ନୂଆଦିଲ୍ଲୀ: ବିଲକିସ ବାନୋ ଗଣଦୁଷ୍କର୍ମ ମାମଲା । ବହୁଚର୍ଚ୍ଚିତ ଗୁଜୁରାଟ ବିଲକିସ ବାନୋ ଗଣଦୁଷ୍କର୍ମ ମାମଲାରେ 11 ଦୋଷୀଙ୍କୁ ଛାଡ ବିରୋଧରେ କରାଯାଇଥିବା ଆବେଦନର ଶୁଣାଣି ନଭେମ୍ବର 29 ରେ ସର୍ବୋଚ୍ଚ କୋର୍ଟରେ (Bilkis Bano gang rape case) ହେବ । ଗୁଜୁରାଟ ସରକାର ନିଷ୍ପତ୍ତି ଏହି 11 ଦୋଷୀଙ୍କୁ ଜେଲରୁ ଖଲାସ କରାଯାଇଥିବା ବେଳେ ଏହାକୁ ବିରୋଧ କରି ସର୍ବୋଚ୍ଚ କୋର୍ଟରେ ମାମଲା ଦାଏର ହୋଇଥିଲା । 2002 ଗୋଧ୍ରା ଦଙ୍ଗା ସମୟରେ ପରିବାର ସଦସ୍ୟଙ୍କୁ ହତ୍ୟା ଓ ଗଣଦୁଷ୍କର୍ମର ଶିକାର ହୋଇଥିଲେ ବିଲକିସ ବାନୋ । ଏହି ଘଟଣାରେ 2008 ରେ 11 ଜଣ ଅଭିଯୁକ୍ତ ଦୋଷୀ ସାବ୍ୟସ୍ତ ହେବା ସହ ଆଜୀବନ କାରାଦଣ୍ଡରେ ଦଣ୍ଡିତ ହୋଇଥିଲେ । ତେବେ 14 ବର୍ଷ ସଜ୍ଜା କାଟିବା ପରେ ସେମାନଙ୍କ ଆଚରଣରେ ସୁଧାର ଆସିବା ଦର୍ଶାଇ ଏମାନଙ୍କୁ ଜେଲରୁ ଖଲାସ କରିବାକୁ ଗୁଜୁରାଟ ସରକାର ନିଷ୍ପତ୍ତି ଗ୍ରହଣ କରିଥିଲେ ।
ସତ୍ୟପାଠ ଦାଖଲ କରି ସାରିଛନ୍ତି ଗୁଜୁରାଟ ସରକାର :-
ଏହି ମାମଲାରେ ସର୍ବୋଚ୍ଚ କୋର୍ଟରେ ଗୁଜୁରାଟ ସରକାରଙ୍କ ପକ୍ଷରୁ ସତ୍ୟପାଠ ଦାଖଲ କରାଯାଇ ସାରିଛି । ଗୁଜୁରାଟ ସରକାର ନିଜ ସତ୍ୟାପଠରେ ଦର୍ଶାଇଥିଲେ ଯେ, 1992 ପିଲିସି ଆଧାରରେ ଏହି ନିଷ୍ପତ୍ତି ଗ୍ରହଣ କରାଯାଇଛି । କେନ୍ଦ୍ର ସରକାର ମଧ୍ୟ ଏହି ନିଷ୍ପତ୍ତିକୁ ମଞ୍ଜୁରୀ ଦେଇଛନ୍ତି । ସମସ୍ତ ଦୋଷୀ 14 ବର୍ଷ ସଜ୍ଜା କାଟି ସାରିଛନ୍ତି । ସେମାନଙ୍କ ଆଚରଣରେ ମଧ୍ୟ ସୁଧାରମୂଳକ ପରିବର୍ତ୍ତନ ଆସିଛି । ତେଣୁ ଏହି ନିଷ୍ପତ୍ତି ଗ୍ରହଣ କରାଯାଇଥିବା ସତ୍ୟପାଠରେ ଉଲ୍ଲେଖ କରିଥିଲେ ଗୁଜୁରାଟ ସରକାର ।
କ’ଣ ଥିଲା ପୁରା ଘଟଣା:-
