ନୂଆଦିଲ୍ଲୀ: ଦୁଇ ଦିନର ପ୍ରବଳ ବିରୋଧ ଓ ଗୃହରେ ଅଚଳାବସ୍ଥା ପରେ ଆଜି ବହୁଚର୍ଚ୍ଚିତ ଦିଲ୍ଲୀ ସେବା ଅଧ୍ୟାଦେଶ ବିଲ୍ ଲୋକସଭାରେ ପାରିତ ହୋଇଛି । ଚଳିତ 1 ତାରିଖ ନିମ୍ନ ସଦନରେ ଆଗତ ହୋଇଥିବା ଏହି ବିଲ୍ ପ୍ରବଳ ବିରୋଧ ମଧ୍ଯରେ ଆଜି ପାରିତ ହୋଇଛି । ଆଜି ଗୃହମନ୍ତ୍ରୀ ଅମିତ ଶାହ ଏହି ବିଲର ଚର୍ଚ୍ଚାରେ ସରକାରଙ୍କ ପକ୍ଷରୁ ପ୍ରତିନିଧିତ୍ବ କରିଥିଲେ । ବିଲ୍ ପାସ ସମୟରେ ଭୋଟିଂ ପୂର୍ବରୁ ବିରୋଧୀ ସଦସ୍ୟମାନେ କକ୍ଷତ୍ୟାଗ କରିଛନ୍ତି ।
ଗୃହରେ ବିଶୃଙ୍ଖଳିତ ଆଚରଣ ପାଇଁ ଆମ୍ ଆଦମୀ ପାର୍ଟିର ସାଂସଦ ସୁଶୀଲ କୁମାର ରିଙ୍କୁଙ୍କୁ ମୌସୁମୀ ଅଧିବେଶନରୁ ନିଲମ୍ବିତ କରାଯାଇଛି । ଏହି ବିଲ ସମ୍ପର୍କରେ ମତଦାନ ସମୟରେ ବିରୋଧୀ ସାଂସଦମାନେ କକ୍ଷତ୍ୟାଗ କରିଥିଲେ । ବରିଷ୍ଠ କଂଗ୍ରେସ ନେତା ଅଧୀର ରଞ୍ଜନ ଚୌଧୁରୀ କହିଛନ୍ତି, ଗୃହରେ ବିରୋଧୀଙ୍କୁ ମତ ରଖିବାର ସୁଯୋଗ ମିଳୁନି,ତେଣୁ ସେମାନେ କକ୍ଷତ୍ୟାଗ କରିବାକୁ ବାଧ୍ୟ ହୋଇଛନ୍ତି ।
ଦିଲ୍ଲୀ ସେବା ବିଲ୍କୁ ନେଇ ଆଜି (ଗୁରୁବାର) ନିମ୍ନସଦନ ଲୋକସଭାରେ ବିତର୍କ ହୋଇଥିଲା । କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଦିଲ୍ଲୀ ସରକାର ଏବଂ ବିରୋଧୀ ମିଳିତ ମେଣ୍ଟ ‘ଇଣ୍ଡିଆ’ କୁ ଏହି ପ୍ରସଙ୍ଗରେ କଡା ସମାଲୋଚନା କରିଥିଲେ । ଶାହ କହିଥିଲେ, ‘‘ମାମଲା କେବଳ ଦିଲ୍ଲୀର ପ୍ରଶାସନିକ ଅଧିକାରୀଙ୍କ ପୋଷ୍ଟିଂ କିମ୍ବା ବଦଳି ପାଇଁ ନୁହେଁ, ବରଂ ସେମାନେ ସେମାନଙ୍କ ଦୁର୍ନୀତିକୁ ଲୁଚାଇବା ପାଇଁ ଏହି ଆଳରେ ଭିଜିଲାନ୍ସ ବିଭାଗକୁ ମଧ୍ୟ ହାତକୁ ନେବାକୁ ଚାହୁଁଛନ୍ତି । ଯେଉଁ ଦଳମାନେ ଦିଲ୍ଲୀ ସରକାରଙ୍କ ସହ ଅଛନ୍ତି, ସେମାନେ ମଧ୍ୟ ଭ୍ରଷ୍ଟାଚାର ସହ ରହିଛନ୍ତି । କିନ୍ତୁ ଜନସାଧାରଣ ସବୁ କିଛି ଦେଖୁଛନ୍ତି ।’’
ଆହୁରି ମଧ୍ୟ ଶାହ କହଛନ୍ତି, ‘‘ମୁଁ ଏହି ଦଳମାନଙ୍କୁ କହିବାକୁ ଚାହେଁ ଯେ ତୁମେ ତୁମର ମେଣ୍ଟ ବିଷୟରେ ନୁହେଁ ବରଂ ଦିଲ୍ଲୀ ବିଷୟରେ ଚିନ୍ତା କରିବା ଉଚିତ୍ । କାରଣ ତୁମେ ଯାହା ବି କର, କୌଣସି ମିଳିତ ମଞ୍ଚ ଗଠନ କର ନା କାହିଁକି,କିନ୍ତୁ ନରେନ୍ଦ୍ର ମୋଦି ଆସନ୍ତା ନିର୍ବାଚନରେ ପୁଣି ଥରେ ପ୍ରଧାନମନ୍ତ୍ରୀ ହେବାକୁ ଯାଉଛନ୍ତି । ଦେଶବାସୀ ଏହି ନିଷ୍ପତ୍ତି ନେଇସାରିଛନ୍ତି ।’’
ଏହା ମଧ୍ୟ ପଢନ୍ତୁ:-Delhi Ordinance Bill: ଲୋକସଭାରେ ଆଗତ, BJDର ସମର୍ଥନ
ଆଜି ଲୋକସଭାରେ ପାରିତ ହେବା ପରେ ଆସନ୍ତାକାଲି (ଶୁକ୍ରବାର) ଏହି ବିଲ ସମ୍ପର୍କରେ ରାଜ୍ୟସଭାରେ ଚର୍ଚ୍ଚା ହେବ । ବିଜେପି ନେତୃତ୍ବାଧୀନ ଏନଡିଏ ମେଣ୍ଟ ନିକଟରେ ରାଜ୍ୟସଭାରେ ଏହାକୁ ପାରିତ କରିବା ପାଇଁ ସଂଖ୍ୟା ନଥିଲେ ସୁଦ୍ଧା, ଏକାଧିକ ଅଣ ଏନଡିଏ ଦଳ ସମର୍ଥନ ଘୋଷଣା କରିସାରିଛନ୍ତି । ଓ୍ବାଇଏସଆର କଂଗ୍ରେସ, ବିଜୁ ଜନତା ଦଳ ଓ ଟିଡିପି ଏହି ବିଲକୁ ଉଭୟ ଗୃହରେ ସମର୍ଥନ ଦେବା ନେଇ ଘୋଷଣା କରିଥିଲେ । ଏହି କ୍ରମରେ ରାଜ୍ୟସଭାରେ ମଧ୍ୟ ଏହି ବିଲ ପାରିତ ହେବାର ସମ୍ଭାବନା ପ୍ରାୟତଃ ସ୍ପଷ୍ଟ ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
