ପାଟନା: ଗତ କିଛି ଦିନ ହେବ ସୋସିଆଲ ମିଡ଼ିଆରେ ଏକ ଭିଡ଼ିଓ ଭାଇରାଲ ହେବାରେ ଲାଗିଛି । ଯେଉଁ ଭିଡ଼ିଓରେ ଦର୍ଶାଯାଇଛି ଯେ, ଜଣେ ଯୁବତୀ ନିଜ ଇଚ୍ଛାନୁସାରେ ବିବାହ କରିଛି ଏବଂ ତାକୁ ହଇରାଣ ନ କରିବା ପାଇଁ ପିତାଙ୍କୁ ଅନୁରୋଧ କରିଛି । ଅନ୍ୟପଟେ ଯୁବତୀ ଅପହରଣ ନେଇ ଥାନାରେ ଏତଲା ଦେଇଛନ୍ତି ପିତା ।
ବିହାରର ହାଜିପୁର ଅଞ୍ଚଳର ଏକ ଭିଡ଼ିଓ ଭାଇରାଲ ହେବାରେ ଲାଗିଛି । ଯେଉଁଥିରେ ଜଣେ ଯୁବତୀ ନିଜ ଅପହରଣ ଘଟଣାକୁ ମିଥ୍ୟା ବୋଲି ଦର୍ଶାଇଛି ଏବଂ ପୋଲିସର ସହାୟତା ଲୋଡୁଥିବା ଭିଡ଼ିଓରେ ଦେଖିବାକୁ ମିଳିଛି । ଭିଡ଼ିଓଟିର ଯାଞ୍ଚ ପରେ ଉକ୍ତ ଯୁବତୀ ଜଣକ ଗୋରୋଲ ଥାନା ଅନ୍ତର୍ଗତ ମାଲିକପୁରା ଅଞ୍ଚଳର ହୋଇଥିବା ଜଣାପଡ଼ିଛି । କିଛିଦିନ ତଳେ ଯୁବତୀ ଜଣଙ୍କର ଅପହରଣ ହୋଇଥିବା ନେଇ ତାଙ୍କ ପିତା ଗୋରୋଲ ଥାନାରେ ଏତଲା ଦେଇଥିଲେ ।
ଏତଲା ଦାୟର ହେବା ପରେ ସେହି ଯୁବତୀ ଜଣକ ନିଜ ସୋସିଆଲ ମିଡ଼ିଆ ଆକାଉଣ୍ଟରେ 'Got Married' ଲେଖି ପୋଷ୍ଟ କରିଥିଲେ । ଏହା ପରେ ଏକ ଫଟୋ ଓ ଭିଡ଼ିଓ ମଧ୍ୟ ଜାରି କଲେ । ଏହି ଭିଡ଼ିଓରେ ତାଙ୍କ ସହ ଜଣେ ପୁରୁଷ ମଧ୍ୟ ରହିଥିଲେ। ଏବଂ ନିଜ ଇଚ୍ଛା ଅନୁସାରେ ସେ ଉକ୍ତ ବ୍ୟକ୍ତି ଜଣଙ୍କୁ ବିବାହ କରିଥିବା କହିଛନ୍ତି । ସେ ବର୍ତ୍ତମାନ ତାଙ୍କ ସ୍ବାମୀଙ୍କ ସହ ଖୁସିରେ ଅଛନ୍ତି।
ପିତା ତାଙ୍କୁ ହଇରାଣ କରୁଥିବା ଯୁବତୀ ଜଣକ ଅଭିଯୋଗ କରିଛନ୍ତି । ତେଣୁ ସେମାନଙ୍କୁ ହଇରାଣ ନ କରିବା ପାଇଁ ତାଙ୍କୁ ପରିବାରକୁ ଅନୁରୋଧ କରିଛନ୍ତି । ଏଥିସହ ଭିଡ଼ିଓ ମାଧ୍ୟମରେ ପୋଲିସର ସହାୟତା ମଧ୍ୟ ଲୋଡ଼ିଛନ୍ତି । ତେବେ ଏହି ଭିଡ଼ିଓ ଭାଇରାଲ ହେବା ପରେ ଉକ୍ତ ଯୁବତୀ ଜଣକ ଫେରାର ଅଛନ୍ତି।
ବ୍ୟୁରୋ ରିପୋର୍ଟ, ଇଟିଭି ଭାରତ
