ନୂଆଦିଲ୍ଲୀ: ଘୋଷଣା ହୋଇଛି ଉତ୍ତରପ୍ରଦେଶ ରାଜ୍ୟସଭା ନିର୍ବାଚନ ଫଳାଫଳ । ସମସ୍ତ 10 ପ୍ରାର୍ଥୀ ନିର୍ଦ୍ବନ୍ଦରେ ବିଜୟ ହାସଲ କରିଛନ୍ତି । ଭାରତୀୟ ଜନତା ପାର୍ଟିର 8 ପ୍ରାର୍ଥୀ ବିଜୟଲାଭ କରିଥିବା ବେଳେ ସମାଜବାଦୀ ପାର୍ଟି ଓ ବହୁଜନ ସମାଜ ପାର୍ଟିରୁ ଜଣେ ଜଣେ ଲେଖାଏଁ ପ୍ରାର୍ଥୀ ରାଜ୍ୟସଭାକୁ ନିର୍ବାଚତ ହୋଇଛନ୍ତି ।
ବିଜେପି ପକ୍ଷରୁ କେନ୍ଦ୍ରମନ୍ତ୍ରୀ ହରଦୀପ ସିଂହ ପୁରୀ, ବିଜେପି ରାଷ୍ଟ୍ରୀୟ ମହାମନ୍ତ୍ରୀ ଅରୁଣ ସିଂହ, ପୂର୍ବତନ ଡିଜିପି ବ୍ରଜ ଲାଲ, ନୀରଜ ଶେଖର, ହରିଦ୍ବାର ଦୁବେ, ଗୀତା ଶାକ୍ୟ, ବିଏଲ ବର୍ମା ଓ ସୀମା ଦିୱେଦୀ ରାଜ୍ୟସଭା ନିର୍ବାଚନରେ ବିଜୟ ହାସଲ କରିଛନ୍ତି । ସେହିପରି ସମାଜବାଦୀ ପାର୍ଟିର ରାଷ୍ଟ୍ରୀୟ ମହାସଚିବ ରାମଗୋପାଳ ଯାଦବ ଓ ବିଏସପି ପ୍ରାର୍ଥୀ ରାମଜୀ ଗୌତମ ନିର୍ଦ୍ବନ୍ଦରେ ରାଜ୍ୟସଭାକୁ ନିର୍ବାଚିତ ହୋଇଛନ୍ତି ।
ନିଜର ସଂଖ୍ୟାବଳକୁ ଦୃଷ୍ଟିରେ ରଖି ନିଜର ବରିଷ୍ଠ ନେତା ପ୍ରଫେସର ରାମଗୋପାଳ ଯାଦବଙ୍କୁ ପ୍ରାର୍ଥୀ କରିଥିଲା ସମାଜବାଦୀ ପାର୍ଟି । ସେହିପରି ଏସପି ଜଣେ ନିର୍ଦଳୀୟ ପ୍ରାର୍ଥୀଙ୍କୁ ସମର୍ଥନ ମଧ୍ୟ ଦେଇଥିଲା । ହେଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସଂସଦୀୟ କ୍ଷେତ୍ର ବାରାଣାସୀ ଅଧିବାସୀ ବଜାଜଙ୍କ ପ୍ରାର୍ଥୀପତ୍ର ନାକଚ ହୋଇଯାଇଥିଲା ।
କେନ୍ଦ୍ର ମନ୍ତ୍ରୀ ହରଦୀପ ସିଂହ ପୁରୀ, ଅରୁଣ ସିଂ ଏବଂ ନୀରଜ ଶେଖରଙ୍କ କାର୍ଯ୍ୟକାଳ 25 ନଭେମ୍ବରରେ ଶେଷ ହୋଇଥିଲା। ବର୍ତ୍ତମାନ ଏହି ତିନିଜଣଙ୍କୁ ବିନା ନିର୍ବାଚନରେ ମନୋନୀତ କରାଯାଇଛି। ଅନ୍ୟପକ୍ଷେ ସମାଜବାଦୀ ପାର୍ଟିର ଚାରିଜଣ ସାଂସଦ ଚନ୍ଦ୍ରପାଲ ସିଂ ଯାଦବ, ରାମ ଗୋପାଳ ଯାଦବ, ରାମ ପ୍ରକାଶ ଭର୍ମା ଏବଂ ଜାଭେଦ ଅଲି ଖାନ ଓ ବିଏସପିର ଦୁଇଜଣ ସାଂସଦ ରାଜାରାମ ଏବଂ ବୀର ସିଂଙ୍କ କାର୍ଯ୍ୟକାଳ ମଧ୍ୟ ଶେଷ ହେଉଛି। ଏଥି ସହିତ କଂଗ୍ରେସର ପିଏଲ ପୁନିଆଙ୍କ କାର୍ଯ୍ୟକାଳ ଶେଶ ହେବ। ହେଲେ ଏସପି ଏବଂ ବିଏସପିରୁ କେବଳ ଜଣେ ଲେଖାଏଁ ସାଂସଦ ରାଜ୍ୟସଭାକୁ ନିର୍ବାଚିତ ହୋଇଥିବା ବେଳେ କଂଗ୍ରେସକୁ ହାତ ଖାଲି କରିବାକୁ ପଡିଛି ।
10 ଜଣ ରାଜ୍ୟସଭା ସାଂସଦଙ୍କ କାର୍ଯ୍ୟକାଳ 25 ନଭେମ୍ବରରେ ଶେଷ ହେଉଛି। ଏଥିରେ ଭାରତୀୟ ଜନତା ପାର୍ଟିର 3 ଜଣ, ସମାଜବାଦୀ ପାର୍ଟିର 4 ଜଣ, ବିଏସପିର 2 ଜଣ ଏବଂ କଂଗ୍ରେସର ଜଣେ ସାଂସଦ ସାମିଲ ଅଛନ୍ତି। ଯଦିଓ ରାଜ୍ୟସଭା ନିର୍ବାଚନରେ ବିଜେପି ୟୁପିରେ 9 ଜଣ ପ୍ରାର୍ଥୀଙ୍କୁ ଜିତାଇବା ସ୍ଥିତିରେ ଥିଲା, କିନ୍ତୁ ଏହା କେବଳ ଗୋଟିଏ ଆସନ ଖାଲି କରି 8 ଜଣ ପ୍ରାର୍ଥୀ ଦେଇଥିଲା । ବିଜେପିର ଏହି ରଣନୀତି ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା। କଂଗ୍ରେସ ଏବଂ ସମାଜବାଦୀ ପାର୍ଟି ବିଏସପିକୁ ବିଜେପି ସହ ମେଣ୍ଟ କରିଥିବା ଅଭିଯୋଗ କରିଛନ୍ତି ।
ଉତ୍ତରପ୍ରଦେଶ ଏବଂ ଉତ୍ତରାଖଣ୍ଡର ରାଜ୍ୟସଭାରେ 11ଟି ଆସନରେ ଆସିଥିବା ଫଳାଫଳ ସହିତ ବର୍ତ୍ତମାନ ପର୍ଯ୍ୟନ୍ତ ବିଜେପି ଶିଖରରେ ରହିଛି। ଏହା ବ୍ୟତୀତ କଂଗ୍ରେସ ଆସନ ଇତିହାସରେ ସର୍ବନିମ୍ନ ହୋଇଯାଇଛି । ବର୍ତ୍ତମାନ ରାଜ୍ୟସଭାରେ ବିଜେପିର 92 ସାଂସଦ ଅଛନ୍ତି। କଂଗ୍ରେସ କେବଳ 38 ଆସନରେ ସୀମିତ ହୋଇଯାଇଛି । ଯଦି ଏନଡିଏ ବିଷୟରେ କହିବା, ତାହେଲେ ଏହାର ବର୍ତ୍ତମାନ 112 ସାଂସଦ ଅଛନ୍ତି, କିନ୍ତୁ ବର୍ତ୍ତମାନ ସଂଖ୍ୟାଗରିଷ୍ଠତା ଠାରୁ ଏହା ଦଶଟି ଆସନ ଦୂରରେ ଅଛି। ରାଜ୍ୟସଭାରେ ମୋଟ ଆସନ 245 । ସେଥିମଧ୍ୟରୁ 12ଟି ଆସନରେ ରାଷ୍ଟ୍ରପତି ସଦସ୍ୟଙ୍କୁ ମନୋନୀତ କରିଥାନ୍ତି। ଏଥି ସହିତ ଅନ୍ୟ ଆସନରେ ନିର୍ବାଚନ ଅନୁଷ୍ଠିତ ହୁଏ।
