ୱାଶିଂଟନ: ଇରାକରେ ଅବସ୍ଥିତ ଆମେରିକା ଦୂତାବାସ ଉପରେ ଇରାନ ବାରମ୍ବାର ଆକ୍ରମଣ କରୁଛି । ଆମେରିକା କୌଣସି କ୍ଷତି ହୋଇନଥିବା ସୂଚନା ଦେଉଥିବା ବେଳେ ଇରାନ କିନ୍ତୁ ଏହାର ବିପରୀତ କହୁଛି । ଏ ମଧ୍ୟରେ ଆମେରିକା ସଂସଦରେ ଆଜି(ଗୁରୁବାର) ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଇରାନ ସହ ଯୁଦ୍ଧ କରିବାରୁ ରୋକିବା ପାଇଁ ଭୋଟ୍ ଗ୍ରହଣ କରାଯିବ ।
ସଂସଦର ବାଚସ୍ପତି ନାନ୍ସି ପେଲୋସୀ ଏହି ସୂଚନା ଦେଇଛନ୍ତି । ଇରାନର ସେନା ବିରୋଧରେ ଆମେରିକାର ଶକ୍ତି ପ୍ରଦର୍ଶନ କରିବା ଉଚିତ୍ କି ନୁହେଁ ଏନେଇ ଆଜି ଭୋଟ ଗ୍ରହଣ କରାଯିବ । ପ୍ରକାଶଥାଉକି, ଏହି ଘୋଷଣା ତେହେରାନରେ ଆମେରିକା ସେନାବେସ୍ ଉପରେ ମିସାଇଲ ମାଡ ପରେ କରାଯାଇଛି । ଏହାପୂର୍ବରୁ ଇରାନକୁ ସେନାବଳରେ ନୁହେଁ ବରଂ ଅର୍ଥନୀତି ବଳରେ ପରାସ୍ତ କରାଯିବ ବୋଲି ଟ୍ରମ୍ପ ସୂଚନା ଦେଇଥିଲେ ।
ବାଚସ୍ପତି ନାନ୍ସି ପେଲୋସୀଙ୍କ କହିବାନୁସାରେ, ଟ୍ରମ୍ପ ପ୍ରଶାସନ ଇରାନର ମୁଖ୍ୟ ଜେନେରାଲ କାସିମ ସୁଲେମାନଙ୍କୁ ହତ୍ୟା କରି ଗମ୍ଭୀର ପରିସ୍ଥିତି ସୃଷ୍ଟି କରିଛନ୍ତି । ସେଠାରେ ଥିବା ରାଜନୀତିଜ୍ଞ, ଅଧିକାରୀ ଓ କର୍ମଚାରୀଙ୍କ ପାଇଁ ଟ୍ରମ୍ପ ସମସ୍ୟା ସୃଷ୍ଟି କରିଛନ୍ତି । ଇରାନ ସହ ଯୁଦ୍ଧ କରିବାରୁ ଟ୍ରମ୍ପଙ୍କୁ ରୋକିବା ପାଇଁ ଗୁରୁବାର ସଂସଦରେ ମତଦାନ କରାଯିବ ।
