ନୂଆଦିଲ୍ଲୀ: କଂଗ୍ରେସରେ ହାଇକମାଣ୍ଡ ପରିବର୍ତ୍ତନ ହେବା ପରେ ଆଜି ଦଳର ସାଙ୍ଗଠନିକ ଋପରେଖ ମଧ୍ୟ ବଦଳିଛି । ନୂତନ ଅଧ୍ୟକ୍ଷ ମଲ୍ଲିକାର୍ଜୁନ ଖାଡଗେ 47 ସଦସ୍ୟ ବିଶିଷ୍ଟ ଷ୍ଟିୟରିଂ କମିଟି (congress new Steering Committee) ଗଠନ କରିଛନ୍ତି । ଏହି ନବଗଠିତ କମିଟିରେ ରହିଛନ୍ତି ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂ, ପୂର୍ବତନ ପାର୍ଟି ହାଇକମାଣ୍ଡ ସୋନିଆ ଗାନ୍ଧୀ, ସାଂସଦ ରାହୁଲ ଗାନ୍ଧୀ ଏବଂ ଦଳର ଅନ୍ୟ ବରିଷ୍ଠ ନେତା । ଏହି କମିଟି କଂଗ୍ରେସର ଓ୍ବାର୍କିଂ କମିଟି ସ୍ଥାନରେ କାର୍ଯ୍ୟ କରିବ । ତେବେ ଏହ କମିଟିରେ ମୋଟ 47 ସଦସ୍ୟ ଥିଲେ ସୁଦ୍ଧା ଶଶୀ ଥରୁରଙ୍କୁ ସ୍ଥାନ ଦେଇନି ଦଳ ।
ନୂତନ କଂଗ୍ରେସ ସଭାପତି ଭାବରେ ଦାୟିତ୍ବ ଗ୍ରହଣ କରିବାର କିଛି ଘଣ୍ଟା ପରେ ମଲ୍ଲିକାର୍ଜୁନ ଖାଡଗେ ଆଜି (ବୁଧବାର) ନିଜର 47 ଜଣିଆ ନୂଆ ଟିମ ଗଠନ କରିଛନ୍ତି । ଏହି କମିଟି ଦଳର ସର୍ବୋଚ୍ଚ ନିଷ୍ପତ୍ତି ଗ୍ରହଣକାରୀ ଅଙ୍ଗ ଭାବେ କାର୍ଯ୍ୟ କରିବାକୁ ଯାଉଛି । ବର୍ତ୍ତମାନର କେନ୍ଦ୍ରୀୟ କାର୍ଯ୍ୟକାରୀ କମିଟି (CWC) ପରିବର୍ତ୍ତେ ଏହି କମିଟି ହିଁ ସମସ୍ତ ନିର୍ଣ୍ଣୟ ଗ୍ରହଣ କରିବ । ଏକ ନୂତନ କେନ୍ଦ୍ରୀୟ କାର୍ଯ୍ୟକାରୀ କମିଟି (CWC) ଗଠନ ହେବା ପର୍ଯ୍ୟନ୍ତ ଗଠନ ଏହି କମିଟି ହିଁ ସମସ୍ତ ଶୀର୍ଷ ନିଷ୍ପତ୍ତି ଗ୍ରହଣ କରିବ ।
ଖାଡଗେଙ୍କ ଦ୍ବାରା ନବଗଠିତ ଏହି କମିଟିରେ ପୂର୍ବତନ ହାଇକମାଣ୍ଡ ସୋନିଆ ଗାନ୍ଧୀ, ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂ ଏବଂ ସାଂସଦ ରାହୁଲ ଗାନ୍ଧୀଙ୍କ ସମେତ କଂଗ୍ରେସର ଅନେକ ବରିଷ୍ଠ ନେତା ରହିଛନ୍ତି । ସେହିପରି କମିଟିରେ ଅନ୍ୟମାନଙ୍କ ମଧ୍ୟରେ ଦଳର ମହାସଚିବ ପ୍ରିୟଙ୍କା ଗାନ୍ଧୀ, ବରିଷ୍ଠ ନେତା ପି ଚିଦାମ୍ବରମ୍, ରଣଦୀପ ସୂର୍ୟେୱାଲା, ଅଧୀର ରଞ୍ଜନ ଚୌଧୁରୀ, ଏ.କେ ଆଣ୍ଟୋନି, ଅଭିଷେକ ମନୁ ସିଂଭି, ଅଜୟ ମାକନଙ୍କ ପରି ନେତା ରହିଛନ୍ତି । ତେବେ ନିକଟରେ ଦଳର ହାଇକମାଣ୍ଡ ପଦବୀ ପାଇଁ ଖାଡଗେଙ୍କ ସହ ନିର୍ବାଚନରେ ପ୍ରତିଦ୍ବନ୍ଦ୍ବିତା କରି ପରାଜିତ ହୋଇଥିବା ଅନ୍ୟତମ ବରିଷ୍ଠ ନେତା ଶଶୀ ଥରୁରଙ୍କୁ କମିଟିରେ ସ୍ଥାନ ନମିଳିବାକୁ ନେଇ ମଧ୍ୟ ଚର୍ଚ୍ଚା ଆରମ୍ଭ ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
