ଅମୃତସର: ଦେଶରେ ମାରାତ୍ମକ ରୂପ ନେଉଛି କୋରୋନାର ଦ୍ବିତୀୟ ଲହରି । ପୁଣି ଉପରମୁହାଁ ହୋଇଛି କୋରୋନା ଗ୍ରାଫ । ମହାରାଷ୍ଟ୍ର, ପଞ୍ଜାବ, ଛତିଶଗଡ, ମଧ୍ୟପ୍ରଦେଶରେ ବଢୁଛି ସଂକ୍ରମଣ । ଗତ 5 ଦିନ ମଧ୍ୟରେ ସଂକ୍ରମଣ ଦ୍ରୁତ ଗତିରେ ବୃଦ୍ଧି ପାଇଛି । ଗୁରୁବାର ରାତିରେ ଅମୃତସରର ଲାଗୁ ହୋଇଛି ରାତ୍ରୀକାଳୀନ କର୍ଫ୍ୟୁ । ରାତି 11ଟାରୁ ସକାଳ 5 ଟା ପର୍ଯ୍ୟନ୍ତ କଟକଣା ଲାଗୁ ରହିବ ।
ଗୁରୁବାର ଗୋଟିଏ ଦିନରେ 230 ନୂତନ ସଂକ୍ରମିତ ଚିହ୍ନଟ ହୋଇଥିଲା । ଯାହାକୁ ନଜରରେ ରଖି ମୁଖ୍ୟମନ୍ତ୍ରୀ ଅମୃତସରରେ ନାଇଟ କର୍ଫ୍ୟୁ ଘୋଷଣା କରିଥିଲେ । ସେପଟେ, ପଞ୍ଜାବରେ ରାତି 11 ପରିବର୍ତ୍ତେ 9 ଟାରୁ କଟକଣା ଆରମ୍ଭ ହୋଇଛି । ଜଳନ୍ଧର ଓ ଲୁଧିୟାନା ଜିଲ୍ଲାପାଳ ରାତ୍ରୀକାଳୀନ କର୍ଫ୍ୟୁ ଘୋଷଣା କରିଛନ୍ତି । ହୋଲି ପୂର୍ବରୁ ସଂକ୍ରମଣ ବୃଦ୍ଧି ବ୍ୟବସାୟ ଘାଟା ସାବ୍ୟସ୍ତ ହୋଇପାରେ ବୋଲି ଆଶଙ୍କା କରିଛନ୍ତି ବ୍ୟବସାୟୀ ।
ସୂଚନାଯୋଗ୍ୟ, ଗୁରୁବାର ଗୋଟିଏ ଦିନରେ ପଞ୍ଜାବରେ 2387 ନୂତନ କୋଭିଡ ପଜିଟିଭ ରିପୋର୍ଟ ଆସିଛି । ମୋଟ ସଂକ୍ରମିତ ସଂଖ୍ୟା ଏବେ 2,05,418ରେ ପହଞ୍ଚିଛି । ଗୁରୁବାର 25 ହଜାର 833 ଜଣ ସଂକ୍ରମିତ ହୋଇଛନ୍ତି । ନଭେମ୍ବର ପର ଠାରୁ ଏହା ଦେଶର ସର୍ବାଧିକ ସଂକ୍ରମଣ ମାମଲା ଚିହ୍ନଟ ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
