କୋଲକାତା: ପଶ୍ଚିମବଙ୍ଗ ବିଧାନସଭା ନିର୍ବାଚନ ପାଇଁ ଚତୁର୍ଥ ପର୍ଯ୍ୟାୟ ପ୍ରାର୍ଥୀ ତାଲିକା ଜାରି କରିଛି ଭାରତୀୟ ଜନତା ପାର୍ଟି । ବିଜେପି ପକ୍ଷରୁ ଜାରି ପ୍ରାର୍ଥୀ ତାଲିକାରେ 148 ଜଣଙ୍କ ନାଁ ହୋଇଛି ଘୋଷଣା । ମୁକୁଲ ରୟ, ତାଙ୍କ ପୁଅ ଶୁଭ୍ରାଂଶୁ ରୟ, ରାହୁଲ ସିହ୍ନା ଓ ସାଂସଦ ଜଗନ୍ନାଥ ସରକାରଙ୍କୁ ଟିକେଟ ଦେଇଛି ଦଳ ।
ଅଭିନେତ୍ରୀ ପାରନୋ ମିତ୍ରଙ୍କୁ ପ୍ରାର୍ଥୀ କରିଛି ବିଜେପି । ପୂର୍ବତନ କେନ୍ଦ୍ରମନ୍ତ୍ରୀ ମୁକୁଲ ରୟ କୃଷ୍ଣାନଗର ଉତ୍ତର ଓ ତାଙ୍କ ପୁଅ ଶୁଭ୍ରାଂଶୁ ବିଜପୁରରୁ ଲଢିବେ ନିର୍ବାଚନ । ସେହିପରି ହାବ୍ରାରୁ ମୈଦାନରେ ରହିବେ ରାହୁଲ ସିହ୍ନା । ସାବିତ୍ରୀ ଚାଟାର୍ଜୀ ଓ ବୈଶାଳୀ ଡାଲମିଆଙ୍କୁ ମଧ୍ୟ ମିଳିଛି ଟିକେଟ ।
ଉତ୍ତର 24 ପ୍ରଗଣାର ବିଧାନନଗରରୁ ସବ୍ୟସାଚୀ ଦତ୍ତ, ପାଣ୍ଡେଶ୍ବରରୁ ଜିତେନ୍ଦ୍ର ତିୱାରୀ, ଆସାନସୋଲରୁ ଅଗ୍ନିମିତ୍ରଙ୍କୁ ପ୍ରାର୍ଥୀ କରିଛି ବିଜେପି । ନିକଟରେ ଟିଏମସି ଛାଡି ବିଜେପିରେ ସାମିଲ ହୋଇଥିଲେ ଜିତେନ୍ଦ୍ର ତିୱାରୀ ।
ବର୍ତ୍ତମାନସୁଦ୍ଧା 5 ଜଣ ସାଂସଦଙ୍କୁ ଟିକେଟ ଦେଇଛି ବିଜେପି । ଗତ ତାଲିକାରେ କେନ୍ଦ୍ରମନ୍ତ୍ରୀ ବାବୁଲ ସୁପ୍ରିଓ, ହୁଗୁଳି ସାଂସଦ ଲକେଟ ଚାଟାର୍ଜୀ, କୁଚବିହାର ସାଂସଦ ନିସିଦ୍ଧ ପରମାଣିକ ଓ ରାଜ୍ୟସଭା ସାଂସଦ ସ୍ବପନ ଦାସଗୁପ୍ତାଙ୍କୁ ଟିକେଟ ଦେଇଥିଲା ଦଳ ।
