ଅଙ୍ଗଦାନ କରୁଥିବା ବ୍ୟକ୍ତି ୮ ଜଣଙ୍କ ଜୀବନ ବଞ୍ଚାଇପାରିବ । ଆଉ ଯଦି ଟିସୁ ଦାନ କରନ୍ତି, ତାହା ହେଲେ ୫୦ ଲୋକଙ୍କ ଜୀବନରେ ଉନ୍ନତି ଆଣିପାରିବ । ଅଙ୍ଗଦାନ ହେଉଛି ମାନବିକତାର ଶ୍ରେଷ୍ଠତମ ନିଦର୍ଶନ । ଜଣେ ବ୍ୟକ୍ତିର ଯଦି ଦେହାନ୍ତ ହୋଇଯାଏ, ତାହା ହେଲେ ତାଙ୍କ ଅଙ୍ଗ ପ୍ରତ୍ୟଙ୍ଗ କୌଣସି କାମରେ ଆସେ ନାହିଁ । କିନ୍ତୁ ମୃତ ବ୍ୟକ୍ତିର ଅଙ୍ଗଗୁଡିକ ଅନ୍ୟ କାହାର ନବ ଜୀବନ ପାଇଁ ଦରକାର ପଡିଥାଏ । ତେବେ ଅଙ୍ଗଦାନ ନେଇ ଗୁଡାଏ ଅନ୍ଧବିଶ୍ୱାସ ଓ ଭୁଲଧାରଣା ରହିଆସିଛି । ତେଣୁ ଏସବୁ ଦୂର କରିବା ସହ ଅଙ୍ଗଦାନର ମହତ୍ୱ ନେଇ ସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ପ୍ରତିବର୍ଷ ଅଗଷ୍ଟ ୧୩ ତାରିଖରେ ପାଳନ ହୁଏ ବିଶ୍ୱ ଅଂଗଦାନ ଦିବସ ।
ଏକ ସର୍ଭେରୁ ଜଣା ପଡିଛି ଯେ, ଅଙ୍ଗ ଅଭାବରୁ ବର୍ଷକୁ ପାଖାପାଖି ଏକ ଲକ୍ଷ ଲୋକ ପ୍ରାଣ ହରାଇଥାନ୍ତି । ତେଣୁ ଅଙ୍ଗଦାନର ଗୁରୁତ୍ୱ ଯେ କେତେ, ତାହା ସ୍ପଷ୍ଟ ଅନୁମେୟ । ଅଙ୍ଗଦାନ ନେଇ କିଛି ନ୍ୟାସନାଲ ହେଲ୍ଥ ପୋର୍ଟାଲ୍ ଅଫ ଇଣ୍ଡିଆ–ଏନଏଚପି ପକ୍ଷରୁ କିଛି ତଥ୍ୟ ସମସ୍ତେ ଜାଣିବା ଉଚିତ ।
ସେସବୁ ତଥ୍ୟ ହେଲା-
- ଜାତି, ଧର୍ମ, ବୟସ, ବଣ୍ଣ ର୍ ନିର୍ବିଶେଷରେ କେହି ବି ନିଜର ଅଙ୍ଗ ଦାନ କରିପାରିବେ ।
- ଅଙ୍ଗଦାନ ପାଇଁ ନିର୍ଦ୍ଦିଷ୍ଟ କିଛି ବୟସସୀମା ନାହିଁ । ବୟସ ନୁହେଁ, ବରଂ କଡା ମେଡିକାଲ୍ କ୍ରାଇଟେରିଆ ଆଧାରରେ ହିଁ ଅଙ୍ଗ ଦାନ କରିହେବ ।
- ୧୮ ବର୍ଷରୁ କମ ବୟସ୍କମାନେ ନିଜ ବାପାମାଆ ବା ଅଭିଭାବକଙ୍କ ସହ ରାଜିନାମା କରି ଅଙ୍ଗଦାନ କରିପାରିବେ ।
- ତେବେ, କର୍କଟ, ଏଚଆଇଭି, ଡାଇବେଟିସ୍, କିଡନୀ ରୋଗ ଓ ହୃଦ ରୋଗ ଥିବା ବ୍ୟକ୍ତି ଅଂଗଦାନରୁ ବଞ୍ଚିତ ହେବେ ।
କଣ ସବୁ ଅଙ୍ଗ ଦାନ କରି ହେବ ?
