ଚେନ୍ନାଇ: ତାମିଲନାଡୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନଙ୍କ ପୁଅ ତଥା ରାଜ୍ୟ କ୍ରୀଡ଼ା ଓ ଯୁବ ବ୍ୟାପାର ମନ୍ତ୍ରୀ ଉଦୟାନିଧି ଷ୍ଟାଲିନଙ୍କ ସନାତନ ଧର୍ମ ମନ୍ତବ୍ୟକୁ ନେଇ ତେଜିଛି ରାଜନୀତି । ଏହା ଉପରେ ସ୍ପଷ୍ଟୀକରଣ ରଖିଛନ୍ତି ଉଦୟାନିଧି । ସେ କହିଛନ୍ତି ଯେ ବିଜେପି ତାଙ୍କର ମନ୍ତବ୍ୟକୁ ବିକୃତ କରି ମିଥ୍ୟା ଖବର ପ୍ରଚାର କରୁଛି । ସେ ଯାହା ପୂର୍ବରୁ କହିଛନ୍ତି ତାହା ଦୋହରାଇବେ । ଏହି ମନ୍ତବ୍ୟ ଲାଗି ତାଙ୍କ ବିରୋଧରେ ଯେଉଁ ବି ମାମଲା ରୁଜୁ ହୋଇଛି ସେ ତାକୁ ସାମ୍ନା କରିବାକୁ ପ୍ରସ୍ତୁତ ବୋଲି କହିଛନ୍ତି ।
ଏ ନେଇ ଉଦୟାନିଧି ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି, "ମୁଁ କେବଳ ସନାତନ ଧର୍ମକୁ ସମାଲୋଚିତ କରିଛି । ଏହି ଧର୍ମକୁ ହଟାଇବା ଲାଗି ଦାବି କରିଛି । ଏହି ଦାବିକୁ ମୁଁ ଆଗକୁ ମଧ୍ୟ ଦୋହରାଇବି । କିଛି ଅଭିଯୋଗ ଆଣୁଛନ୍ତି ମୁଁ ଦ୍ରାବିଡମ ହଟାଇବା ଲାଗି କହିଛି । ଏହାର ଅର୍ଥ କଣ ଡିଏମକେମାନଙ୍କୁ ହତ୍ୟା କରାଯିବ ? ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଥିଲେ କଂଗ୍ରେସ ମୁକ୍ତ ଭାରତ । ଏହାର ଅର୍ଥ କଣ କଂଗ୍ରେସ କର୍ମୀଙ୍କୁ ହତ୍ୟା କରିବା ? ବିଜେପି ମୋ ମନ୍ତବ୍ୟକୁ ବିକୃତ କରି ମିଥ୍ୟା ଖବର ପ୍ରଚାର କରୁଛି ।"
ଏହା ବି ପଢନ୍ତୁ- Udhayanidhi Stalin Remark: 'ଇଣ୍ଡିଆ ମେଣ୍ଟର ଏଜେଣ୍ଡା ସନାତନ ଧର୍ମର ସମୂଳ ବିନାଶ'
ତେବେ ତାଙ୍କ ମନ୍ତବ୍ୟକୁ ନେଇ ଯେଉଁ ବି ମାମଲା ରୁଜୁ ହେଉ, ସେ ତାକୁ ସାମ୍ନା କରିବା ଲାଗି ପ୍ରସ୍ତୁତ ବୋଲି କହିଛନ୍ତି । ସୂଚନା ଥାଉ କି ତାମିଲନାଡୁ ପ୍ରଗତିଶୀଳ ଲେଖକ ଓ କଳାକାର ସଂଘ ଦ୍ବାରା ଚେନ୍ନାଇରେ ଆୟୋଜିତ ଏକ ବୈଠକରେ ଯୋଗ ଦେଇ ଉଦୟାନିଧି ଷ୍ଟାଲିନ ଏହି ବିବାଦୀୟ ମନ୍ତବ୍ୟ ଦେଇଥିଲେ । ସେ କହିଥିଲେ, "ସନାତନ କଣ ? ସନାତନର ଅର୍ଥ କିଛି ବି ପରିବର୍ତ୍ତନ ହେବା ଉଚିତ ନୁହେଁ, ସବୁ କିଛି ସ୍ଥାୟୀ । ହେଲେ ଦ୍ରାବିଡ ମଡେଲ ପରିବର୍ତ୍ତନ ଚାହେଁ ଓ ସମାନତା ଖୋଜେ । ବିଜେପି ଇଣ୍ଡିଆ ମେଣ୍ଟକୁ ଭୟ କରୁଛି । ଡିଏମକେର ନୀତି ହେଉଛି ଗୋଟିଏ ପରିବାର, ଗୋଟିଏ ଭଗବାନ । "
ସେ ଆହୁରି କହିଥିଲେ, "କିଛି ଜିନିଷକୁ ବିରୋଧ କରିହେବ ନାହିଁ, କେବଳ ଏହାକୁ ହଟାଇବା ଉଚିତ । ଆମେ ଡେଙ୍ଗୁ, ମ୍ୟାଲେରିଆ, କରୋନା ଭାଇରସ ସହିତ ଲଢିପାରିବା ନାହିଁ, ଏହାର ସମୂଳ ନାଶ ଆବଶ୍ୟକ । ଠିକ ଏହିପରି ଆମକୁ ସନାତନ ଧର୍ମକୁ ହଟାଇବା ଆବଶ୍ୟକ ।" ସେପଟେ ଡିଏମକେ ମୁଖପାତ୍ର ଟିକେଏସ ଇଲାଙ୍ଗୋଭନ କହିଛନ୍ତି, "ଡିଏମକେ ଦେଶର 90 ପ୍ରତିଶତ ହିନ୍ଦୁଙ୍କ ଲାଗି କାମ କରୁଛି । ଯେଉଁମାନେ ଏହି ମନ୍ତବ୍ୟ ଲାଗି ଉଦୟାନିଧିଙ୍କୁ ଟାର୍ଗେଟ କରୁଛନ୍ତି, ସେମାନେ ମଣିପୁର ଲାଗି ପ୍ରଧାନମନ୍ତ୍ରୀ ମୋଦିଙ୍କୁ ଆଙ୍ଗୁଳି ନିର୍ଦ୍ଦେଶ କରିପାରିନାହାନ୍ତି । ଉଦୟାନିଧି ତାମିଲ ସଂସ୍କୃତି ଯାହା ତାହା କହିଛନ୍ତି । ଜୈନ, ଶିଖ, ବୌଦ୍ଧ ଧର୍ମ ଭାରତକୁ ଆସିବା ପରେ ସନାତନ ଧର୍ମର ସୃଷ୍ଟି । ଏହି ଧର୍ମ ପରସ୍ପରର ବିରୋଧୀ । ଏମାନେ ବିବିଧତା ସୃଷ୍ଟି କରିଛନ୍ତି । ଉତ୍ତରରେ 5ଟି ଧର୍ମ ଯାହାକି ସନାତନ ଧର୍ମ ବିରୋଧୀ । ଏହା ଗୌତମ ବୁଦ୍ଧଙ୍କଠୁ ଆରମ୍ଭ ହୋଇଛି ।"
