ନୂଆଦିଲ୍ଲୀ: ରାଜଧାନୀ ଦିଲ୍ଲୀର ଛାତି ଉପରେ ଗୁରୁଙ୍କ ଦ୍ବାରା ଅମାନବୀୟ କାଣ୍ଡ । ଯିଏ ଭଲ କାର୍ଯ୍ୟ କରିବାକୁ ଶିକ୍ଷା ଦିଅନ୍ତି, ଏଠାରେ ସେ ନିନ୍ଦନୀୟ କାଣ୍ଡ ଭିଆଇଛନ୍ତି । ପଞ୍ଚମ ଶ୍ରେଣୀର ପଢୁଥିବା କୋମଳମତୀ ଶିଶୁକୁ ପ୍ରଥମ ମହଲା ବାଲକୋନୀରୁ ଫିଙ୍ଗିଛନ୍ତି ପ୍ରାଥମିକ ବିଦ୍ୟାଳୟର ଶିକ୍ଷୟିତ୍ରୀ (Teacher throws 5th class students from first floor) । ଉଚ୍ଚ ସ୍ଥାନରୁ ତଳେ ପଡ଼ିବା ପରେ ଛାତ୍ରୀକୁ ହିନ୍ଦୁରାୱ ହସ୍ପିଟାଲରେ ଭର୍ତ୍ତି କରାଯାଇଛି । ସେପଟେ ଅଭିଯୁକ୍ତ ଶିକ୍ଷୟିତ୍ରୀଙ୍କୁ ହେପାଜତରେ ନେଇଛି ସ୍ଥାନୀୟ ପୋଲିସ । ଏଭଳି ଘଟଣା ଦିଲ୍ଲୀ କରୋଲବାଗ ନିକଟସ୍ଥ ଫିଲ୍ମିସ୍ତାନ ଅଞ୍ଚଳରେ ଘଟିଛି ।
ଦିଲ୍ଲୀର ପୋଲିସ କହିବାନୁସାରେ ପ୍ରାୟ ସାଢେ ୧୧ଟା ବେଳେ ଘଟିଛି ଏହି ଘଟଣା । ପ୍ରାଥମିକ ବିଦ୍ୟାଳୟର ଶିକ୍ଷୟିତ୍ରୀ ୫ମ ଶ୍ରେଣୀ ଛାତ୍ରୀଙ୍କୁ ପ୍ରଥମ ମହଲା ଶ୍ରେଣୀକକ୍ଷରୁ ତଳକୁ ଫିଙ୍ଗିଦେଇଥିଲେ । ଘଟଣା ସମ୍ପର୍କରେ ଜାଣିବା ପରେ ପୋଲିସ ଘଟଣାସ୍ଥଳରେ ପହଞ୍ଚିଥିଲା । ସେଠାରେ ଆହତ ଛାତ୍ରୀଙ୍କ ପରିବାର ହଙ୍ଗାମା କରୁଥିବା ବେଳେ ପୋଲିସ ଶିକ୍ଷୟିତ୍ରୀ ଗୀତା ଦେଶୱାଲଙ୍କୁ ହେପାଜତରେ ନେଇଛି । ଶିକ୍ଷୟିତ୍ରୀ ଜଣକ ଛାତ୍ରୀଙ୍କୁ ପ୍ରଥମେ କାଗଜ କଟାଯିବା କଇଁଚିରେ ମାଡ଼ ମାରିବା ପରେ ତଳକୁ ଫିଙ୍ଗିଦେଇଥିଲେ ।
ଏହା ବି ପଢନ୍ତୁ- ମୃତକଙ୍କ ପରିବାରକୁ ଦିଆଯିବନି କ୍ଷତିପୂରଣ: ବିହାର ମୁଖ୍ୟମନ୍ତ୍ରୀ
ସେପଟେ ଆହତ ଛାତ୍ରୀଙ୍କ ପରିବାରର ଅଭିଯୋଗ ଅନୁସାରେ ବିଦ୍ୟାଳୟରେ ପାଠପଢା ବଦଳରେ ଛାତ୍ରଛାତ୍ରୀଙ୍କ ଉପରେ ଜୁଲୁମ ହେଉଛି । ପୂର୍ବରୁ ମଧ୍ୟ ଅନେକ ଥର ଏହି ଶିକ୍ଷୟିତ୍ରୀ ଛାତ୍ରୀଙ୍କୁ ମାଡ଼ ମାରୁଥିଲେ । ଏନେଇ ଅଭିଭାବକ ଅଭିଯୋଗ ପରେ ମଧ୍ୟ ତାଙ୍କ ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିଲା । ଶିକ୍ଷୟିତ୍ରୀ ଅନେକ ଛାତ୍ରୀଙ୍କୁ କଇଁଚିରେ ମାଡ଼ ମାରିଥିଲେ । ପୋଲିସ ଶିକ୍ଷୟିତ୍ରୀଙ୍କୁ ହେପାଜତରେ ନେଇଥିବା ବେଳେ ଏକ ମାମଲା ରୁଜୁ କରିଛି । ତେବେ ଶିକ୍ଷୟିତ୍ରୀ ଜଣକ ଏପରି କଣ ପାଇଁ କଲେ ସେନେଇ କୌଣସି ସୂଚନା ମିଳିନାହିଁ ।
ସ୍ଥାନୀୟ ପୋଲିସ ଅଧିକାରିଣୀ ଶ୍ବୈତା ଚୌହାନଙ୍କ କହିବାନୁସାରେ, "ଡିସେମ୍ବର ୧୬ ତାରିଖ ସାଢେ ୧୧ଟା ବେଳେ ଏନେଇ ପୋଲିସକୁ ଖବର ଦିଆଯାଇଥିଲା । ସୂଚନା ମିଳିବା ପରେ ହିନ୍ଦୁରାୱ ଥାନାଧିକାରୀ ଘଟଣାସ୍ଥଳରେ ପହଞ୍ଚିଥିଲେ । ପ୍ରାଥମିକ ତଦନ୍ତ ଅନୁସାରେ ଜଣାପଡ଼ିଛି ଯେ ଶିକ୍ଷୟିତ୍ରୀ ଜଣକ ଆହତ ଛାତ୍ରୀଙ୍କ ପ୍ରଥମେ ମାଡ଼ ମାରିବା ପରେ ପ୍ରଥମ ମହଲାରେ ସ୍ଥିତ ଶ୍ରେଣୀକକ୍ଷରୁ ତଳକୁ ଫିଙ୍ଗିଥିଲେ । ଏନେଇ ମାମଲା ରୁଜୁ କରିବା ସହ ଯାଞ୍ଚ ଆରମ୍ଭ ହୋଇଛି ।" ଏହି ଘଟଣାକୁ ସାଧାରଣରେ ତୀବ୍ର ନିନ୍ଦା କରାଯାଇଛି ।
