ନୂଆଦିଲ୍ଲୀ: ଗତକାଲି (ଶୁକ୍ରବାର) ୩ କୃଷି ଆଇନ ପ୍ରତ୍ୟାହାର (3 Farm laws repeal) ଦାବିରେ ଆରମ୍ଭ ହୋଇଥିବା କୃଷକ ଆନ୍ଦୋଳନକୁ ଏକ ବର୍ଷ ପୂର୍ତ୍ତି ହୋଇଛି । ଏହି ଅବସରରେ ନଭେମ୍ବର 29ରେ ସଂସଦ ଅଭିମୁଖେ ପ୍ରସ୍ତାବିତ ଟ୍ରାକ୍ଟର ରାଲିକୁ ସ୍ଥଗିତ କଲା ସଂଯୁକ୍ତ କିଷାନ ମୋର୍ଚ୍ଚା (Samyukta Kisan Morcha) । ଏନେଇ ଆଜି (ଶନିବାର) ମୋର୍ଚ୍ଚା ପକ୍ଷରୁ ଆୟୋଜିତ ବୈଠକରେ ନିଷ୍ପତ୍ତି ହୋଇଥିବା କୃଷକ ନେତା ଦର୍ଶନପାଲ ସିଂ (farmer leader Darshan Pal Singh) ସ୍ପଷ୍ଟ କରିଛନ୍ତି ।
ଗଣମାଧ୍ୟମକୁ ସୂଚନା ଦେଇ ଦର୍ଶନପାଲ ସିଂ କହିଛନ୍ତି, ନଭେମ୍ବର 29ରୁ ସଂସଦର ଶୀତକାଳୀନ ଅଧିବେଶନ ଆରମ୍ଭ ହେବାକୁ ଯାଉଛି । ଏହି ସମୟରେ ସର୍ବାଧିକ 500 କୃଷକ ଦୈନିକ ସଂସଦକୁ ଏକ ଶାନ୍ତିପୂର୍ଣ୍ଣ ଟ୍ରାକ୍ଟର ପଦଯାତ୍ରାରେ ଅଂଶଗ୍ରହଣ କରିବେ ବୋଲି ଚଳିତମାସ ଆରମ୍ଭରେ ସଂଯୁକ୍ତ ମୋର୍ଚ୍ଚା ଘୋଷଣା କରିଥିଲା । MSP ବୃଦ୍ଧିର ଗ୍ୟାରେଣ୍ଟି ଘୋଷଣା କରିବାକୁ ସରକାରଙ୍କ ଉପରେ ଚାପ ପକାଇବାକୁ ଏହି ରାଲି କରାଯିବା ନେଇ ମୋର୍ଚ୍ଚା ପକ୍ଷରୁ ନିଷ୍ପତ୍ତି ହୋଇଥିଲା । ତେବେ ଆଜିର ବୈଠକରେ ଏହି ନିଷ୍ପତ୍ତିରୁ ମୋର୍ଚ୍ଚା ଓହରିଛି ବୋଲି ସେ ସ୍ପଷ୍ଟ କରିଛନ୍ତି ।
ଏହାପୂର୍ବରୁ କେନ୍ଦ୍ର କୃଷିମନ୍ତ୍ରୀ ନରେନ୍ଦ୍ର ସିଂ ତୋମାର, ଦିଲ୍ଲୀ ସୀମାରେ ବିକ୍ଷୋଭ ପ୍ରଦର୍ଶନ କରୁଥିବା ଚାଷୀଙ୍କୁ ଆନ୍ଦୋଳନ ପ୍ରତ୍ୟାହାର କରିବା ସହ ଘରକୁ ଫେରିଯିବାକୁ ନିବେଦନ କରିଥିଲେ । ସେହିପରି ଚଳିତ ଅଧିବେଶନରେ ଏହି ବିବାଦୀୟ କୃଷି ଆଇନକୁ ରଦ୍ଦ କରାଯିବା ( three farm laws repealed) ନେଇ ବିଲ ଆଗତ କରାଯିବ ବୋଲି ମଧ୍ୟ କୃଷିମନ୍ତ୍ରୀ ସ୍ପଷ୍ଟ କରିଥିଲେ ।
ତୋମାର ଏହା ମଧ୍ୟ କହିଛନ୍ତି ଯେ ଏକ କମିଟି ଗଠନ ସହିତ ଚାଷୀଙ୍କ MSP ଆଭିମୁଖ୍ୟ ଉପରେ ସରକାର ତର୍ଜମା କରିବେ । ସେହିପରି ଗତ ସପ୍ତାହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଏହି ଆଇନ ବିଧିବଦ୍ଧ ଭାବେ ରଦ୍ଦ ହେବା ନେଇ ଚଳିତ ଅଧିବେଶନରେ ଗୃହରେ ବିଲ ଆଗତ ହେବା ନେଇ ସଙ୍କେତ ଦେଇଥିଲେ । ଚଳିତ ଅଧିବେଶନ (winter session of Parliament)ରେ ଗୃହରେ ଆଗତ ହେବାକୁ ଥିବା ୨୬ଟିି ପ୍ରମୁଖ ବିଲ ମଧ୍ୟରେ କୃଷି ଆଇନ ପ୍ରତ୍ୟାହାର ବିଲକୁ ମଧ୍ୟ ସୂଚୀତ କରାଯାଇଥିବା ଜଣାପଡିଛି ।
ଅନ୍ୟପଟେ ଆନ୍ଦୋଳନର ପ୍ରଥମ ବାର୍ଷିକୀ ଅବସରରେ ଗତକାଲି (ଶୁକ୍ରବାର ) ରାଜଧାନୀ ଦିଲ୍ଲୀ ଉପକଣ୍ଠରେ ବିଶାଳ ‘କିଷାନ ମହାପଞ୍ଚାୟତ’ ଆୟୋଜନ କରିଥିଲା ସଂଯୁକ୍ତ କିଷାନ ମୋର୍ଚ୍ଚା । ୨୯ ତାରିଖରେ ସଂସଦ ଅଭିମୁଖେ ପ୍ରସ୍ତାବିତ ଟ୍ରାକ୍ଟର ରାଲି ପାଇଁ ହଜାର ହଜାର ଟ୍ରାକ୍ଟର ମଧ୍ୟ ଏକାଠି ହେବାରେ ଲାଗିଥିଲା । ଯାହା ଫଳରେ ସୁରକ୍ଷା ଦୃଷ୍ଟିରୁ ପୋଲିସ ମଧ୍ୟ ବ୍ୟାପକ ବନ୍ଦୋବସ୍ତ କରିଥିବା ଦେଖିବାକୁ ମିଳିଥିଲା । ତେବେ ଆଜିର ବୈଠକ ପରେ ଏହି ପ୍ରସ୍ତାବିତ ରାଲିକୁ ସ୍ଥଗିତ ରଖିବାକୁ କିଷାନ ମୋର୍ଚ୍ଚା ନିଷ୍ପତ୍ତି ନେଇଛି ।
@ANI
