ନୂଆଦିଲ୍ଲୀ: ପୁଣି ଏକ ନୂଆ ପ୍ରସଙ୍ଗରେ ସାମ୍ନାସାମ୍ନି ହୋଇଛନ୍ତି ଦିଲ୍ଲୀ ଉପରାଜ୍ୟପାଳ ଓ କେଜ୍ରିଓ୍ବାଲଙ୍କ ନେତୃତ୍ବାଧୀନ ଆପ ସରକାର । ଅପରାଧିକ ମାମଲାର ତଦନ୍ତ ପାଇଁ ଦିଲ୍ଲୀ ସରକାର ଗଠନ କରିଥିବା ଷ୍ଟାଣ୍ଡିଂ କମିଟିକୁ ଉପରାଜ୍ୟପାଳ ବିନୟ ସକ୍ସେନା ଆଜି ଭଙ୍ଗ କରି ଦେଇଛନ୍ତି । ସର୍ବୋଚ୍ଚ କୋର୍ଟଙ୍କ ପ୍ରଦତ୍ତ ଗାଇଡଲାଇନକୁ ଏହାର ଗଠନ ବେଳେ ଅନୁପାଳନ କରାଯାନଥିବା ଅଭିଯୋଗରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ରାଜଭବନ ପକ୍ଷରୁ କୁହାଯାଇଛି ।
ରାଜଭବନ ପକ୍ଷରୁ ମିଳିଥିବା ସୂଚନା ଅନୁସାରେ, 2014 ରେ ସର୍ବୋଚ୍ଚ କୋର୍ଟ ଜାରି କରିଥିବା ନିର୍ଦ୍ଦେଶର ଅନୁପାଳନ କରାଯାଇ ଏହି କମିଟି ଗଠନ କରାଯାଇନଥିଲା । ତେଣୁ ଏହାକୁ ଅବୈଧ ଘୋଷଣା କରିବା ସହ ଉପରାଜ୍ୟପାଳ ବିନୟ ସକ୍ସେନା ଭଙ୍ଗ କରିବାକୁ ନିର୍ଦ୍ଦେଶ ଜାରି କରିଛନ୍ତି । ଏହା ସହ ଉଚିତ ପ୍ରକ୍ରିୟା ଅବଲମ୍ବନ କରି କମିଟିର ପୁନର୍ଗଠନ କରିବା ପାଇଁ ମଧ୍ୟ ଉପରାଜ୍ୟପାଳ ଅନୁମୋଦନ ମଧ୍ୟ ଦେଇଛନ୍ତି । ତେବେ ଏନେଇ ଆପ ପକ୍ଷରୁ କୌଣସି ପ୍ରତିକ୍ରିୟା ଏପର୍ଯ୍ୟନ୍ତ ସାମ୍ନାକୁ ଆସିନି ।
ବର୍ତ୍ତମାନର ଦିଲ୍ଲୀ ସରକାର ଗଠନ କରିଥିବା ଏହି କମିଟିକୁ ଜାରି ରଖିବାର କୌଣସି କାରଣ କିମ୍ବା ଯଥାର୍ଥତା ନାହିଁ ବୋଲି ଉପରାଜ୍ୟପାଳ ସକ୍ସେନା କହିଛନ୍ତି । ତାଙ୍କ ପୂର୍ବରୁ ଦିଲ୍ଲୀ ଉପରାଜ୍ୟପାଳ ଥିବା ଅନିଲ ବୈଜଲ ମଧ୍ୟ ଏହାକୁ ବାରମ୍ବାର ବିରୋଧ କରିଥିଲେ । 2017 ମସିହା 11 ତାରିଖରେ ତତ୍କାଳୀନ ଉପରାଜ୍ୟପାଳ ବୈଜଲ ଏହି ପ୍ରସଙ୍ଗରେ ଦିଲ୍ଲୀ ସରକାରଙ୍କୁ ଚିଠି ଲେଖିଥିଲେ । ଏହି କମିଟିର ଗଠନକୁ ପୁନଃସମୀକ୍ଷା କରିବା ଓ ଏହାକୁ ସର୍ବୋଚ୍ଚ ଅଦାଲତର ଆଦେଶ ସହିତ ଅନୁରୂପ ଭାବେ ପୁନର୍ଗଠନ କରିବା ପାଇଁ ସେ ଚିଠିରେ ଉଲ୍ଲେଖ କରିଥିଲେ । ହେଲେ ଦିଲ୍ଲୀ ସରକାର କୌଣସି ତତ୍ପରତା ଦେଖାଇନଥିଲା । ଏହି ପ୍ରସ୍ତାବ ସମ୍ପର୍କରେ ବିଚାର କରିବା ପାଇଁ ରାଜଭବନ ସଚିବାଳୟ 2018 ମସିହା ଫେବୃଆରୀ 19 ତାରିଖ, ଜୁନ୍ 22 ତାରିଖ, 2018 ମସିହା ଅକ୍ଟୋବର 18 ତାରିଖ, 2019 ମେ 31 ରେ ମଧ୍ୟ ସରକାରଙ୍କୁ ଚିଠି ଲେଖିଥିଲା ।
ହେଲେ ଆଜି ଉପରାଜ୍ୟପାଳ ସକ୍ସେନା ଏହି ସବୁ ପୂର୍ବ ପ୍ରକ୍ରିୟାକୁ ମନେ ପକାଇବା ସହ ଦିଲ୍ଲୀ ସରକାରଙ୍କ ଦ୍ବାରା ଗଠିତ କମିଟିକୁ ଭଙ୍ଗ କରିଛନ୍ତି । ଏହାକୁ ନେଇ ମୁଖ୍ୟମନ୍ତ୍ରୀ କେଜ୍ରିଓ୍ବାଲ କିମ୍ବା ତାଙ୍କ ଦଳର ଅନ୍ୟ କେହି ନେତାଙ୍କ ପ୍ରତିକ୍ରିୟା ଆସିନି । ତେବେ କେବଳ ଏହି ପ୍ରସଙ୍ଗ ନୁହେଁ ବରଂ ଏକାଧିକ ପ୍ରଶାସନିକ କ୍ଷମତା ବିବାଦ ରାଜଭବନ ଓ ନିର୍ବାଚିତ ସରକାର ମଧ୍ୟରେ ରହିଛି । ଦିଲ୍ଲୀ ଏକ କେନ୍ଦ୍ରଶାସିତ ରାଜ୍ୟ ହୋଇଥିବା କାରଣରୁ ଏଠାରେ ଅନ୍ୟ ରାଜ୍ୟ ପରି ନିର୍ବାଚିତ ସରକାର ଥିଲେ ସୁଦ୍ଧା ଏହା ପୂର୍ଣ୍ଣରାଜ୍ୟ କ୍ଷମତା ଉପଭୋଗ କରିପାରେ ନାହିଁ । କେନ୍ଦ୍ର ସରକାରଙ୍କ ପ୍ରତିନିଧି ଭାବେ ପରାଜ୍ୟପାଳ ସରକାରଙ୍କ କାର୍ଯ୍ୟରେ ହସ୍ତକ୍ଷେପ କରନ୍ତି । କିଛି ପ୍ରସଙ୍ଗରେ ସରକାର ଅପେକ୍ଷା ରାଜଭବନର ସାମ୍ବିଧାନିକ ବିଶେଷାଧିକାର ମଧ୍ୟ ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
