ନୂଆଦିଲ୍ଲୀ: ଆତଙ୍କୀ କାର୍ଯ୍ୟକଳାପ ପାଇଁ ପାଣ୍ଠି ସଂଗ୍ରହ ଅଭିଯୁକ୍ତ ମହମ୍ମଦ ସଲିମର ବିଚାରାଧୀନ ଜାମିନ ଆବେଦନକୁ ତ୍ୱରାନ୍ୱିତ ଭାବେ ଶେଷ କରିବାକୁ ପଟିଆଲା ହାଉସ କୋର୍ଟଙ୍କୁ ନିର୍ଦ୍ଦେଶ ଦେଇଛନ୍ତି ଦିଲ୍ଲୀ ହାଇକୋର୍ଟ । ଜଷ୍ଟିସ୍ ସିଦ୍ଧାର୍ଥ ମୃଦୁଲଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରି ଏପରି ରାୟ ଶୁଣାଇଛନ୍ତି ।
ଆବେଦନକାରୀଙ୍କ ପକ୍ଷରୁ ହାଜର ହୋଇଥିବା ଆଇନଜୀବୀ ତନଭୀର ଅହମ୍ମଦ ମିର ଏବଂ ପ୍ରଭବ ରାଲି କହିଛନ୍ତି ଯେ ପଟିଆଲା ହାଉସ କୋର୍ଟର ଏନଆଇଏ କୋର୍ଟରେ ଫେବୃଆରୀ 4 ରୁ ଏହି ଜାମିନ ଆବେଦନ ବିଚାରାଧୀନ ଅଛି। ମେ 27 ରେ ହାଇକୋର୍ଟଙ୍କ ଏକକ ଖଣ୍ଡପୀଠ ଜାମିନ ଆବେଦନ ଉପରେ ଶୀଘ୍ର ଶୁଣାଣି କରିବାକୁ ପଟିଆଲା ହାଉସ କୋର୍ଟଙ୍କୁ ନିର୍ଦ୍ଦେଶ ଦେଇସାରିଛନ୍ତି । ତଥାପି ଏହି ମାମଲା ଏପର୍ଯ୍ୟନ୍ତ ବିଚରାଧୀନ ଅଛି ।
ଅନ୍ୟପଟେ ଏହି ପ୍ରସଙ୍ଗରେ ପଟିଆଲା କୋର୍ଟ କହିଛନ୍ତି ଯେ, ମାମଲାରେ ତଥ୍ୟ ଓ ପ୍ରମାଣ ସଂଖ୍ୟା ଅଧିକ ରହିଛି । କୋରୋନା କାଳରେ ଭିଡିଓ କନ୍ଫରେନ୍ସିଂ ଜରିଆରେ ଏପରି ମାମଲାର ଶୁଣାଣି ଶେଷ କରିବା ସମ୍ଭବ ନୁହେଁ । ତେଣୁ ଏହି ମାମଲାର ଶୁଣାଣି କେବଳ ସ୍ବାଭାବିକ ଭାବେ ଅଦାଲତ ପରିସରରେ ହିଁ ସମ୍ଭବ । କିନ୍ତୁ ପଟିଆଲା ହାଉସକୋର୍ଟଙ୍କ ଏପରି ଆଭିମୁଖ୍ୟରେ ସର୍ବୋଚ୍ଚ କୋର୍ଟ ଏକମତ ହୋଇନଥିବା ବେଳେ ଏହି ପ୍ରସଙ୍ଗର ଶୁଣାଣି ଅଗ୍ରାଧିକାର ଭିତ୍ତିରେ ଶେଷ କରିବା ପାଇଁ ନିର୍ଦ୍ଦେଶ ଦେଇଛନ୍ତି ।
ଟେରର ଫଣ୍ଡିଂ ଅଭିଯୋଗରେ 26 ସେପ୍ଟେମ୍ବର 2018 ଅଭିଯୁକ୍ତ ମହମ୍ମଦ ସଲିମକୁ ଗିରଫ କରିଥିଲା NIA । ସେବେଠାରୁ ଅଭିଯୁକ୍ତ ଜେଲରେ ଅଛି । ସଲିମ ଭାରତରେ ଆତଙ୍କବାଦୀ କାର୍ଯ୍ୟକଳାପ ପାଇଁ ହାୱାଲା ମାଧ୍ୟମରେ ଅର୍ଥ ଯୋଗାଡ କରୁଥିବା ସହ ପାକିସ୍ତାନ ସହ ଯୋଗାଯୋଗରେ ରହିଥିବା ପ୍ରମାଣ ପାଇବା ପରେ ତାକୁ ଗିରଫ କରିଥିଲା ଜାତୀୟ ତଦନ୍ତକାରୀ ସଂସ୍ଥା NIA ।
ବ୍ୟୁରୋ ରିପୋର୍ଟ, ଇଟିଭି ଭାରତ
