ଲା ଜଳମଗ୍ନ ହୋଇଥିବା ବେଳେ ଲକ୍ଷାଧିକ ଲୋକ ପ୍ରଭାବିତ ହୋଇଛନ୍ତି । ରାଜ୍ୟର ୧୭ଟି ଜିଲ୍ଲାରେ ବନ୍ୟା ସ୍ଥିତି ଦେଖିବାକୁ ମିଳିଛି । ଏହାର ପ୍ରଭାବରେ ଲୋକେ ଜଳ ଘେରରେ ରହିଛନ୍ତି । ବନ୍ୟାରେ ବର୍ତ୍ତମାନ ସୁଦ୍ଧା ୭ ଜଣଙ୍କ ମୃତ୍ୟୁ ଘଟିଥିବା ସୂଚନା ମିଳିଛି । ଲୋକଙ୍କୁ ପାଣି ଘେରରୁ ଉଦ୍ଧାର କରାଯାଇ ରିଲିଫ କ୍ୟାମ୍ପ୍ ଓ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି ।
ଆସାମ ରାଜ୍ୟ ବିପର୍ଯ୍ୟୟ ପରିଚାଳନା ପ୍ରାଧିକରଣ ସୂଚନା ଅନୁଯାୟୀ, ରାଜ୍ୟରେ ମୌସୁମୀ ଜନିତ ଲଗାଣ ବର୍ଷା ଏବଂ ବ୍ରହ୍ମପୁତ୍ର ନଦୀର ଜଳସ୍ତର ବୃଦ୍ଧି ପାଇବା ଯୋଗୁଁ ବନ୍ୟା ସ୍ଥିତି ସଂଗୀନ ହେବାରେ ଲାଗିଛି । ବକ୍ସା, ବିଶ୍ବନାଥ, ବୋଙ୍ଗାଇଗାଓଁ, ଚିରଙ୍ଗ, ଧମାଜୀ, ଧୁବ୍ରି, ଦିବ୍ରୁଗଡ଼, ଜୋରାତ, ଲକ୍ଷ୍ମୀପୁର, ମଜୁଳି, ମୋରିଗାଓଁ, ନାଗାଓଁ , ଶିବସାଗର, ସୋନିତପୁର, ତାମୁଲପୁର, ତିନ୍ସୁକିଆ, ଜିଲ୍ଲାରେ ବନ୍ୟା ହୋଇଛି । ଏହି ସବୁ ଜିଲ୍ଲାଗୁଡ଼ିକ ଜଳବନ୍ଦୀ ଅବସ୍ଥାରେ ରହିଥିବା ବେଳେ ମୋଟ ୧ ଲକ୍ଷ ୭ ହଜାର ୮୨୯ ଜଣ ଲୋକ ପ୍ରଭାବିତ ହୋଇଛନ୍ତି । ବନ୍ୟା ଓ ଭୂସ୍ଖଳରେ ପ୍ରାୟ ୭ ଜଣଙ୍କ ମୃତ୍ୟୁ ଘଟିଛି । ସେହିପରି ବନ୍ୟାରେ ୪୧୬୮.୪୦ ହେକ୍ଚରେ ଚାଷଜମି ନଷ୍ଟ ହୋଇଥିବା ବେଳେ ୭୨,୩୧୫ ପଶୁପକ୍ଷୀ ମଧ୍ୟ ପ୍ରଭାବିତ ହୋଇଛନ୍ତି ।
