ଗାନ୍ଧୀନଗର: ମହାରାଷ୍ଟ୍ରରେ ତାଣ୍ଡବ ରଚିବା ପରେ ଏବେ ଲ୍ୟାଣ୍ଡଫଲ ପ୍ରକ୍ରିୟା ଆରମ୍ଭ କରିଛି ବାତ୍ୟା ତାଉ'ତେ । ଆଉ କିଛି ସମୟ ପରେ ଗୁଜୁରାଟ ଉପକୂଳରେ ତାଉ'ତେ ଛୁଇଁବ ସ୍ଥଳଭାବ । ଏହା ପୂର୍ବରୁ ଗୁଜୁରାଟରେ ଆରମ୍ଭ ହୋଇଯାଇଛି ବାତ୍ୟାର ଗର୍ଜନ ।
ଗୁଜୁରାଟରେ ବାତ୍ୟା ତାଉତେର ଲ୍ୟାଣ୍ଡଫଲ୍ ପ୍ରକ୍ରିୟା ଆରମ୍ଭ ହେବା କ୍ଷଣି ପବନର ବେଗ ବଢିଯାଇଛି । ପୋରବନ୍ଦର-ମହୁଭା ମଧ୍ୟରେ ଲ୍ୟାଣ୍ଡଫଲ୍ କରୁଛି ତାଉତେ । ପ୍ରାୟ ୨ ଘଣ୍ଟା ଧରି ରହିବ ପ୍ରଭାବ ।
ଅହମଦାବାଦରେ ପ୍ରବଳ ବର୍ଷା ସାଙ୍ଗକୁ ପବନ ବହୁଛି । ବାତ୍ୟାକୁ ଦୃଷ୍ଟିରେ ରଖି ଗୁଜୁରାଟର ମୁଖ୍ୟମନ୍ତ୍ରୀ ବିଜୟ ରୁପାନି ଗାନ୍ଧୀନଗର ସ୍ଥିତ ବାତ୍ୟା କଣ୍ଟ୍ରୋଲ ରୁମରେ ପହଞ୍ଚି ଭିଡିଓ କନଫରେନ୍ସିଂ ମାଧ୍ୟମରେ ଉପକୂଳବର୍ତ୍ତୀ ଜିଲ୍ଲା ସମେତ ରାଜ୍ୟର ସ୍ଥିତି ସମ୍ପର୍କରେ ସମୀକ୍ଷା କରିଛନ୍ତି ।
ଲ୍ୟାଣ୍ଡଫଲ ପୂର୍ବରୁ ଡିୟୁ ନିକଟରେ ବାତ୍ୟା ତାଉ'ତେ ପ୍ରଭାବରେ ପବନର ବେଗ ରହିଥିଲା ଘଣ୍ଟା ପ୍ରତି 133 କିଲୋମିଟର । ଗୁଜୁରାଟରେ ସ୍ଥଳଭାଗ ଛୁଇଁବା ବେଳକୁ ପବନର ବେଗ ଆହୁରି ବଢିବା ନେଇ ଅନୁମାନ କରାଯାଉଛି ।
ବାତ୍ୟା ଯୋଗୁଁ ଗୁଜୁରାଟର ଉପକୂଳବର୍ତ୍ତୀ ଜିଲ୍ଲାଗୁଡିକରେ ପବନର ବେଗରେ ବିଦ୍ୟୁତ ଖୁଣ୍ଟ ଉପୁଡି ପଡିଛି । ଯାହାଫଳରେ ବିଦ୍ୟୁତ ସେବା ସମ୍ପୂର୍ଣ୍ଣ ଠପ ହୋଇଯାଇଛି । ସେପଟେ ବିମାନ ସେବା 22 ଘଣ୍ଟା ପର୍ଯ୍ୟନ୍ତ ବାତିଲ କରାଯାଇଛି ।
