ନୂଆଦିଲ୍ଲୀ: ପ୍ରଧାନମନ୍ତ୍ରୀ ଗ୍ରାମ ସଡକ ଯୋଜନା ୧ ଓ ୨ (PMGSY I,PMGSY-II) ଅଧୀନରେ ମାଓବାଦୀ ଅଧ୍ୟୁଷିତ ଅଞ୍ଚଳରେ ସଡକ ସଂଯୋଗ କାର୍ଯ୍ୟ ନିମିତ୍ତ ଅର୍ଥନୈତିକ ବ୍ୟାପାର କମିଟି ମଞ୍ଜୁରୀ ପ୍ରଦାନ କରିଛି । ଏଥିପାଇଁ 2021-22 ରୁ 2024-25 ଅବଧି ମଧ୍ୟରେ 1,12,419 କୋଟି ଟଙ୍କା ରାଜ୍ୟର ଅଂଶ ସହିତ ଏହି ଯୋଜନାରେ ବିନିଯୋଗ କରାଯାଇ ଚାଲିଥିବା ସମସ୍ତ ପ୍ରକଳ୍ପ ସମ୍ପୂର୍ଣ୍ଣ କରାଯିବ । 9 ଟି ରାଜ୍ୟର 44 ଟି ଜିଲ୍ଲାରେ ରହିଥିବା ମାଓବାଦୀ ଅଧ୍ୟୁଷିତ ଅଞ୍ଚଳରେ 2016 ମସିହା ଠାରୁ ଏପର୍ଯ୍ୟନ୍ତ 105 ଟି ପୋଲ ସହିତ 4 ହଜାର 490 କିଲୋମିଟର ସଡକ ନିର୍ମାଣ ଶେଷ ହେଲାଣି ।
ବୁଧବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ କମିଟି ମାଓ ଅଧ୍ୟୁଷିତ ଜିଲ୍ଲା ଗୁଡିକରେ ପ୍ରଧାନମନ୍ତ୍ରୀ ଗ୍ରାମ ସଡକ ଯୋଜନା 1 ଓ 2 କୁ 2022 ସେପ୍ଟେମ୍ବର ମାସ ପର୍ଯ୍ୟନ୍ତ ଚାଲୁ କରିବା ଏବଂ ସଡକ ନିର୍ମାଣ କାର୍ଯ୍ୟ ସରି ନଥିବା ପ୍ରକଳ୍ପ ଗୁଡିକୁ 2023 ମାର୍ଚ୍ଚ ସୁଦ୍ଧା ଶେଷ କରିବା ପାଇଁ ମଞ୍ଜୁରୀ ପ୍ରଦାନ କରିଛି । ଏହି ଯୋଜନା 1 ଅଧୀନରେ ସମତଳ ଅଞ୍ଚଳର 500 ରୁ ଅଧିକ ଜନସଂଖ୍ୟା ବିଶିଷ୍ଟ ସମସ୍ତ ଗ୍ରାମ ଏବଂ ଉତ୍ତର-ପୂର୍ବାଞ୍ଚଳ ତଥା ହିମାଳୟ ଅଞ୍ଚଳରେ 250 ଏବଂ ଅଧିକ ଜନସଂଖ୍ୟା ବିଶିଷ୍ଟ ସମସ୍ତ ଗ୍ରାମକୁ ସଡକ ସଂଯୋଗ କରାଯାଉଛି ।
ସେହିପରି ମାଓ ଅଧ୍ୟୁଷିତ ଅଞ୍ଚଳରେ 100 ରୁ ଅଧିକ ଜନସଂଖ୍ୟା ବିଶିଷ୍ଟ ସମସ୍ତ ଗ୍ରାମକୁ ସଡକ ସଂଯୋଗ କରାଯାଉଛି । ଏହି ଯୋଜନା ଅଧିନରେ 1,88,444 ଟି ଗ୍ରାମକୁ 7 ହଜାର 523 ଟି ପୋଲ ସହିତ 64 ଲକ୍ଷ 45ହଜାର 627 କିଲୋମିଟର ସଡକ ନିର୍ମାଣ କରାଯାଉଛି । ଏ ପର୍ଯ୍ୟନ୍ତ ଏ ଦିଗରେ କାର୍ଯ୍ୟ ସମ୍ପୂର୍ଣ୍ଣ ହେବାକୁ ଆଉ ମାତ୍ର 1 ହଜାର 974 ଟି ପୋଲ ଏବଂ20 ହଜାର 945 କିଲୋମିଟର ରାସ୍ତା ବାକି ରହିଛି ।
