ହ୍ରାଇଦ୍ରାବାଦ: ତେଲେଙ୍ଗାନା ବିଧାନସଭା ନିର୍ବାଚନ ଟ୍ରେଣ୍ଡକୁ ନେଇ ଆକ୍ଟିଭ ମୋଡରେ କଂଗ୍ରେସ ହାଇକମାଣ୍ଡ । ତେଲେଙ୍ଗାନା ଷ୍ଟ୍ରାଟେଜି ପଡ଼ୋଶୀ ଓଡ଼ିଶାରେ ପ୍ରୟୋଗ କରିବାକୁ ବିଚାର କରୁଛି ଗ୍ରାଣ୍ଡ ଓଲ୍ଡ ପାର୍ଟି। ଓଡ଼ିଶାରେ ତୃତୀୟ ସ୍ଥାନରେ ରହିଛି କଂଗ୍ରେସ । ଦଳକୁ ତୃଣମୂଳ ସ୍ତରରୁ ମଜଭୁତ କରିବାକୁ ବଡ଼ ଯୋଜନା କରୁଛନ୍ତି କେନ୍ଦ୍ରୀୟ ନେତୃତ୍ବ । ମିଳିଥିବା ସୂଚନା ଅନୁସାରେ ପଶ୍ଚିମ ଓଡ଼ିଶାରୁ ପ୍ରଚାର ଅଭିଯାନ ଆରମ୍ଭ କରିବ ଦଳ । ଚଳିତ ମାସ ଓଡ଼ିଶା ଆସିବେ କଂଗ୍ରେସ ଯୁବରାଜ ରାହୁଲ ଗାନ୍ଧି, ଭଉଣୀ ପ୍ରିୟଙ୍କା ଗାନ୍ଧି ଭଦ୍ରା ଏବଂ କଂଗ୍ରେସ ହାଇକମାଣ୍ଡ ମଲିକାର୍ଜୁନ ଖଡ଼ଗେ । ଏହି ସୂଚନା ଦେଇଛନ୍ତି ଓଡ଼ିଶା କଂଗ୍ରେସ ପ୍ରଭାରୀ ଚେଲ୍ଲା କୁମାର ।
ଚେଲ୍ଲା କୁମାର ସୂଚନା ଦେଇଛନ୍ତି ଯେ, ତେଲେଙ୍ଗାନାରେ କଂଗ୍ରେସ ପାଇଁ ପ୍ରଚାର ମୈଦାନକୁ ଓହ୍ଲାଇଥିଲେ ରାହୁଲ, ପ୍ରିୟଙ୍କା ଏବଂ ଖଡ଼ଗେ । ସେମାନଙ୍କ କ୍ୟାମ୍ପେନ ପ୍ରଭାବରେ ତେଲେଙ୍ଗାନାରେ ଦଳ ଭଲ ପ୍ରଦର୍ଶନ ସହ କ୍ଷମତାକୁ ଫେରିବାର ଯଥେଷ୍ଟ ସମ୍ଭାବନା ରହିଛି। ଯଦି କଂଗ୍ରେସ ପାର୍ଟି ତେଲେଙ୍ଗାନାରେ କ୍ଷମତାକୁ ଫେରେ, ଏହାର ସୁଦୂରପ୍ରସାରୀ ପ୍ରଭାବ ପଡ଼ୋଶୀ ଓଡ଼ିଶା ସମେତ ବିଭିନ୍ନ ରାଜ୍ୟରେ ପଡ଼ିବ । ଓଡ଼ିଶାରେ କଂଗ୍ରେସ ସଂଠନ ସଶକ୍ତ ହେବା ସହ ଶକ୍ତିଶାଳୀ ହେବ । ଆମେ ଅଧିକ ପରିଶ୍ରମ ଏବଂ ଆକ୍ରମଣାତ୍ମକ ଅଭିଯାନ ଆରମ୍ଭ କରିପାରିଲେ, ଓଡ଼ିଶାରେ କଂଗ୍ରେସ ଭବିଷ୍ୟତ ନିଶ୍ଚିତ ଭାବେ ଉଜ୍ଜ୍ବଳ ହେବ।
ଚେଲ୍ଲା କୁମାରଙ୍କ ସୂଚନା ଅନୁସାରେ, ଚଳିତ ଡିସେମ୍ବରରେ ପଶ୍ଚିମ ଓଡ଼ିଶାରେ କଂଗ୍ରେସ ପାର୍ଟି ମେଗା ର୍ୟାଲି ଏବଂ ଜନସଭା କରିବ । ରାହୁଲ ଗାନ୍ଧି ଏହି ର୍ୟାଲିକୁ ସମ୍ବୋଧିତ କରିବେ । ରାହୁଲଙ୍କ ଜନସଭା କୋରାପୁଟ କିମ୍ବା