ବେଙ୍ଗାଲୁରୁ: କେଏସଆରଟିସି ବସ୍ରେ ଯାତ୍ରା କରୁଥିବା ବେଳେ ଗର୍ଭବତୀଙ୍କ ଆରମ୍ଭ ହୋଇଥିଲା ପ୍ରସବ ଯନ୍ତ୍ରଣା । ମହିଳାଙ୍କ ଯନ୍ତ୍ରଣା ଦେଖି ମହିଳା ବସ୍ କଣ୍ଡକ୍ଟର ଶିଶୁକୁ ଜନ୍ମ କରିବାରେ ସାହାଯ୍ୟ କରିଛନ୍ତି । ଫଳରେ ଗର୍ଭବତୀ ଜଣକ ସୁରକ୍ଷିତ ଭାବରେ ନବଜାତକୁ ଜନ୍ମ ଦେଇଛନ୍ତି । ଡେଲିଭରୀ ପରେ ମହିଳା ଜଣଙ୍କୁ ଆମ୍ବୁଲାନ୍ସ ଯୋଗେ ଶାନ୍ତିଗ୍ରାମ ଡାକ୍ତରଖାନାରେ ଭର୍ତ୍ତି କରାଯାଇଥିବା ବେଳେ ଉଭୟ ମା' ଓ ଶିଶୁ ସୁସ୍ଥ ଥିବା ଜଣାପଡିଛି ।
ତେବେ ସୂଚନା ମୁତାବକ, ଚିକ୍କମାଗାଲୁରୁ ୟୁନିଟ୍ ଗାଡି ନମ୍ବର KA-18 ସୋମବାର ଅପରାହ୍ନ 1.25 ସମୟରେ ବେଙ୍ଗାଲୁରୁ-ଚିକ୍କାମାଲୁରୁ ମାର୍ଗ ମଧ୍ୟରେ ଯାତ୍ରା କରୁଥିଲା | ସେହି ବସ୍ରେ ସମୁଦାୟ 45 ଜଣ ଯାତ୍ରୀ ଯାତ୍ରା କରୁଥିଲେ । ସେଥି ମଧ୍ୟରୁ ଜଣେ ଗର୍ଭବତୀ ବେଙ୍ଗାଲୁରୁରୁ ବେଲୁର ଯାତ୍ରା କରୁଥିବା ସମୟରେ ତାଙ୍କର ପ୍ରସବ ଯନ୍ତ୍ରଣା ଆରମ୍ଭ ହୋଇଥିଲା, ନିକଟରେ କୌଣସି ଡାକ୍ତରଖାନା ମଧ୍ୟ ନଥିଲା । ଏହାପରେ ବସ୍ର ମହିଳା କଣ୍ଡକ୍ଟର ଗାଡିକୁ ଅଟକାଇଥିଲେ । ଏଥିସହ ବସ୍ରେ ଯାତ୍ରା କରୁଥିବା ସମସ୍ତ ଯାତ୍ରୀଙ୍କୁ ଗାଡିରୁ ବାହାରକୁ ଯିବାକୁ କହି ଯନ୍ତ୍ରଣାରେ ଛଟପଟ ହେଉଥିବା ମହିଳାଙ୍କ ପ୍ରସବ କରାଇଥିଲେ ।
ଏହା ମଧ୍ୟ ପଢନ୍ତୁ- BSKYରେ ୬୮୧ ସୁପର ସ୍ପେଶାଲିଟି ହସ୍ପିଟାଲ ସାମିଲ, ୬୬୮ ଫ୍ରଣ୍ଟଲାଇନ କର୍ମଚାରୀ ନିୟୋଜିତ
ବସ୍ କଣ୍ଡକ୍ଟର ନିଜେ ବସ୍ରେ ଡେଲିଭରି କରାଇଥିବା ବେଳେ ମହିଳା ଜଣକ ଏକ ଶିଶୁ କନ୍ୟାକୁ ଜନ୍ମ ଦେଇଥିଲେ । ଉଭୟ ମା ଏବଂ ଶିଶୁ ଏବେ ସୁସ୍ଥ ଥିବା ଜଣାପଡିଛି । ତେବେ ଗର୍ଭବତୀଙ୍କ ପରିବାର ସଦସ୍ୟ ଆର୍ଥିକ ଦୃଷ୍ଟିରୁ ଦୁର୍ବଳ । ଏଣୁ ସେ କୌଣସି ଘରୋଇ କାର କିମ୍ବା ଆମ୍ବୁଲାନ୍ସରେ ଡାକ୍ତରଖାନା ଯାଇପାରି ନଥିଲେ । ତେଣୁ KSRTC ବସ୍ ଯୋଗେ ଯାତ୍ରା କରୁଥିଲେ । ତେବେ ଏନେଇ ବସ୍ର ଡ୍ରାଇଭର ଏବଂ କଣ୍ଡକ୍ଟର ଯାତ୍ରୀଙ୍କଠାରୁ ଟଙ୍କା ସଂଗ୍ରହ କରି ଆର୍ଥିକ ସହାୟତା ବାବଦରେ ମହିଳାଙ୍କୁ 1,500 ଟଙ୍କା ଦେଇଥିଲେ । ପରେ ମହିଳାଙ୍କୁ ଚିକିତ୍ସା ପାଇଁ ଆମ୍ବୁଲାନ୍ସ ଯୋଗେ ଶାନ୍ତିଗ୍ରାମ ଡାକ୍ତରଖାନାରେ ଭର୍ତ୍ତି କରାଯାଇଥିଲା ।
ଏହା ମଧ୍ୟ ପଢନ୍ତୁ-RozgarMela2023: ପଞ୍ଚମ ପର୍ଯ୍ୟାୟରେ ୪୭୩ ଜଣଙ୍କୁ ନିଯୁକ୍ତି ପତ୍ର ଦେଲେ କେନ୍ଦ୍ରମନ୍ତ୍ରୀ
ଏହାକୁ ନେଇ କର୍ଣ୍ଣାଟକ ରାଜ୍ୟ ସଡକ ପରିବହନ କମିଶନର କହିଛନ୍ତି ଯେ, ମହିଳା ଏବଂ ଶିଶୁ ଉଭୟ ସୁସ୍ଥ ଅଛନ୍ତି । ଗର୍ଭବତୀଙ୍କ ପ୍ରସବ ଯନ୍ତ୍ରଣା ଆରମ୍ଭ ହେବାପରେ ଠିକ ସମୟରେ ସୁରକ୍ଷିତ ଭାବରେ ଡେଲିଭେରୀ କରାଇବା ପ୍ରକୃତରେ ପ୍ରଶଂସନୀୟ । ଏନେଇ କର୍ଣ୍ଣାଟକ ରାଜ୍ୟ ସଡକ ପରିବହନ ନିଗମର କର୍ମଚାରୀ ତଥା କମିଶନର ମହିଳା କଣ୍ଡକ୍ଟରଙ୍କ କାର୍ଯ୍ୟ ପାଇଁ କୃତଜ୍ଞତା ଜଣାଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
