ପାଟଣା: ବିହାର ବିଧାନସଭା ନିର୍ବାଚନକୁ ନେଇ ଘୋମଘୋଟ ଚାଲିଛି ପ୍ରଚାର ପ୍ରସାର । କ୍ଷମତାକୁ ଆସିବାକୁ ଉଭୟ ବିଜେପି ଓ ମହାମେଣ୍ଟ ଜୋରଦାର ପ୍ରୟାସ କରୁଛନ୍ତି । ଆଜି ଦ୍ବିତୀୟ ପର୍ଯ୍ୟାୟ ବିଧାନସଭା ନିର୍ବାଚନର ଶେଷ ଦିନ ହୋଇଥିବାବେଳେ ମୋଦି ବିହାରରେ ରାଲି କରି ମହାମେଣ୍ଟକୁ ଟାର୍ଗେଟ କରିବାରେ ଲାଗିଛନ୍ତି । ସେପଟେ ମହାମେଣ୍ଟର ମୁଖ୍ୟମନ୍ତ୍ରୀ ପ୍ରାର୍ଥୀ ତେଜସ୍ବୀ ଯାଦବ ମୁଖ୍ୟମନ୍ତ୍ରୀ ନୀତିଶ କୁମାରଙ୍କୁ ଘେରିଛନ୍ତି ।
ବିହାରରେ ବର୍ତ୍ତମାନ ସରକାରୀ କର୍ମଚାରୀଙ୍କ ଅବସର ସମୟ ସୀମା 50 ରହିଛି । ମହାମେଣ୍ଟ ସରକାର କ୍ଷମତାକୁ ଆସିଲେ ଅବସର ବୟସକୁ ବୃଦ୍ଧି କରାଯିବ । ଯେଉଁଠି ନୀତିଶ କୁମାର 70 ବର୍ଷ ବୟସରେ ନିର୍ବାଚନ ଲଢିପାରୁଛନ୍ତି ସେଠାରେ 50 ବର୍ଷ ରଖାଯିବା ଆଦୌ ଉଚିତ ନୁହେଁ ବୋଲି ତେଜସ୍ବୀ କହିଛନ୍ତି।
ଆହୁରି ସେ ପ୍ରଶ୍ନ କରି କହିଛନ୍ତି, ବିହାର ଛାତ୍ରଛାତ୍ରୀ 3 ବର୍ଷରେ ସ୍ନାତକ ଡିଗ୍ରୀ ହାସଲ କରିପାରୁନାହାଁନ୍ତି । ପାସ ହେବାକୁ ଏମାନଙ୍କୁ କାହିଁକି 4ରୁ 5 ବର୍ଷ ସମୟ ଲାଗୁଛି ।
ସୂଚନାଯୋଗ୍ୟ, ବିହାର ବିଧାନସଭା ନିର୍ବାଚନ ଲାଗି ପ୍ରଥମ ପର୍ଯ୍ୟାୟ ଭୋଟ ଗ୍ରହଣ ଶେଷ ହୋଇସାରିଛି । ଅକ୍ଟୋବର 28 ତାରିଖରେ 16 ଜିଲ୍ଲା ପାଇଁ 71 ଟି ସିଟ ପାଇଁ ହୋଇଥିଲା ନିର୍ବାଚନ ।