ସ୍ୱାଭାବିକ ମୃତ୍ୟୁ କ୍ଷେତ୍ରରେ ନିମ୍ନଲିଖିତ ଅଂଗ ଦାନ କରିହେବ । ସେଗୁଡିକ ହେଲା –
- ନେତ୍ରପଟଳ ଭଳି ଟିସୁ
- ହାର୍ଟ ହାଭସ
- ଚର୍ମ
- ହାଡ
ବ୍ରେନ୍ ଡେଥ୍ କ୍ଷେତ୍ରରେ ନିମ୍ନଲିଖିତ ଅଙ୍ଗ ଦାନ କରିହେବ । ସେଗୁଡିକ ହେଲା–
- ହୃଦୟ
- ଯକୃତ
- କିଡନୀ
- ଅନ୍ତଃନଳୀ
- ଫୁସଫୁସ
- ଅଗ୍ନାଶୟ
ନିକଟରେ ସଫଳ ପ୍ରତିରୋପଣ ହେଲା ପରେ ହାତ ଓ ମୁହଁକୁ ମଧ୍ୟ ଅଙ୍ଗଦାନ ତାଲିକାରେ ଯୋଡାଯାଇଛି । ଅଧିକାଂଶ ମାମଲାରେ ମୃତ ବ୍ୟକ୍ତିଙ୍କ ଅଙ୍ଗଦାନ କରାଯାଏ । କିନ୍ତୁ ବେଳେବେଳେ ଜୀବନ୍ତ ଅଙ୍ଗଦାନ ବି କରାଯାଏ । ଜୀବନ୍ତ ଅଙ୍ଗଦାନ ପ୍ରକ୍ରିୟାରେ ଜଣେ ନିମ୍ନଲିଖିତ ଅଙ୍ଗ ଦାନ କରିପାରିବେ ।
- ଗୋଟିଏ କିଡନୀ
- ଫୁସଫୁସ୍
- ଯକୃତର ଗୋଟିଏ ଅଂଶ
- ଅଗ୍ନାଶୟର ଗୋଟିଏ ଅଂଶ
- ଅନ୍ତଃନଳୀର ଗୋଟିଏ ଅଂଶ
ଅଙ୍ଗଦାନ ନେଇ ଥିବା ଭୁଲ୍ ଧାରଣା ଓ ବାସ୍ତବତା
୧. ଭୁଲ୍ ଧାରଣା - ଯଦି କାହାର ମେଡିକାଲ କଣ୍ଡିସନ ଥାଏ, ତାହା ହେଲେ ସେ ଅଙ୍ଗଦାନ କରିପାରିବେ ନାହିଁ ।
ବାସ୍ତବତା– ବୟସ ଓ ମେଡିକାଲ କଣ୍ଡିସନ ବାରଣ ନାହିଁ । ଯେ କେହି ବି ଅଙ୍ଗଦାନ କରିପାରିବେ । ଅଙ୍ଗଦାନ କରିପାରିବାକୁ ନିଷ୍ପତି ନେଇଥିବା ବ୍ୟକ୍ତିର ମୃତ୍ୟୁ ବେଳେ ହିଁ ଡାକ୍ତରୀ ଟିମ୍ ଅଙ୍ଗଦାନ ପ୍ରକ୍ରିୟା କାର୍ଯ୍ୟକାରୀ ହେବ କି ନାହିଁ ସ୍ଥିର କରନ୍ତି ।
୨. ଅଙ୍ଗଦାନ କରୁଥିବା ବ୍ୟକ୍ତିଙ୍କ ପରିବାରକୁ ପଇସା ମଗାଯାଏ । ନା, ଅଙ୍ଗଦାନ ପ୍ରକ୍ରିୟା ପରିବାରଠାରୁ ଅର୍ଥ ଆଦାୟ କରାଯାଏ ନାହିଁ ।
୩. ଅଙ୍ଗଦାନ ପାଇଁ ମୋ ବୟସ ଖୁବ୍ କମ୍ । ଅଙ୍ଗଦାନ ପାଇଁ ବୟସ ବାଧକ ନୁହେଁ । ହଁ, ଅଙ୍ଗଦାନ କରୁଥିବା ଲୋକ ଯଦି ୧୮ ବର୍ଷ ବୟସରୁ କମ୍, ତାହା ହେଲେ ସେ ନିଜ ବାପାମାଆ ବା ଅଭିଭାବକଙ୍କ ଅନୁମତି ପ୍ରାପ୍ତ ହୋଇ ରାଜିନାମା କରିବା ଦରକାର ।
୪. ମୋ ଜୀବନ ବଂଚାଇବା ପାଇଁ ସହଜରେ ହାର ମାନିଯିବେ । ଯେକୌଣସି ବ୍ୟକ୍ତିର ଜୀବନ ବଂଚାଇବା ହେଉଛି ପ୍ରତ୍ୟେକ ଡାକ୍ତରଙ୍କ ପ୍ରାଥମିକତା । ବ୍ୟକ୍ତିର ବ୍ରେନ୍ ଡେଡ୍ ହେଲେ ହିଁ ଅଙ୍ଗଦାନ ହୋଇଥାଏ । ମେଡିକାଲ ଟିମ୍ ଓ ଟ୍ରାନ୍ସପ୍ଲାଂଟ ଦୁଇ ଅଲଗା ଅଲଗା ଟିମ୍ ।
୫. ମୁଁ ବେଶ୍ ବୟସ୍କ/ଦୁର୍ବଳ, ମୋ ସ୍ୱାସ୍ଥ୍ୟାବସ୍ଥା ଭଲ ନାହିଁ । କିଏ ବି ମୋ ଅଙ୍ଗ ନେବା ପାଇଁ ରାଜି ହେବେନି ।
ପୂର୍ବରୁ ବି କୁହାଯାଇଛି ଯେ, ଯେକୌଣସି ବୟସ ବର୍ଗର ଲୋକ ଅଙ୍ଗଦାନ କରିପାରିବେ । ଦାନ କରାଯାଇଥିବା ଅଙ୍ଗ ବ୍ୟବହାର କରିହେବ କି ନାହିଁ, ମେଡିକାଲ ଟିମ୍ ହିଁ ନିଷ୍ପତି ନେଇଥାନ୍ତି । କିନ୍ତୁ ନିଜକୁ ଏଥିପାଇଁ ଅଯୋଗ୍ୟ ଘୋଷଣା କରନ୍ତୁ ନାହିଁ । ଅଙ୍ଗଦାନ ମହତ କାମ । ଅଙ୍ଗଦାନ କରି ଆପଣ ଆଉ ଜଣଙ୍କୁ ନବଜୀବନ ଦେଇପାରିବେ । ଜଣଙ୍କର ଜୀବନ ବଞ୍ଚାଇବା ଭଳି ମହତ୍ କାମ ଆଉ ନାହିଁ । ତେଣୁ ଅଙ୍ଗଦାନ ପାଇଁ ସମସ୍ତେ ଆଗେଇ ଆସିବା ଦରକାର ।