ପାଖାପାଖି ଅଞ୍ଚଳରେ ଆୟୋଜନ କରାଯିବ । ସେହିପରି କଂଗ୍ରେସ ହାଇକମାଣ୍ଡ ମଲିକାର୍ଜୁନ ଖଡ଼ଗେ ଏବଂ ପ୍ରିୟଙ୍କା ଗାନ୍ଧି ଭଦ୍ରା ପୃଥକ ର୍ୟାଲି କରିବା ପାଇଁ ସେମାନଙ୍କୁ ଅନୁରୋଧ କରାଯାଇଛି । ଚଳିତ ମାସରେ କଂଗ୍ରେସର ଏହି ତିନି ଜଣ ଷ୍ଟାର୍ ପ୍ରଚାରକ ଓଡ଼ିଶା ଆସିବାର କାର୍ଯ୍ୟକ୍ରମ ରହିଛି। ଆଉ ଏହା ଓଡ଼ିଶାରେ କଂଗ୍ରେସ ପାର୍ଟି ପକ୍ଷରୁ ବଡ଼ ଶୁଭାରମ୍ଭ ହେବ ବୋଲି ଚେଲ୍ଲା କୁମାର କହିଛନ୍ତି ।
ପୁରୀରେ ତୁଳସୀ ଯାତ୍ରା ଆୟୋଜନ କରି, ରାଜ୍ୟ ସରକାରଙ୍କ ବିରୋଧରେ ବିଷ ଉଗାଳି ସାରିଛି କଂଗ୍ରେସ ପାର୍ଟି । ଆଗକୁ ବିଭିନ୍ନ ପ୍ରସଙ୍ଗରେ ବିଭିନ୍ନ ସ୍ଥାନରେ ବିରୋଧ ପ୍ରଦର୍ଶନ କରିବ ଦଳ । ଚେଲ୍ଲା କୁମାର କହିଛନ୍ତି ଯେ, ଓଡ଼ିଶା ମୁଖ୍ୟମନ୍ତ୍ରୀ, ରାଜ୍ୟରେ ସରକାର ଚଳାଇବା ପାଇଁ କିଛି ପ୍ରାଶାସନିକ ଅଧିକାରୀଙ୍କ ଉପରେ ନିର୍ଭରଶୀଳ । ଜିଲ୍ଲା ଏବଂ ତହସିଲ ସ୍ତରୀୟ ସରକାରୀ ଅଧିକାରୀମାନେ ଶାସକ ଦଳ ବିଜେଡିର କାର୍ଯ୍ୟକର୍ତ୍ତା ଭଳି ବ୍ୟବହାର କରୁଛନ୍ତି । ଫଳରେ ରାଜ୍ୟରେ ବିକାଶମୂଳକ କାର୍ଯ୍ୟ ବାଧାପ୍ରାପ୍ତ ହେଉଛି । କଂଗ୍ରେସ ପାର୍ଟି ଏହାକୁ ଜୋରଦାର ବିରୋଧ କରୁଛି ବୋଲି କହିଛନ୍ତି ଚେଲ୍ଲା କୁମାର।
ଓଡ଼ିଶାରେ କଂଗ୍ରେସ ଦଳକୁ ସଶକ୍ତ କରିବା ପ୍ରସଙ୍ଗରେ ଚେଲ୍ଲା କୁମାର ସୂଚନା ଦେଇଛନ୍ତି ଯେ, ରାଜ୍ୟ ଦଳୀୟ ନେତୃତ୍ବ ପରିବର୍ତ୍ତନ କରିବା ସମାଧାନର ବାଟ ନୁହେଁ । ସନ୍ତୁଳନ ଫେରାଇ ଆଣିବା ଏବଂ ଚାଷୀଙ୍କୁ ସଶକ୍ତ କରିବା ପାଇଁ ଆମେ ନିକଟରେ ଅଧିକୃତ ଜମିକୁ ଚାଷୀଙ୍କୁ ଫେରାଇବା ପାଇଁ ଆନ୍ଦୋଳନ ଆରମ୍ଭ କରିଛୁ । ଆମକୁ ଏହିପରି ଅଧିକ କାର୍ଯ୍ୟକ୍ରମ କରିବାକୁ ପଡ଼ିବ | ଏନେଇ କଂଗ୍ରେସ ଅଧ୍ୟକ୍ଷ ଖଡ଼ଗେଙ୍କ ସହ ଆଲୋଚନା କରିଛନ୍ତି ବୋଲି କହିଛନ୍ତି ଚେଲ୍ଲା କୁମାର ।
ବ୍ୟୁରୋ ରିପୋର୍ଟ, ଇଟିଭି ଭାରତ
