ହାଇଦ୍ରାବାଦ: ମଣିଷ ପାଇଁ ଅମ୍ଳଜାନ ଜରୁରୀ । ତେଣୁ ସମସ୍ତେ ପରିବେଶ ସୁରକ୍ଷା ନେଇ ଯତ୍ନଶୀଳ ହେବାର ଆବଶ୍ୟକତା ରହିଛି । ଏହି ଉତ୍ତରଦାୟିତ୍ବ ଆମ ସମସ୍ତଙ୍କର ରହିବା ଉଚିତ । ଏହି ବାର୍ତ୍ତା ସହିତ ଆଜି ହାଇଦ୍ରାବାଦର ରାମୋଜୀ ଫିଲ୍ମ ସିଟିରେ ବୃକ୍ଷରୋପଣ କରିଛନ୍ତି ବଲିଉଡ ଅଭିନେତା ସଲମାନ ଖାନ । ରାଜ୍ୟସଭା ସାଂସଦ ଯୋଗିନାପଲ୍ଲୀ ସନ୍ତୋଷ କୁମାରଙ୍କ ଦ୍ବାରା ଆରମ୍ଭ ହୋଇଥିବା ଗ୍ରୀନ ଇଣ୍ଡିଆ ଚ୍ଯାଲେଞ୍ଜ (Green India Challenge) ରେ ଅଂଶଗ୍ରହଣ କରିଛନ୍ତି ସଲମାନ ।
ନିଜର ଏକ ଅପକମିଂ ଫିଲ୍ମର ସୁଟିରେ ରାମୋଜୀ ଫିଲ୍ମ ସିଟି ଆସିଥିଲେ ସଲମାନ । ସାଂସଦ ସନ୍ତୋଷ କୁମାର ତାଙ୍କୁ ଏହି ଚ୍ୟାଲେଞ୍ଜରେ ଅଂଶଗ୍ରହଣ କରିବା ପାଇଁ ନିମନ୍ତ୍ରଣ କରିଥିଲେ । ସଲମାନ ଫିଲ୍ମ ସିଟି ପରିସରରେ ଏକ ବୃକ୍ଷ ଲଗାଇବା ସହ ପରିବେଶ ସଚେତନତାର ବାର୍ତ୍ତା ମଧ୍ୟ ବାଣ୍ଟିଥିଲେ । ଆଜିକୁ 5 ବର୍ଷ ପୂର୍ବେ ଏହି ଚ୍ୟାଲେଞ୍ଜର ଆହ୍ବାନ କରିିଥିବା ସାଂସଦ ସନ୍ତୋଷ କୁମାର ବର୍ତ୍ତମାନ ସୁଦ୍ଧା ଦେଶର ବିଭିନ୍ନ ସ୍ଥାନରେ ପ୍ରାୟ 16 କୋଟି ବୃକ୍ଷ ରୋପଣ ମଧ୍ୟ କରି ସାରିଲେଣି । ସଲମାନ ସାଂସଦ ସନ୍ତୋଷଙ୍କ ଏହି ନିଆରା ପ୍ରୟାସକୁ ପ୍ରଶଂସା ମଧ୍ୟ କରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