2002 ଫେବୃଆରୀ 27ରେ ଗୁଜୁରାଟର ଗୋଧ୍ରାରେ ଦୁର୍ବୃତ୍ତମାନେ ସାବରମତି ଏକ୍ସପ୍ରେସରେ ନିଆଁ ଲଗାଇ ଦେବା ଫଳରେ 59 ଜଣଙ୍କ ମୃତ୍ୟୁ ହୋଇଥିଲା । ଘଟଣା ପରେ ଗୋଧ୍ରାରେ ସୃଷ୍ଟି ହୋଇଥିବା ସାମ୍ପ୍ରଦାୟିକ ଦଙ୍ଗା ଚାରିଆଡକୁ ବ୍ୟାପିଥିଲା । ଏହି ସମୟରେ ବିଲକିସ ୟାକୁବ ରସୁଲଙ୍କ ପରିବାର ସଦସ୍ୟ ସୁରକ୍ଷିତ ସ୍ଥାନକୁ ଚାଲି ଯାଇଥିଲେ । ମାର୍ଚ୍ଚ 3 ରେ ଏକ ଟ୍ରକରେ ବିଲକିସଙ୍କ ପରିବାର ସମେତ 17 ଜଣ ସ୍ଥାନାନ୍ତରିତ ହେଉଥିବା ବେଳେ ସେମାନଙ୍କ ଉପରକୁ ଆକ୍ରମଣ ହୋଇଥିଲା । ସେଥିରେ ବିଲକିସଙ୍କ ପରିବାର 7 ସଦସ୍ୟଙ୍କ ସମେତ ମୋଟ 14 ଜଣଙ୍କ ମୃତ୍ୟୁ ହୋଇଥିଲା । ବିଲକିସଙ୍କ 2 ବର୍ଷୀୟା ଝିଅ ମଧ୍ୟ ପ୍ରାଣ ହରାଇଥିବା ବେଳେ ଗର୍ଭବତୀ ଥିବା ବିଲକିସଙ୍କୁ ମଧ୍ୟ ଗଣଦୁଷ୍କର୍ମର ଶିକାର ହେବାକୁ ପଡିଥିଲା । ସୌଭାଗ୍ୟବସତଃ ବଞ୍ଚି ଯାଇଥିବା ବିଲକିସ ନ୍ୟାୟ ପାଇଁ ଲଢେଇ ଆରମ୍ଭ କରିଥିଲେ ।
2008 ରେ ଦୋଷୀ ସାବ୍ୟସ୍ତ ହୋଇଥିଲେ 11 ଅଭିଯୁକ୍ତ :-
ପ୍ରଦେଶ ପୋଲିସ ଘଟଣାର ସଠିକ ତଦନ୍ତ କରୁନଥିବା ଦର୍ଶାଇ ଜାତୀୟ ମାନବାଧିକାର କମିଶନଙ୍କ ଦ୍ବାରସ୍ଥ ହୋଇଥିଲେ ପୀଡିତା ବିଲକିସ । ଏହା ସହ ପରେ ସେ ସୁପ୍ରିମକୋର୍ଟରେ ମଧ୍ୟ ଏକ ପିଟିସନ ଦାୟର କରିଥିଲେ । 2003 ସର୍ବୋଚ୍ଚ ଅଦାଲତ ମାମଲାର ତଦନ୍ତ ଭାର କେନ୍ଦ୍ରୀୟ ତଦନ୍ତକାରୀ ସଂସ୍ଥା ସିବିଆଇକୁ ଦେଇଥିଲେ । 2004 ରେ ସମସ୍ତ ଅଭିଯୁକ୍ତ ଗିରଫ ହୋଇଥିଲେ । ଏହି ସମ୍ବେଦନଶୀଳ ମାମଲାର ଶୁଣାଣି କରି ସୁପ୍ରିମକୋର୍ଟ ମୁମ୍ବାଇକୁ ସ୍ଥାନାନ୍ତରଣ କରିଥିଲେ । 2008 ଜାନୁଆରୀ 21ରେ ମୁମ୍ବାଇ ସ୍ବତନ୍ତ୍ର କୋର୍ଟ ସିବିଆଇ କୋର୍ଟ 11 ଜଣ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡାଦେଶ ଶୁଣାଇଥିଲେ । ତେବେ ଏବେ ଗୁଜୁରାଟ ସରକାରଙ୍କ ଏପରି ନିଷ୍ପତ୍ତି ପରେ ପୁଣି ଥରେ ମାମଲା ସର୍ବୋଚ୍ଚ କୋର୍ଟରେ ପହଞ୍ଚିଛି । ସରକାର ନେଇଥିବା ଛାଡ ନିଷ୍ପତ୍ତି ଉପରେ ସର୍ବୋଚ୍ଚ କୋର୍ଟ ପୁଣି ଥରେ ନଭେମ୍ବର 29 ରେ ଶୁଣାଣି କରିବାକୁ ଯାଉଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
