ରାଞ୍ଚି: ଝାଡଖଣ୍ଡରେ ଜଣେ ମହିଳାଙ୍କ ଅଜବକାଣ୍ଡ । ଗୋଟିଏ ପରେ ଗୋଟିଏ କରି 5 ଜଣ ଶିଶୁଙ୍କୁ ଦୁଇ ମହଲା ଛାତ ଉପରୁ ତଳକୁ ଫିଙ୍ଗି ଦେଇଛନ୍ତି ମହିଳା ଜଣକ । ଏଥିରେ ଜଣେ ଶିଶୁ ଗୁରୁତର ହୋଇଥିବାବଳେ 4 ଜଣ ଆହତ ହୋଇଛନ୍ତି । ସେମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି ।
ସୂଚନା ଅନୁଯାୟୀ ସାହିଗଞ୍ଜ ନଗର ଥାନା ଅନ୍ତର୍ଗତ ଜାଭିୟର୍ସ ସ୍କୁଲ ନିକଟରେ ଥିବା ନୂଆ ଟୋଲ ମହଲାରେ ଆଜି(ରବିବାର) ସକାଳ 7ଟା ସମୟରେ ଜଣେ ମହିଳା 5 ଜଣ ଶିଶୁଙ୍କୁ ଗୋଟିଏ ପରେ ଗୋଟିଏ କରି ସମସ୍ତଙ୍କୁ ତଳକୁ ଫିଙ୍ଗି ଦେଇଥିଲେ । ଏନେଇ ପଡୋଶୀ ଜାଣିବା ପରେ ପରିବାର ଲୋକଙ୍କୁ ଜଣାଇଥିଲେ । ପରିବାର ଲୋକେ ଆହତ ଓ ଗୁରୁତରଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଛନ୍ତି ।
ସ୍ଥାନୀୟ ଲୋକଙ୍କ କହିବା ଅନୁଯାୟୀ ଉକ୍ତ ମହିଳା ଜଣକ ସେହି ଘରର ବୋହୂ । ସେ କିଛିଦିନ ହେବ ମାନସିକ ରୋଗରେ ପୀଡିତ ଅଛନ୍ତି । ସେ ଅନେକ ଥର ଘରଛାଡି ପଳାଇଯାଆନ୍ତି । ପରିବାର ଲୋକେ ତଙ୍କୁ ଖୋଜା ଖୋଜି କରି ଘରକୁ ଆଣନ୍ତି । ତେବେ ଏନେଇ ପରିବାର ଲୋକେ ଗଣମାଧ୍ୟମକୁ କୌଣସି ପ୍ରତିକ୍ରିୟା ଦେଇନାହାନ୍ତି । ସ୍ଥାନୀୟ ଲୋକଙ୍କ କହିବା ଅନୁଯାୟୀ ପରିବାର ଲୋକେ ବର୍ତ୍ତମାନ ଆହତ ଶିଶୁଙ୍କୁ ଭାଗଲପୁର ଡାକ୍ତରଖାନାରେ ଭର୍ତ୍ତି କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
