ଚଣ୍ଡିଗଡ: ପଞ୍ଜାବ ରାଜନୈତିକ ଅସ୍ଥିରତା ମଧ୍ୟରେ ଚର୍ଚ୍ଚା ଏବେ ଅମିରିନ୍ଦର ସିଂଙ୍କ ନୂଆ ପାର୍ଟିକୁ ନେଇ । ଆଗାମୀ କିଛିଦିନ ମଧ୍ୟରେ ଅମରିନ୍ଦର ରାଜ୍ୟରେ ଆଉ ଏକ ନୂଆ ଦଳ ଗଠନ କରିପାରନ୍ତି ବୋଲି ଚର୍ଚ୍ଚା ଜୋର ଧରିଛି । ସେ ଆସନ୍ତା ବିଧାନସଭା ନିର୍ବାଚନ ପୂର୍ବରୁ ଦଳ ଗଠନ କରିବେ ବୋଲି ବିଶେଷ ସୂତ୍ରରୁ ସୂଚନା ମିଳିଛି ।
ସୂତ୍ର ଅନୁଯାୟୀ, ପ୍ରାୟ 12 ଜଣ କଂଗ୍ରେସ ନେତା କ୍ୟାପ୍ଟେନ ଅମରିନ୍ଦର ସିଂଙ୍କ ସହ ଯୋଗାଯୋଗରେ ଅଛନ୍ତି, ଯେଉଁମାନେକି ଅମରିନ୍ଦରଙ୍କ ପରବର୍ତ୍ତୀ ପଦକ୍ଷେପ ନେଇ ତାଙ୍କ ସହ ପରାମର୍ଶ କରୁଛନ୍ତି । ଅମରିନ୍ଦର ସିଂ ମଧ୍ୟ ପଞ୍ଜାବର କିଛି କୃଷକ ନେତାଙ୍କୁ ଭେଟିବାର ସମ୍ଭାବନା ରହିଛି ।
ବୁଧବାର ଅମରିନ୍ଦର ସିଂ ଦିଲ୍ଲୀରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ସହ ସାକ୍ଷାତ କରିବା ପରେ ସେ ବିଜେପିରେ ଯୋଗଦେବା ନେଇ ଚର୍ଚ୍ଚା ଜୋର ଜୋର୍ ଧରିଥିଲା । ମାତ୍ର ଗୁରୁବାର ଏହା ଉପରେ ପୂର୍ଣ୍ଣଚ୍ଛେଦ ପକାଇଛନ୍ତି ଅମରିନ୍ଦର । ସେ ଏନେଇ ସ୍ପଷ୍ଟ କରି କହିଛନ୍ତି ଯେ, 'ମୁଁ ବିଜେପିରେ ଯୋଗ ଦେଉନାହାଁନ୍ତି, କିନ୍ତୁ କଂଗ୍ରେସ ସହିତ ମଧ୍ୟ ନାହିଁ । ମୁଁ କୃଷକ ଆନ୍ଦୋଳନ ବାବଦରେ ଚର୍ଚ୍ଚା କରିବାକୁ ଆସିଥିଲି ।'
ଅମରିନ୍ଦର ସିଂ ଏହା ମଧ୍ୟ କହିଛନ୍ତି ଯେ, ସେ ଆଉ କଂଗ୍ରେସ ଦଳର ଅଂଶ ନୁହଁନ୍ତି ଏବଂ ଆଗାମୀ ପଞ୍ଜାବ ବିଧାନସଭା ନିର୍ବାଚନରେ ନବଜୋତ ସିଂ ସିଦ୍ଧୁ କଦାପି ଜିତି ପାରିବେ ନାହିଁ । ଅମରିନ୍ଦରଙ୍କ ଏପରି ବୟାନ ପରେ ସେ ରାଜ୍ୟରେ ଆଉ ଏକ ଦଳ ଗଠନ କରିବାର ଚର୍ଚ୍ଚା ଅଧିକ ଉଜ୍ଜିବିତ ହୋଇଛି ।
ସୂଚନା ଅନୁଯାୟୀ ଦଳୀୟ ତ୍ରୁଟି ଦର୍ଶାଇ ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ କ୍ୟାପ୍ଟେନ ଅମରିନ୍ଦର ସିଂ ସପ୍ତାହ ତଳେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବା ସହ କଂଗ୍ରେସ ହାତ ଛାଡିଛନ୍ତି । ବର୍ତ୍ତମାନ ସେ ରାଜ୍ୟରେ ଆଉ ଏକ ନୂଆ ଦଳ ଗଠନ କରିପାରନ୍ତି ବୋଲି ଚର୍ଚ୍ଚା ଜୋର ଧରିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
