ନୂଆଦିଲ୍ଲୀ: ଦେଶର ସ୍ବାସ୍ଥ୍ୟ ବ୍ୟବସ୍ଥାରେ ଅନେକ ସମ୍ରେ ଦେଖିବାକୁ ମିଳୁଛି ଅନେକ ପ୍ରକାର ଅବ୍ୟବସ୍ଥା । କେମୋଥେରାପି ନେବାକୁ ଯାଉଥିବା ରୋଗୀଙ୍କ ଉପରେ ପଡୁଛି ଛାତରୁ ଗଳୁଥିବା ପାଣି । ଏ ଘଟଣା କୌଣସି ଛୋଟମୋଟ ଡାକ୍ତରଖାନାରେ ଦେଖିବାକୁ ମିଳିନାହିଁ, ବରଂ ଅତ୍ୟାଧୁନିକ ଡାକ୍ତରଖାନା କୁହାଯାଉଥିବା ଦିଲ୍ଲୀସ୍ଥିତ ଭାରତୀୟ ଆର୍ୟୁର୍ବିଜ୍ଞାନ ସଂସ୍ଥାନରେ ( ଏମ୍ସ୍) ।
ଦିଲ୍ଲୀ ସ୍ଥିତ ଏମ୍ସ୍ର ପ୍ରିନସେସ୍ ଓପିଡିର ଗ୍ରାଉଣ୍ଡ ଫ୍ଲୋର ସ୍ଥିତ କେମୋ କକ୍ଷର ଘଟଣା । ଶୁକ୍ରବାର ରୋଗୀଙ୍କୁ କେମୋ ଦେବାକୁ ନେବା ସମୟରେ ତାଙ୍କ ଉପରେ ଛାତରୁ ପାଣିପଡିବାକୁ ଲାଗିଥିଲା । ସେହି ସମୟରେ ପାଖାପାଖି 6 ଜଣ ରୋଗୀ ଉପସ୍ଥିତ ଥିଲେ । କିଛି କହିବା ପୂର୍ବରୁ ପାଣି ଧାର ବଢିବାକୁ ଲାଗିଥିଲା । ଏହାପରେ ରୋଗୀ ଚିତ୍କାର କରିବା ଆରମ୍ଭ କରି ଦେଇଥିଲେ ।
ଛାତରୁ ପଡୁଥିବା ପାଣି ଇଲେକ୍ଟ୍ରି ବଲ୍ବ ଲାଗିଥିବା ବକ୍ସ ଦେଇ ବୋହୁଥିଲା । ଆଉ ଏହାକୁ ଦେଖି ସେଠାରେ ଥିବା ରୋଗୀ ଓ ତାଙ୍କ ପରିବାର ଲୋକଙ୍କ ମନରେ ଏକ ପ୍ରକାର ଭୟର ବାତାବରଣ ଖେଳିଯାଇଥିଲା । ଆଉ ଏହାପରେ ଜଣାପଡିଥିଲା ଯେ ନିକଟରେ ହିଁ ଏସି ସଫା କରାଯାଉଥିଲା। ଯେଉଁଠୁ ଜୋର୍ରେ ପାଣି ରୋଗୀଙ୍କ ଉପରେ ପଡୁଥିଲା । ସୂଚନା ମିଳିବା ମାତ୍ରକେ ବିଦ୍ୟୁତ କର୍ମଚାରୀ ସେଠାରେ ପହଞ୍ଚି ବିଦ୍ୟୁତ ସରବରାହକୁ ବନ୍ଦ କରିଦେଇଥିଲେ ।
ପାଖାପାଖି ଦେଢ ଘଣ୍ଟା ପର୍ଯ୍ୟନ୍ତ ଚାଲିଥିଲା ଏହି ଘଟଣା । ଆଉ ଏହାକୁ ସେଠାରେ ଉପସ୍ଥିତ ଥିବା ଲୋକେ ନିଜ ଫୋନ୍ରେ ଏହାକୁ ରେକର୍ଡିଂ କରିଦେଇଥିଲେ । ଯାହା ସୋସିଆଲ ମିଡିଆରେ ଖୁବ୍ ଭାଇରାଲ ହୋଇଥିଲା ।
