ଚେନ୍ନାଇ: ମେଡିସିନ ଖାଇ ଓଜନ ହ୍ରାସ(weight loss tablet) ପ୍ରୟାସ କରିବା ପଡିଲା ମହଙ୍ଗା । ଅକାଳରେ ଚଲିଗଲା 20 ବର୍ଷର ଯୁବକର ଜୀବନ । 20 ବର୍ଷର ଯୁବକଙ୍କ ଶରୀରର ଓଜନ କମାଇବା ପାଇଁ ବ୍ୟବହାର କରୁଥିବା ଔଷଧ ସାଜିଲା କାଳ। ଚେନ୍ନାଇର କାଞ୍ଚିପୁରମର ପଡପ୍ପାଇରେ ଏପରି ଘଟଣା ଦେଖିବାକୁ ମିଳିଛି ।
ମୃତକଙ୍କ ପିତା ପାଲାୟାମଙ୍କ ଅଭିଯୋଗକୁ ଆଧାର କରି ପୋଲିସ ଅପମୃତ୍ୟୁ ମାମଲା ରୁଜୁ କରିଛି । ପାଲାୟାମଙ୍କ କହିବା ଅନୁଯାୟୀ ତାଙ୍କ 20 ବର୍ଷର ପୁଅ ସୂରିୟା କଲେଜରୁ ସ୍ନାତକ ଡିଗ୍ରୀ ପାଇବା ପରେ,ଏକ ସ୍ଥାନୀୟ ଦୁଗ୍ଧ କମ୍ପାନୀରେ କ୍ଷୀର ଡେଲିଭରୀ ବୟେ ଭାବେ କାର୍ଯ୍ୟ କରୁଥିଲା । ତେବେ ସୂରିୟାର ଓଜନ ଅଧିକ ଥିବାରୁ ସାଙ୍ଗାସାଥି ଏବଂ ସାହି ପଡି଼ଶାଙ୍କ ଦ୍ବାରା ଥଟ୍ଟା ପରିହାସର ଶୀକାର ହେବାକୁ ପଡୁଥିଲା ।
ଥଟ୍ଟା ତାମସାରୁ ବିରକ୍ତ ହୋଇ ଓଜନ ହ୍ରାସ କରିବା ପାଇଁ ଡାକ୍ତରୀ ପରାମର୍ଶ କରୁଥିବା ବେଳେ, ସେ ଏକ ଅନଲାଇନ ସାଇଟ୍ରୁ ଓଡନ ହ୍ରାସ କରିବା ମେଡିସିନ କିଣି ଖାଇଥିଲେ । ତେବେ ମେଡିସିନ ଖାଇବା ଦ୍ବାରା ତାଙ୍କ ଓଜନ ହ୍ରାସ ପାଇଥିବା ସାଙ୍ଗାମାନଙ୍କୁ ଜଣାଇଥିଲା ସୂରିୟା।
ସେ ଗତ ଡିସେମ୍ବର 22ରେ ମେଡିସିନ ଖାଇବା ଆରମ୍ଭ କରିଥିବା ବେଳେ 10 ଦିନ ନଧ୍ୟରେ ଓଜନ ହ୍ରାସ ପାଇବା ନେଇ କମ୍ପାନୀ ପ୍ରତିଶୃତି ଦେଇଥିଲା । ମେଡିସିନର ବହୁଳ ବ୍ୟବହାର ଏବଂ ସ୍ବଳ୍ପ ଖାଦ୍ୟ କାରଣରୁ ପରବର୍ତ୍ତୀ ସମୟରେ ରକ୍ତହୀନତା କାରଣରୁ ସୂରିୟା ଦୁର୍ବଳ ହୋଇପଡିଥିଲା । ଏହାକୁ ନେଇ ପୋଲିସ ସୂଚନା ଦେଇଛି ।
ଗତ ଜାନୁଆରୀ ୧ ତାରିଖରେ ସୂରିୟାର ସ୍ବାସ୍ଥ୍ୟାବସ୍ଥା ବିଗାଡିବାରୁ ତାଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ପରେ ଅବସ୍ଥା ଗୁରୁତର ହେବାରୁ ତାଙ୍କୁ ଚେନ୍ନାଇସ୍ଥିତ ରାଜୀବ ଗାନ୍ଧୀ ସରକାରୀ ଡାକ୍ତରଖାନାକୁ ପଠାଯାଇଥିଲା । ସେଠାରେ ସୂରିୟାଙ୍କ ସ୍ବାସ୍ଥ୍ୟାବସ୍ଥା ସୁଧୁରିବା ପରିବର୍ତ୍ତେ ଅଧିକ ବିଗିଡ଼ି ଯାଇଥିବା ଡାକ୍ତର ସୂଚନା ଦେଇଥିଲେ । ଗତ ବୁଧବାର ସକାଳେ ଚିକିତ୍ସାଧୀନ ଅବସ୍ଥାରେ ସୂରିୟାଙ୍କ ମୃତ୍ୟୁ ଘଟିଥିବା ଡାକ୍ତର ସୂଚନା ଦେଇଥିଲେ ।
ମୃତକଙ୍କ ପିତା ପାଲାୟାମଙ୍କ ଅଭିଯୋଗକୁ ଆଧାର କରି ପୋଲିସ ଏକ ଅପମୃତ୍ୟୁ ମାମଲା ରୁଜୁ କରିଥିବା ବେଳେ ମୃତଦେହକୁ ପୋଷ୍ଟମର୍ଟମ ପାଇଁ ପଠାଇଛି । ସୂରିୟାର ମୃତ୍ୟୁ ମେଡିସିନ ଖାଇବା ଦ୍ବାରା ହୋଇଛି ନା ଏହା ପଛରେ ଅନ୍ୟ କିଛି କାରଣ ରହିଛି ତାହାର ତଦନ୍ତ କରୁଛି ପୋଲିସ । ସୂରିୟାର ମୃତ୍ୟୁକୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି ।
ଫିଟ୍ ରହିବା । ସୁନ୍ଦର ଦେଖାଯିବାକୁ ପ୍ରତ୍ୟେକଙ୍କ ଇଚ୍ଛା ଥାଏ । ବିଶେଷ କରି ଆଜିକାଲିର ଯୁବପିଢି ସୁନ୍ଦର ଦେଖାଯିବା ପାଇଁ ଅନେକ ଉପାୟ କରୁଛନ୍ତି । କିନ୍ତୁ ଶରୀରର ଓଜନ ହ୍ରାସ କରିବା ପାଇଁ, ବିନା ଡାକ୍ତରଙ୍କ ପରାମର୍ଶରେ କୌଣସି ବି ମେଡିସିନ ଖାଇବା ଅନୁଚିତ । ଡାକ୍ତରଙ୍କ ପରାମର୍ଶ ବିନା କୌଣସି ମେଡିସିନ ବ୍ୟବହାର କରିବା ସ୍ବାସ୍ଥ୍ୟ ପ୍ରତି ବିପଦ ସୃଷ୍ଟି କରିପାରେ ।
ବ୍ୟୁରୋ ରିପୋର୍ଟ, ଇଟିଭି
