ମୁମ୍ବାଇ: ମହାରାଷ୍ଟ୍ରରେ ଅଭାବନୀୟ ଘଟଣା, ହ୍ରଦରେ ବୁଡି ଗୋଟିଏ ପରିବାରର ୪ଜଣଙ୍କ ମୃତ୍ୟୁ ହୋଇଥିବା ସୂଚନା( woman and her three daughters drowned in a lake in the Sangli district) । ଜଣେ ମହିଳାଙ୍କ ସହ ତାଙ୍କ ତିନି ଝିଅଙ୍କ ମୃତଦେହ ଉଦ୍ଧାର କଲା ପୋଲିସ । ଗତକାଲି(ରବିବାର) ସାଙ୍ଗଲି ଜିଲ୍ଲାର ବିଲୁର ଗ୍ରାମପରେ ଏହି ଘଟଣା ଘଟିଥିବା ପୋଲିସ ତରଫରୁ ସୂଚନା ମିଳିଛି । ଚାରି ମୃତକ ହେଉଛନ୍ତି ମହିଳା ସୁନୀତା ତୁକାରାମ ମାଲି (27) ଓ ତାଙ୍କ ତିନି ଝିଅ ହେଉଛନ୍ତି ଅମୃତା ତୁକାରାମ ମାଲି, ଅଙ୍କିତା ତୁକାରାମ ମାଲି ଓ ଐଶ୍ବର୍ଯ୍ୟା ତୁକାରାମ ମାଲି । ସେମାନଙ୍କ ମଧ୍ୟରୁ ଜଣଙ୍କ ବୟସ ୧୩ ବର୍ଷ ହେଇଥିବା ବେଳେ ଅନ୍ୟ ଦୁଇ ଜଣଙ୍କ ବୟସ ଯଥାକ୍ରମେ ୧୦ ଓ ୭ ବର୍ଷ ବୋଲି ଜଣାପଡିଛି ।
ପୋଲିସର ସୂଚନାନୁସାରେ, ବିଲୁର ଗ୍ରାମରେ ତୁକାରାମ ଚନ୍ଦ୍ରକାନ୍ତ ମାଲି ବସବାସ କରନ୍ତି । ଗତ ରବିବାର ସକାଳ ସମୟରେ ତାଙ୍କ ସ୍ତ୍ରୀ ସୁନୀତା ଓ ତିନି ଝିଅ କେଉଁ ଆଡେ ନିଖୋଜ ହୋଇଯାଇଥିଲେ । ଦିନ ତମାମ ସେ ଖୋଜାଖୋଜି କରିବା ପରେ ଗ୍ରାମବାସୀଙ୍କୁ ମଧ୍ୟ ପଚାରି ବୁଝିଥିଲେ । କିନ୍ତୁ ସ୍ତ୍ରୀ ଓ ତିନି ଝିଅଙ୍କ କୌଣସି ପତ୍ତା ନମିଳିବାରୁ ଏନେଇ ସେ ଜଟ ପୋଲିସ ଥାନାରେ ଏକ ନିଖୋଜ ଅଭିଯୋଗ କରିଥିଲେ ।
ପୋଲିସ ଏକ ନିଖୋଜ ମାମଲା ରୁଜୁ କରି ମହିଳା ଓ ତାଙ୍କ ତିନି ଝିଅଙ୍କୁ ଖୋଜା ଖୋଜି ଆରମ୍ଭ କରିଥିବା ବେଳେ ରବିବାର ରାତି ପ୍ରାୟ ୧ଟା ସମୟରେ ନିଟକ ହ୍ରଦରେ ଚାରି ଜଣଙ୍କ ମୃତଦେହ ଭାସୁଥିବା ଦେଖିବାକୁ ପାଇଥିଲା । ଏହାପରେ ହ୍ରଦରୁ ପୋଲିସ ୪ଜଣଙ୍କ ମୃତଦେହ ଉଦ୍ଧାର କରି ଚିହ୍ନଟ କରିବା ପରେ ସ୍ଥାନୀୟ ଡାକ୍ତରଖାନାକୁ ପୋଷ୍ଟମର୍ଟମ ପାଇଁ ସ୍ଥାନାନ୍ତର କରିଥିଲା ।
ମହିଳା ଓ ତାଙ୍କ ତିନି ଝିଅଙ୍କ ମୃତ୍ୟୁକୁ ନେଇ ଗାଁରେ ଶୋକର ଛାୟା ଖେଳିଯାଇଛି । ତେବେ ପାଣିରେ ବୁଡି ୪ଜଣଙ୍କ ମୃତ୍ୟୁ ହୋଇଛି ନା ଏହାପଛରେ ଅନ୍ୟ କିଛି କାରଣ ରହିଛି ସେନେଇ ପୋଲିସ ତଦନ୍ତ ଜାରି ରଖିଛି, ତେବେ ଏହା ହତ୍ୟା ନା ଆତ୍ମହତ୍ୟା ସେନେଇ କିଛି ସୂଚନା ମିଳିପାରି ନାହିଁ । ଯଦି ଏହା ଆତ୍ମହତ୍ୟା ହୋଇଥାଏ, ତେବେ କେଉଁ କାରଣକୁ କେନ୍ଦ୍ର କରି ଏମିତି ନିଷ୍ପତ୍ତି ନେଲେ ସେନେଇ ପୋଲିସ ତଦନ୍ତ କରିବ । ଯଦି ଏହା ହତ୍ୟାକାଣ୍ଡ ତେବେ କିଏ ଓ କେଉଁ କାରଣରୁ ଚାରି ଜଣଙ୍କୁ ହତ୍ୟା କରିଛି ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
