ନୂଆଦିଲ୍ଲୀ: ରାଷ୍ଟ୍ରୀୟ ନାଗରିକତା ପଞ୍ଜିକା(ଏନଆରସି) କୁ ନେଇ ଏବେ ପୂର୍ବତ୍ତୋର ରାଜ୍ୟରେ ବିବାଦ ଥମିନଥିବା ବେଳେ କେନ୍ଦ୍ର ସରକାର ସିଏବିକୁ ଆଣିଛନ୍ତି । ସିଏବି ବୁଧବାର ରାଜ୍ୟସଭାରେ ସୋମବାର ଲୋକସଭାରେ ପାରିତ ମଧ୍ୟ ହୋଇଯାଇଛି । ବିଲରେ ବ୍ୟାପକ ସଂଶୋଧନ ସହ ଅନେକ କିଛି ପରିବର୍ତ୍ତନ ହୋଇଛି । ବିଶେଷ ଭାବେ ଶରଣାର୍ଥୀଙ୍କୁ ଏଣିକି ଭାରତୀୟ ନାଗରିକତା ମିଳିବ।
ନାଗରିକତା ସଂଶୋଧନ ବିଲ କଣ?
ଯେଉଁ ବିଲ ସଂସଦରେ ପାସ ହୋଇଛି ଏହା ନାଗରିକତା ଅଧିନିୟମ 1995ର ପରିବର୍ତ୍ତନ କରିବ। ଏହାର ଅନ୍ତର୍ଗତ ବାଂଲାଦେଶ, ପାକିସ୍ତାନ ଓ ଆଫଗାନିସ୍ତାନ ସମେତ ଆଖପାଖର କେତେକ ଦେଶର ହିନ୍ଦୁ, ଶିଖ, ବୌଦ୍ଧ, ଜୈନ, ପାର୍ସୀ ଧର୍ମାବଲମ୍ବୀଙ୍କୁ ଭାରତର ନାଗରିକତା ମିଳିବ।
କେମିତି ଭାରତୀୟ ନାଗରିକତା ମିଳିବା ସହଜ ହେବ
ଏହି ବିଲ ସଂଶୋଧନ ହେବାପରେ ବାଂଲାଦେଶ, ପାକିସ୍ତାନ ଓ ଆଫଗାନିସ୍ତାନର ଅଣ ମୁସଲିମ ଶରଣାର୍ଥୀ ଯେଉଁମାନେ ଭାରତ ଆସିବେ ସେମାନଙ୍କୁ ଭାରତର ନାଗରିକତା ମିଳିବା ସହଜ ହେବ । ନାଗରିକତା ପାଇବା ପାଇଁ ଶରଣାର୍ଥୀଙ୍କୁ ଅତିକମରେ ଭାରତରେ 6 ବର୍ଷ ରହିବାକୁ ପଡିବ । ପୂର୍ବରୁ 11 ବର୍ଷ ରହିବାକୁ ପଡୁଥିଲା।
ବିଲକୁ ବିରୋଧୀ କାହିଁକି ବିରୋଧ କରୁଥିଲେ
ଏହି ବିଲକୁ ନେଇ ବିରୋଧୀ କେନ୍ଦ୍ର ସରକାରଙ୍କୁ ଘେରୁଥିଲେ । ଯେଉଁଥିରେ ମୁଖ୍ୟ ବିରୋଧ ଥିଲା ଧର୍ମକୁ ନେଇ। ବିଲରେ ମୁସଲମାନଙ୍କୁ ଛାଡି ଅନ୍ୟ ଧର୍ମର ଲୋକଙ୍କୁ ଅତି ସହଜରେ ନାଗରିକତା ଦେବାପାଇଁ ବ୍ୟବସ୍ଥା ହୋଇଛି । ବିରୋଧୀ ଏହି ପ୍ରସଙ୍ଗକୁ ନେଇ ସରକାରଙ୍କୁ ଘେରୁଥିଲେ । ସେମାନଙ୍କ ଅଭିଯୋଗ ଥିଲା ସରକାର ଧର୍ମକୁ ନେଇ ଭାଗଭାଗ କରୁଛନ୍ତି ।
ଏନଡିଏରୁ ମଧ୍ୟ ହେଉଥିଲା ବିରୋଧ
ସରକାରଙ୍କ ପାଇଁ ବଡ ଚ୍ୟାଲେଞ୍ଚ ଥିଲା ଏନଡିଏର ସହଯୋଗୀ ଦଳ ଏହାକୁ ବିରୋଧ କରୁଥିଲେ । ପୂର୍ବତର ରାଜ୍ୟ ଆସାମରେ ବିଜେପିର ସହଯୋଗୀ ଥିବା ଆସାମ ଗଣ ପରିଷଦ ସିଏବିକୁ ସିଧା ସଳଖ ବିରୋଧ କରୁଥିଲା । ଦଳ ଅଭିଯୋଗ କରିଥିଲା ବିଲ ଆଣିବା ପୂର୍ବରୁ ବିଜେପି ତାଙ୍କ ସହ ଆଲୋଚନା କରିନଥିଲା । ଆସାମ ଗଣ ପରିଷଦ ବିଜେପିର ସହଯୋଗୀ ଅଛି ଉକ୍ତ ରାଜ୍ୟରେ।
ପୂର୍ବତ୍ତୋର ରାଜ୍ୟରେ ବିରୋଧ କାହିଁକି
ନିକଟରେ ରାଷ୍ଟ୍ରୀୟ ନାଗରିକତା ରେଜିଷ୍ଟ୍ରର(ଏନଆରସି) କୁ ନେଇ ପୂର୍ବତର ରାଜ୍ୟରେ ବହୁମାତ୍ରାରେ ବିରୋଧ ହେଉଥିଲା । ଏନଆରସି ପରେ ପରେ ସିଏବିକୁ ସରକାର ଆଣିଛନ୍ତି । ଯେଉଁଥିପାଇଁ ବିରୋଧ ହେଉଛି ପୂର୍ବତ୍ତୋର ରାଜ୍ୟରେ । ନର୍ଥ ଇଷ୍ଟ ଷ୍ଟୁଡେଣ୍ଟ ଆର୍ଗାନାଇଜେସନ ନେତେୃତ୍ବରେ ଏହି ବିରୋଧ ହେଉଥିଲା ।
ବିଜେପିକୁ କଣ ରାଜନୈତିକ ଫାଇଦା ମିଳିବ ସିଏବିରୁ
ଆସାମ, ବେଙ୍ଗଲ ରାଜ୍ୟରେ ଶରଣାର୍ଥୀ ବହୁଳ ମାତ୍ରାରେ ଅଛନ୍ତି । ଆସାମରେ ବିଧାନସଭା ନିର୍ବାଚନ ଓ ଦେଶରେ ଲୋକସଭା ନିର୍ବାଚନ ପୂର୍ବରୁ ବିଜେପି ଏହାକୁ ନେଇ ବଡ ମୁଦ୍ଦା କରିଥିଲା । ଯାହାର ଫାଇଦା ମଧ୍ୟ ଦଳକୁ ମିଳିଥିଲା । 2021ରେ ପଶ୍ଚିମବଙ୍ଗରେ ବିଧାନସଭା ନିର୍ବାଚନ ଅଛି। ଏହି ପ୍ରସଙ୍ଗକୁ ନେଇ ବିଜେପି ବଡ ଯୋଜନା କରି ରାଜନୈତିକ ଫାଇଦା ନେବାକୁ ଉଦ୍ୟମ କରିବ।
