ହାଇଦ୍ରାବାଦ: ରାଜସ୍ଥାନରେ ଜଣେ ମଦ୍ୟପ ଡାକ୍ତରଙ୍କ ଉନ୍ମତ କାଣ୍ଡ ସାମ୍ନାକୁ ଆସିଛି । ନିଶାସକ୍ତ ଅବସ୍ଥାରେ ହସ୍ପିଟାଲ ପରିସରରେ 3ଜଣଙ୍କ ଉପରେ ମଡାଇଦେଲେ କାର । ଫଳରେ ଘଟଣାସ୍ଥଳରେ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ଦୁଇଜଣଙ୍କୁ ସଙ୍ଗୀନ ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଛି(Doctor crushed 3 people with car in Nagaur)। ଗୁରୁତରଙ୍କ ମଧ୍ୟରେ ଜଣେ ଗର୍ଭବତୀ ମଧ୍ୟ ରହିଛନ୍ତି । ରାଜସ୍ଥାନ ନାଗୌରରେ ଏପରି କାଣ୍ଡ ଦେଖିବାକୁ ମିଳିଛି ।
ଏପରି କାଣ୍ଡ ଡାକ୍ତର ଓ୍ବାଇ ଏସ ନେଗି ନାମକ ଜଣେ ସରକାରୀ ଡାକ୍ତର ଭିଆଇଛନ୍ତି । ଡାକ୍ତର ଜଣଙ୍କ ପୂର୍ବାହ୍ନରେ ଡ୍ୟୁଟିରୁ ଆସୁଥିବା ବେଳେ ଡାକ୍ତରଖାନା ପରିସରରେ ତିନିଜଣଙ୍କ ଉପରେ କାର ମଡାଇ ଦେଇଥିଲେ । ଏହାସହ ଏକ ଆମ୍ବୁଲାନ୍ସଙ୍କୁ ମଧ୍ୟ ଡାକ୍ତରଙ୍କ କାର ଧକ୍କା ଦେଇଥିଲା । ଘଟଣାସ୍ଥଳରେ ଜଣଙ୍କର ମୃତ୍ୟୁ ହେବା ସହ ଜଣେ ଗର୍ଭବତୀଙ୍କ ସହ ଅନ୍ୟଜଣେ ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି (Doctor crushed 3 people with car in Nagaur)। ପ୍ରାଣ ହରାଇଥିବା ବ୍ୟକ୍ତି ସ୍ଥାନୀୟ ଅଞ୍ଚଳର ବୋଲି ଜଣାପଡିଛି । ତେବେ ଏହା ଏକ ଆକସ୍ମିକ ଦୁର୍ଘଟଣା ନୁହେଁ, ବରଂ ଡାକ୍ତର ମଦ୍ୟପାନ କରି ଗାଡି ଚଳାଉଥିବା ବେଳେ ଭାରସାମ୍ୟ ହରାଇ ଏପରି ଦୁର୍ଘଟଣାକୁ ଋପ ଦେଇଥିବା ଅଭିଯୋଗ ହୋଇଛି ।
ଦୁର୍ଘଟଣା ପରେ ମେଡିକାଲ ଷ୍ଟାଫମାନେ ଡାକ୍ତରଙ୍କୁ ହସ୍ପିଟାଲ ଭିତରକୁ ନେଇଥିବା ବେଳେ ପରବର୍ତ୍ତୀ ସମୟରେ ସେ ସେଠାରୁ ଫେରାର ହୋଇଯିବାରେ ସଫଳ ହୋଇଛନ୍ତି । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି । ପୋଲିସ ଘଟଣାସ୍ଥଳରେ ପହଞ୍ଚିଛି । ସମ୍ପୃକ୍ତ ଡାକ୍ତରଙ୍କୁ ଗିରଫ କରିବା ପାଇଁ ଉଦ୍ୟମ କରାଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
