ନୂଆଦିଲ୍ଲୀ: ପୁଲୱାମା ଆକ୍ରମଣକୁ ଦୁଇବର୍ଷ ପୁରିଛି । ପ୍ରେମର ଦିବସରେ ରକ୍ତର ହୋଲି ଖେଳିଥିଲେ ଆତଙ୍କବାଦୀ । ଜାମ୍ମୁକାଶ୍ମୀରର ପୁଲୱାମାରେ ଆତଙ୍କୀଙ୍କ ଆତ୍ମଘାତୀ ଆକ୍ରମଣରେ ଶହୀଦ ହୋଇଥିଲେ 40ରୁ ଊର୍ଦ୍ଧ୍ବ ସିଆରପିଏଫ ଯବାନ । ଆଜି ସେହି ବୀରଙ୍କ ସ୍ମୃତିରେ ଶ୍ରଦ୍ଧାଞ୍ଜଳି ଜଣାଇଛନ୍ତି ପ୍ରତିରକ୍ଷାମନ୍ତ୍ରୀ ରାଜନାଥ ସିଂ ।
ଶହୀଦଙ୍କୁ ଶ୍ରଦ୍ଧାଞ୍ଜଳି ଦେଇ ରାଜନାଥ ସିଂ କହିଛନ୍ତି ଦେଶପ୍ରତି ସେନାଙ୍କ ବଳିଦାନକୁ ଭାରତ କେବେ ଭୁଲି ପାରିବନାହିଁ । ଏହି ଆକ୍ରମଣରେ ଉଜୁଡି ଯାଇଥିବା ସମସ୍ତ ଶହୀଦଙ୍କ ପରିବାର ସହିତ ସବୁବେଳେ ରହିଛୁ ବୋଲି ଟ୍ବିଟ କରି କହିଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ।
ଏହା ସହିତ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହା ପୁଲୱାମାରେ ଶହୀଦ ହୋଇଥିବା ଯବାନଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି । ଭାରତ ସେହି ଯବାନଙ୍କ ମହାନ ବଳିଦାନ ଓ ଅସାଧାରଣ ସାହାସକୁ କେବେ ଭୁଲି ପାରିବ ନାହିଁ ବୋଲି ଟ୍ବିଟ କରି ସୂଚନା ଦେଇଛନ୍ତି ଅମିତ ଶାହା ।
ବ୍ୟୁରୋ ରିପୋର୍ଟ, ଇଟିିଭି ଭାରତ
