ନୂଆଦିଲ୍ଲୀ: ବିମାନରେ ତ୍ରୁଟି କାରଣରୁ ଜି20 ସମ୍ମିଳନୀକୁ ଆସି ଫେରି ପାରିନଥିବା କାନାଡା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ଆଜି ସ୍ବଦେଶ ପ୍ରତ୍ୟାବର୍ତ୍ତନ କରିଛନ୍ତି । ଆଜି ଅପରାହ୍ନରେ ସେ ଦିଲ୍ଲୀ ବିମାନ ବନ୍ଦରରୁ କାନାଡା ଅଭିମୁଖେ ଉଡାଣ ଭରିଛନ୍ତି । ତାଙ୍କୁ ଭାରତ ସରକାରଙ୍କ ପକ୍ଷରୁ କେନ୍ଦ୍ର ରାଷ୍ଟ୍ରମନ୍ତ୍ରୀ ରାଜୀବ ଚନ୍ଦ୍ରଶେଖର ବିମାନ ବନ୍ଦରରେ ବିଦାୟ ଜଣାଇଥିଲେ । ଜି20 ରେ ଅଂଶଗ୍ରହଣ କରିବା ପାଇଁ ଭାରତ ଆସିଥିବାରୁ ଜଷ୍ଟିନଙ୍କୁ ଚନ୍ଦ୍ରଶେଖର ପ୍ରଧାନମନ୍ତ୍ରୀଙ୍କ ତରଫରୁ ଧନ୍ୟବାଦ ମଧ୍ୟ ଜଣାଇଥିଲେ । ଏନେଇ ଚନ୍ଦ୍ରଶେଖର ନିଜେ ଟ୍ବିଟ କରି ସୂଚନା ଦେଇଚନ୍ତି । ତେବେ 10 ତାରିଖରୁ ଜି20 ସମ୍ମିଳନୀ ଶେଷ ହୋଇଥିଲେ ବିମାନରେ ଯାନ୍ତ୍ରିକ ତ୍ରୁଟି କାରଣରୁ କାନାଡା ପ୍ରଧାନମନ୍ତ୍ରୀ ଜଷ୍ଟିନ ଫେରିନପାରି ଦିଲ୍ଲୀରେ ରହିଥିଲେ । ସେ ରହୁଥିବା ହୋଟେଲରୁ ମଧ୍ୟ ସରକାରୀ କାର୍ଯ୍ୟରେ ଭର୍ଚ୍ଚୁଆଲି ଯୋଗ ଦେଇଥିଲେ ।
ତେବେ ଆଜି ଅପରାହ୍ନରେ କାନାଡା ପ୍ରଧାନମନ୍ତ୍ରୀଙ୍କ ପ୍ରେସ ସଚିବ, ସେ ଆଜି ସ୍ବଦେଶ ଫେରିବା ନେଇ ସୂଚନା ଦେଇଥିଲେ । ବିମାନର ଯାନ୍ତ୍ରିକ ତ୍ରୁଟି ଠିକ କରାଯାଇ ସାରିଛି । ଆଜି ଜଷ୍ଟିନ କାନାଡା ଫେରିବା ନେଇ ସେ ସୂଚନା ଦେଇଥିଲେ । ତେବେ 10 ତାରିଖରେ ଜି20 ସମ୍ମିଳନୀ ଶେଷ ହେବା ପରେ ସେ କାନାଡା ଫେରିବାର କାର୍ଯ୍ୟକ୍ରମ ଥିଲା । ହେଲେ ବିମାନରେ ଯାନ୍ତ୍ରିକ ତ୍ରୁଟି କାରଣରୁ ସେ ଅଟକି ରହିବା ପରେ ଦିଲ୍ଲୀରୁ ସେ ଅନଲାଇନରେ କାର୍ଯ୍ୟ ଜାରି ରଖିଥିବା କାନାଡାର ଗଣମାଧ୍ୟମରେ ଖବର ପ୍ରକାଶିତ ହୋଇଥିଲା ।
ଏହା ମଧ୍ୟ ପଢନ୍ତୁ :-କାନାଡା ପ୍ରଧାନମନ୍ତ୍ରୀଙ୍କ ବିମାନରେ ଯାନ୍ତ୍ରୀକ ତ୍ରୁଟି, ଭାରତରେ ରହିବେ ଜଷ୍ଟିନ ଟ୍ରୁଡୋ
ଭାରତ ଦ୍ବାରା ଆୟୋଜିତ ହୋଇଥିବା ଜି20 ସମ୍ମିଳନୀରେ ଯୋଗ ଦେବାକୁ ଶୁକ୍ରବାର (8 ତାରିଖ)ରେ ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ ଓ ତାଙ୍କ ପୁଅ ସ୍ବତନ୍ତ୍ର ବିମାନ ଯୋଗେ କାନାଡାରୁ ଆସି ନୂଆଦିଲ୍ଲୀରେ ପହଞ୍ଚିଥିଲେ । ଏହାପରେ 9 ତାରିଖରେ ଆରମ୍ଭ ହୋଇଥିବା ଜି20 ସମ୍ମିଳନୀରେ ଅଂଶ ମଧ୍ୟ ଗ୍ରହଣ କରିଥିଲେ । ବୈଠକରେ ସାମିଲ ହୋଇ ରବିବାର ପ୍ରଧାନମନ୍ତ୍ରୀଙ୍କ ସହ ଆଲୋଚନା କରିଥିଲେ । ଟ୍ରୁଡୋ ଭାରତର ଜି20 ଅଧ୍ୟକ୍ଷତାର ସଫଳତା ପାଇଁ ପ୍ରଧାନମନ୍ତ୍ରୀଙ୍କୁ ଅଭିନନ୍ଦନ ଜଣାଇଥିଲେ। । 10 ରେ ଏହି ଦୁଇ ଦିନିଆ କାର୍ଯ୍ୟକ୍ରମ ଶେଷ ହୋଇସାରିଥିବା ବେଳେ ପ୍ରାୟ ସମସ୍ତ ରାଷ୍ଟ୍ରମୁଖ୍ୟ ସ୍ବଦେଶ ଫେରିସାରିଛନ୍ତି । ବାଇଡେନ 10 ତାରିଖ ଅପରାହ୍ନରେ ଆମେରିକା ଫେରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
