ନୂଆଦିଲ୍ଲୀ: ବହୁଚର୍ଚ୍ଚିତ କ୍ୟାସ ଫର କ୍ବାରୀ ମାମଲାରେ ଆଜି ସଂସଦ ଏଥିକ୍ସ କମିଟି ଟିଏମସି ସାଂସଦ ମହୁଆ ମୋଇତ୍ରାଙ୍କ ବିରୋଧରେ ଡ୍ରାଫ୍ଚ ଗୃହୀତ କରିଛି । ସୂତ୍ରରୁ ମିଳିଥିବା ସୂଚନା ଅନୁସାରେ, ମହୁଆଙ୍କର ସାଂସଦ ଲଗଇନ ଡିଟେଲ୍ସ ବ୍ୟବହାର କରାଯାଇ UAE ରୁ 47 ଥର ସଂସଦ ଓ୍ବେବସାଇଟରେ ଲଗଇନ୍ କରାଯାଇଥିବା ଏଥିକ୍ସ କମିଟି ନିଜ ଡ୍ରାଫ୍ଟରେ ଦର୍ଶାଇଛି । ବିଦେଶରେ ଏହି ଲଗଇନ ଅନଧିକୃତ ବ୍ୟକ୍ତିଙ୍କ ଦ୍ବାରା କରାଯାଇଛି । ତେଣୁ ଏହା ମହୁଆଙ୍କର ଅନୈତିକ ଆଚରଣ ବୋଲି କମିଟି ରିପୋର୍ଟରେ ଦର୍ଶାଇଛି । ଆଜି ଏହି ଡ୍ରାଫ୍ଟ 6-4 ଆନୁପାତିକ ବହୁମତରେ ଗୃହୀତ ହୋଇଛି । 6 ଜଣ ସଦସ୍ୟ ମହୁଆଙ୍କ ବିରୋଧରେ ଆଗତ ଡ୍ରାଫ୍ଟକୁ ସମର୍ଥନ କରିଥିଲେ । ଏମାନଙ୍କ ମଧ୍ୟରେ କଂଗ୍ରେସ ସାଂସଦ ପରିଣିତି କୌର ମଧ୍ୟ ରହିଛନ୍ତି ।
ସେହିପରି ପ୍ୟାନେଲର ଅନ୍ୟ 4 ସଦସ୍ୟ ଏହି ଡ୍ରାଫ୍ଟକୁୁ ନେଇ ଆପତ୍ତି ଉଠାଇବା ତଦନ୍ତ ପ୍ରକ୍ରିୟାରେ ନିରପେକ୍ଷତା ନଥିବା ଅଭିଯୋଗ କରିଥିଲେ । ସେମାନେ ଏହି ମାମଲା ସହ ଅଭିଯୋଗ ପରିସରରେ ଥିବା ଶିଳ୍ପପତି ଦର୍ଶନ ହୀରାନନ୍ଦାନୀଙ୍କୁ ସମନ କରିବା ପାଇଁ ଦାବି କରିଥିଲେ । ଏହା ସହ ପ୍ୟାନେଲର ସଦସ୍ୟ ଥିବା ଅନ୍ୟତମ ବିରୋଧୀ ସାଂସଦ ଡାନିଶ ଅଲ୍ଲୀ ମଧ୍ୟ ପ୍ୟାନେଲ ପ୍ରୋସିଡିଂ ଅଧ୍ୟକ୍ଷ ସୋନକାର ଓ ଅନ୍ୟ ବିଜେପି ସଦସ୍ୟଙ୍କ ଦ୍ବାରା ଲିକ ହୋଇଥିବା ଅଭିଯୋଗ କରିଛନ୍ତି ।
ତେବେ ଡ୍ରାଫ୍ଟ ରିପୋର୍ଟରେ ଉଲ୍ଲେଖ ଥିବା ତଥ୍ୟ ସମ୍ପର୍କରେ ସୂତ୍ରରୁ ମିଳିଥିବା ସୂଚନା ଅନୁସାରେ, ମହୁଆ ବର୍ଷ 2019 ରୁ 2023 ମଧ୍ୟରେ 4 ଥର ୟୁଏଇ ଗସ୍ତ କରିଛନ୍ତି । ତାଙ୍କ ଲଗଇନ ୟୁଜର ଆଇଡି ଓ ପାସଓ୍ବାର୍ଡ ପ୍ରାୟ 47 ଥର ସେଠାରୁ ବ୍ୟବହାର ହୋଇଛି । ଯାହା ଅନଧିକୃତ ବ୍ୟବହାରକାରୀଙ୍କ ଦ୍ବାରା କରାଯାଇଛି । ଡ୍ରାଫ୍ଟ ସମ୍ପର୍କରେ କମିଟି ଅଧ୍ୟକ୍ଷ ବିନୋଦ ସୋନକାର କହିଛନ୍ତି, ଏହି ଡ୍ରାଫ୍ଟ ଆସନ୍ତାକାଲି (ଶୁକ୍ରବାର) ଲୋକସଭା ବାଚସ୍ପତି ଓମ ବିର୍ଲାଙ୍କ ନିକଟରେ ଦାଖଲ କରାଯିବ । କମିଟିର ସୁପାରିଶ ଉପରେ ବାଚସ୍ପତି ବିଚାର କରି କାର୍ଯ୍ୟାନୁଷ୍ଠାନ ସମ୍ପର୍କରେ ଚୂଡାନ୍ତ ନିଷ୍ପତ୍ତି ଗ୍ରହଣ କରିବେ ।
ତେବେ ଏହି ମାମଲାରେ ପ୍ରଥମେ ପ୍ରଥମେ ବିଜେପି ସାଂସଦ ନିଶିକାନ୍ତ ଦୁବେ ବାଚସ୍ପତି ଓମ ବିର୍ଲାଙ୍କୁ ଚିଠି ଲେଖି କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବି କରିଥିଲେ । ପରେ ଏହି ମାମଲା ଏଥିକ୍ସ କମିଟି ତଦନ୍ତ ପରିସରକୁ ଆସିଥିଲା । ଅନ୍ୟ ଏକ ରୋଚକ କଥା ହେଉଛି, ଅଭିଯୋଗକାରୀ ବିଜେପି ସାଂସଦ ନିଶିକାନ୍ତ ଦୁବେ, ଆଇନଜୀବୀ ଜୟଅନନ୍ତ ଦେହାଦ୍ରାଇ ଓ ସାଂସଦ ମହୁଆ ମୋଇତ୍ରା ଏଥିକ୍ସ କମିଟିରେ ହାଜର ହୋଇ ସାରିଥିବା ବେଳେ ଶିଳ୍ପପତି ଦର୍ଶନ ହୀରାନନ୍ଦାନୀଙ୍କୁ ଏପର୍ଯ୍ୟନ୍ତ ପ୍ୟାନେଲ ସମନ କରିନି । ଯାହାକୁ ନେଇ ବିରୋଧୀ ସଦସ୍ୟ ତଦନ୍ତ ପ୍ରକ୍ରିୟା ଉପରେ ପ୍ରଶ୍ନ ଉଠାଇଛନ୍ତି । ଏବେ ଡ୍ରାଫ୍ଟ ରିପୋର୍ଟ ବାଚସ୍ପତିଙ୍କ ନିକଟରେ ପହଞ୍ଚିବା ପରେ ସେ ହିଁ ମୋଇତ୍ରାଙ୍କ ସଦସ୍ୟତା ରଦ୍ଦ ସମ୍ପର୍କରେ ଚୂଡାନ୍ତ ନିଷ୍ପତ୍ତି ଗ୍ରହଣ କରିବେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
