ଥିରୁଅନନ୍ତପୁରମ: ଚାଞ୍ଚଲ୍ୟ ! ପୁଅକୁ ପେଟ୍ରୋଲ ପକାଇ ଜାଳିଲା ବାପା । କେବଳ ପୁଅ ନୁହେଁ ବରଂ ପୁରା ପରିବାରକୁ ଜଣେ ବୃଦ୍ଧ ବାପା ନିଆଁ ଲଗାଇ ହତ୍ୟା କରିଛନ୍ତି । ଆଜି(ଶନିବାର) କେରଳ ଥୋଡୁପୁଜହା(Thodupuzha) ଅଞ୍ଚଳରେ ଏହି ଲୋମହର୍ଷଣକାରୀ ହତ୍ୟାକାଣ୍ଡ ଘଟିଛି । ମୃତକ ହେଉଛନ୍ତି ମହମ୍ମଦ ଫୈଜଲ, ତାଙ୍କ ପତ୍ନୀ ଶୀବା ଏବଂ ଦୁଇ ସନ୍ତାନ । ଜମିବାଡି ବିବାଦକୁ କେନ୍ଦ୍ର କରି ଏହି ହତ୍ୟାକାଣ୍ଡ ଘଟିଥିବା କୁହାଯାଉଛି ଏବଂ ୭୯ ବର୍ଷୀୟ ହତ୍ୟାକାରୀ ପିତା ହମିଦକୁ ପୋଲିସ ଗିରଫ କରିଛି ।
ସୂଚନା ଅନୁଯାୟୀ, ଫୈଜଲ ଏବଂ ପୁରା ପରିବାର ଶୋଇଥିବା ସମୟରେ ହମିଦ୍ ସେମାନଙ୍କ ଉପରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲେ । ଏପରିକି ଯେପରି ନିଆଁ ନ ଲିଭିବ ସେଥିପାଇଁ ପୂର୍ବରୁ ସେ ଘର ପାଣିଟାଙ୍କିରୁ ସବୁ ପାଣି ବାହାର କରିଦେଇଥିଲେ । ହତ୍ୟା କରିବା ପରେ ହମିଦ ସ୍ଥାନୀୟ ଏକ ସମ୍ପର୍କୀୟଙ୍କ ଘରକୁ ଚାଲି ଯାଇଥିଲେ । ସେଠାରୁ ପୋଲିସ ତାଙ୍କୁ ଗିରଫ କରିଛି । ପାରିବାରିକ କହଳକୁ କେନ୍ଦ୍ର କରି ୭୯ ବର୍ଷୀୟ ପିତା ଜଣକ ଏପରି ସର୍ବାନାଶ ଘଟାଇଛନ୍ତି ।
ପୋଲିସ କହିବାନୁଯାୟୀ, ଗତ କିଛି ବର୍ଷ ହେଲା ଫୈଜଲ ଏବଂ ତାଙ୍କ ପିତା ହମିଦ ଅଲଗା ରହିଆସୁଥିଲେ । କିଛି ବର୍ଷ ତଳେ ବାପା ହମିଦ୍ ପୁଅ ଫୈଜଲକୁ ୫୦ ପ୍ରତିଶତ ଜମି ଦେଇ ନିଜେ ଅନ୍ୟତ୍ର ରହୁଥିଲେ । ହେଲେ ୨୦୧୮ରେ ସେ ପୁଣି ପୁଅ ପାଖକୁ ଫେରିଆସି ତାଙ୍କ ଠାରୁ ସେହି ଜମି ଫେରାଇ ଦେବାକୁ ଦାବି କରିଥିଲେ । କିନ୍ତୁ ଏଥିରେ ଫୈଜଲ ରାଜି ହୋଇନଥିଲେ । ଏହି ଘଟଣାକୁ ନେଇ ଦୁହିଁଙ୍କ ମଧ୍ୟରେ ବିବାଦ ଚାଲିଥିଲା ଏବଂ ଏଥିପାଇଁ ହିଁ ବୃଦ୍ଧ ପିତା ପୁରା ପରିବାରକୁ ହତ୍ୟା କରିଥିବା କୁହାଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
