ପାଟନା: ବିହାର ଛପରାର ବଡ ଧରଣର ଡଙ୍ଗା ବୁଡି । ଏଥିରେ ଏବେ ସୁଦ୍ଧା 4ଟି ମୃତଦେହ ଉଦ୍ଧାର ହୋଇଥିବା ବେଳେ 14 ରୁ ଅଧିକ ଯାତ୍ରୀ ନିଖୋଜ ରହିଛନ୍ତି । ଆଜି ବିଳମ୍ବିତ ଅପରାହ୍ନରେ ଛାପରା ନିକଟରେ ସର୍ୟୁ ନଦୀରେ ଏହି ଯାତ୍ରୀବାହୀ ଡଙ୍ଗାଟି କୌଣସି କାରଣରୁ ଓଲଟି ପଡିବା ସହ ବୁଡିଯାଇଛି । ଦୁର୍ଘଟଣାରେ କାରଣ ସମ୍ପର୍କରେ ସ୍ପଷ୍ଟ ହୋଇନଥିବା ବେଳେ ଡଙ୍ଗାରେ ମୋଟ କେତେ ଲୋକଯାତ୍ରା କରୁଥିଲେ, ତାହା ମଧ୍ୟ ସ୍ପଷ୍ଟ ହୋଇପାରିନି । ଯୁଦ୍ଧକାଳୀନ ଭିତ୍ତିରେ ଉଦ୍ଧାର ଅପରେସନ ଆରମ୍ଭ ହୋଇଛି ।
ମିଳିଥିବା ସୂଚନା ଅନୁସାରେ ଆଜି ଅପରାହ୍ନରେ ଛପରାର ମାଞ୍ଝୀ ଥାନା କ୍ଷେତ୍ରରେ ଏହି ଦୁର୍ଘଟଣା ଘଟିଛି । ଡଙ୍ଗାରେ ଥିବା ଯାତ୍ରୀମାନେ କୃଷକ ଓ ଶ୍ରମିକ ଶ୍ରେଣୀର । ସେମାନେ ନଦୀ ସେପାଖରେ ଥିବା କ୍ଷେତରେ କାମ କରିବାକୁ ଯାଇ ଅପରାହ୍ନରେ ମଠିଆର ଘାଟକୁ ଫେରୁଥିଲେ । ଏହି ସମୟରେ ନଦୀ ମଝିରେ ଡଙ୍ଗାଟି କୌଣସି କାରଣରୁ ଭାରସାମ୍ୟ ହରାଇ ଓଲଟି ପଡିଥିଲା । ସେଥିରେ ଥିବା କିଛି ଯାତ୍ରୀ ପହଁରି ପହଁରି କୂଳକୁ ଆସିବାରେ ସଫଳ ହୋଇଥିଲେ । ଅନ୍ୟମାନେ ବୁଡି ଯାଇଥିଲେ । ସ୍ଥାନୀୟ ଲୋକେ ଉଦ୍ଧାର କାର୍ଯ୍ୟ ଆରମ୍ଭ କରିବା ସହ ପୋଲିସ ଓ ସ୍ଥାନୀୟ ପ୍ରଶାସନକୁ ଖବର ଦେଇଥିଲେ ।
ଏହା ମଧ୍ୟ ପଢନ୍ତୁ:- Delhi air quality: ବିଷ ବଳୟରେ ରାଜଧାନୀ, ଆଜିଠୁ ଗଡିବନି ଡିଜେଲ ବସ
ଏବେ ସୁଦ୍ଧା ମୋଟ ଦୁଇଟି ମୃତଦେହ ଉଦ୍ଧାର କରାଯାଇଛି । କିଛି ଲୋକେ ପହଁରି ପହଁରି ସୁରକ୍ଷିତ ଫେରିଛନ୍ତି । ମାତ୍ର 14 ରୁ ଅଧିକ ଯାତ୍ରୀ ଏବେ ମଧ୍ୟ ନିଖୋଜ ଅଛନ୍ତି । ଡଙ୍ଗାରେ ମୋଟ କେତେ ଲୋକ ଥିଲେ ଓ ସେମାନଙ୍କ ପରିଚୟ ସମ୍ପର୍କରେ କିଛି ସ୍ପଷ୍ଟ ହୋଇନି । ସମସ୍ତେ ଆଖପାଖ ଅଞ୍ଚଳର ଶ୍ରମିକ ହୋଇଥିବା ନେଇ ସନ୍ଦେହ କରାଯାଉଛି । ଉଦ୍ଧାର ହୋଇଥିବା 4 ମୃତଦେହକୁ ସ୍ଥାନୀୟ ହସ୍ପିଟାଲକୁ ନିଆଯାଇଛି । ସ୍ଥାନୀୟ ଅଗ୍ନିଶମ ବାହିନୀ, ରାଜ୍ଯ ଓ ଜାତୀୟ ବିପର୍ଯ୍ୟୟ ପ୍ରଶମନ ବଳ ସହ ମେଡିକାଲ ଟିମ ସମନ୍ବିତ ଭାବେ ଉଦ୍ଧାର ଅପରେସନ ଜାରି ରଖିଛନ୍ତି । ଜିଲ୍ଲା ପ୍ରଶାସନର ଅଧିକାରୀମାନେ ମଧ୍ୟ ଘଟଣାସ୍ଥଳରେ ପହଞ୍ଚିଛନ୍ତି । ପ୍ରଥମେ ଉଦ୍ଧାର ଅପରେସନ ଶେଷ ହେବା ପରେ ଦୁର୍ଘଟଣାର ତଦନ୍ତ ନିର୍ଦ୍ଦେଶ ଦିଆଯିବା ନେଇ ପ୍ରଶାସନ ସୂଚନା ଦେଇଛି । ନିକଟ ଅତୀତରେ କେରଳରେ ଏକ ବଡ ଡଙ୍ଗା ଦୁର୍ଘଟଣାରେ ଏକାଧିକ ଲୋକଙ୍କ ପ୍ରଣହାନୀ ଘଟିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
