କୋଲକାତା: ପଶ୍ଚିମବଙ୍ଗରେ ମତଦାନ ପରବର୍ତ୍ତୀ ହିଂସାକୁ ନେଇ କୋଲକାତା ହାଇକୋର୍ଟ CBI ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି । ହାଇକୋର୍ଟଙ୍କ ୫ ଜଣିଆ ଖଣ୍ଡପୀଠ ମଙ୍ଗଳବାର ଏହି ନିର୍ଦ୍ଦେଶ ଦେଇଛନ୍ତି । ହତ୍ୟା, ଦୁଷ୍କର୍ମ ଏବଂ ଅସ୍ବାଭାବିକ ମୃତ୍ୟୁ ଭଳି ଗୁରୁତର ଅପରାଧ ଘଟାଇଥିବା ମାମଲାରେ CBI ତଦନ୍ତ କରିବ ବୋଲି ରହିଛି ନିର୍ଦ୍ଦେଶ ।
ଏହି ଘଟଣାକୁ ବାଦ ଦେଇ ଅନ୍ୟ ହିଂସାକାଣ୍ଡକୁ SITର ୩ ଜଣିଆ ଟିମ ଯାଞ୍ଚ କରିବ । ଏହି ଟିମରେ କୋଲକାତା ପୋଲିସ କମିଶନର ସୌମେନ ମିତ୍ର ଓ ରାଜ୍ୟ ପୋଲିସ ନିର୍ଦ୍ଦେଶକ ସୁମନ ବାଲା ସାହୁ ରହିଛନ୍ତି । ଏହାସହିତ ସୁପ୍ରିମକୋର୍ଟର ଅବସରପ୍ରାପ୍ତ ବିଚାରପତିଙ୍କ ସୁପରଭିଜନରେ ଏହି SIT ଟିମ ତଦନ୍ତ କରିବ । ତେବେ ଆସନ୍ତା ୬ ସପ୍ତାହ ମଧ୍ୟରେ ଉଭୟ CBI ଓ SIT ଟିମ ତଦନ୍ତ କରି ରିପୋର୍ଟ ଦାଖଲ କରିବେ ବୋଲି କୋର୍ଟ ନିର୍ଦ୍ଦେଶ ଦେଇଛନ୍ତି । ଏହାପରେ କୋଲକାତା ହାଇକୋର୍ଟର ଏକ ଅଲଗା ବେଞ୍ଚ ମାମଲାର ଶୁଣାଣି କରିବେ ବୋଲି ଜଣାପଡି଼ଛି ।
କୋଲକାତା ହାଇକୋର୍ଟର ୫ ଜଣିଆ ଖଣ୍ଡପୀଠ ଗୁରୁବାର ମତଦାନ ପରବର୍ତ୍ତୀ ହିଂସାର ପୀଡିତଙ୍କୁ ତୁରନ୍ତ କ୍ଷତିପୂରଣ ଦେବା ପାଇଁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି । ହାଇକୋର୍ଟଙ୍କ ଆଦେଶ ଜାତୀୟ ମାନବ ଅଧିକାର ଆୟୋଗ (NHRC) ର କାର୍ଯ୍ୟକୁ ପ୍ରାୟତଃ ସମର୍ଥନ କରିଛି ବୋଲି ଷ୍ଟେଟ ଲିଗାଲ ବ୍ରେନ କହିଛି । ମତଦାନ ପରବର୍ତ୍ତୀ ହିଂସା ପରେ NHRCର ଏକ ଟିମ ଘଟଣାସ୍ଥଳକୁ ଯାଇ ଯାଞ୍ଚ କରିବା ପରେ ଏକ ରିପୋର୍ଟ ଦାଖଲ କରିଥିଲା । ଏହି ରିପୋର୍ଟଟି ରାଜ୍ୟ ସରକାରଙ୍କ ବିପକ୍ଷରେ ଯାଇଥିଲା । ସେପଟେ NHRC ରିପୋର୍ଟରେ ସମ୍ପୂର୍ଣ ପକ୍ଷପାତିତା କରାଯାଇଛି ବୋଲି TMC ଅଭିଯୋଗ କରିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
