ଥିରୁଅନନ୍ତପୁରମ: ଦେଶରେ କୋରୋନା ପାଳି ପାଳି କରି ଆତଙ୍କ ସୃଷ୍ଟି କରିଛି । ପ୍ରଥମ ଦ୍ବିତୀୟ ପରେ ଏବେ ପୁଣି ତୃତୀୟ ଲହର ମନରେ ଭୟ ସୃଷ୍ଟି କରିଛି । ଏହାରି ଭିତରେ ଜିକା ଭାଇରସ ତାର କାୟା ବିସ୍ତାର କଲାଣି । କେରଳରେ ଆଉ 5 ନୂଆ ଜିକା ଭୂତାଣୁରେ ଆକ୍ରାନ୍ତ ହୋଇଥିବା ନେଇ ସୂଚନା ଦେଇଛନ୍ତି ସ୍ବାସ୍ଥ୍ୟମନ୍ତ୍ରୀ ବୀଣା ଜର୍ଜ ।
ଆଜିର ନୂଆ 5 ଆକ୍ରାନ୍ତଙ୍କୁ ମିଶାଇ କେରଳରେ ଜିକା ଭାଇରସ ସଂଖ୍ୟା 28କୁ ବୃଦ୍ଧି ହୋଇଛି । ପାଞ୍ଚଜଣଙ୍କ ମଧ୍ୟରୁ ଦୁଇଜଣ ଅନ୍ୟାୟରାରୁ ଚିହ୍ନଟ ହୋଇଥିବାବେଳେ କୁନୁକୁଜି, ପାଟ୍ଟୁମ ଓ ଇଷ୍ଟ ଫର୍ଟରୁ ଜଣେ ଲେଖାଏଁ ଚିହ୍ନଟ ହୋଇଛନ୍ତି । ମଶା ଜନିତ ରୋଗର ପ୍ରସାରକୁ ହ୍ରାସ କରିବା ପାଇଁ ପ୍ରୟାସର ଥିରୁବନନ୍ତପୁରମ୍ ମ୍ୟୁନିସିପାଲିଟି କର୍ପୋରେସନ୍ ଏବଂ ଅନ୍ୟାନ୍ୟ ଜିଲ୍ଲା ପ୍ରଶାସନ ପ୍ରତିଷେଧକ କାର୍ଯ୍ୟକଳାପକୁ ଜୋରଦାର କରିଛନ୍ତି ।
ଆଗାମୀ 7ଦିନ ଧରି ବିଶୋଧନ ସିଞ୍ଚନ କରାଯିବ । ଥିରୁଅନନ୍ତପୁରମର ଅନାୟାରା ଅଞ୍ଚଳର ତିନି କିଲୋମିଟର ଦୂରତାରେ ଏକ ଜିକା ଭାଇରସ୍ କ୍ଲଷ୍ଟର ଚିହ୍ନଟ ହୋଇଥିବା ସ୍ବାସ୍ଥ୍ୟମନ୍ତ୍ରୀ ସୂଚନା ଦେଇଛନ୍ତି । ଜୁଲାଇ 9ରେ କେରଳରେ ଏହି ଭୂତାଣୁଙ୍କର ପ୍ରଥମ ମାମଲା ନଜର ଆସିଥିଲା । ଏହା ପରେ ସମସ୍ତ ଜିଲ୍ଲା ହାଇ ଆଲର୍ଟ ଜାରି ହୋଇଥିଲା ।
ବ୍ୟୁରୋ ରିପୋର୍ଟ,ଇଟିଭି ଭାରତ
