ଭୋପାଳ: ମଧ୍ୟପ୍ରଦେଶରେ ଉପନିର୍ବାଚନ ପାଇଁ ପ୍ରଚାର ଜୋରସୋର ଆରମ୍ଭ ହୋଇଥିବାବେଳେ ସୋସିଆଲ ମିଡିଆରେ ଏକ ଭିଡିଓ ଭାଇରାଲ ହେବାରେ ଲାଗିଛି । ଯେଉଁଥିରେ ପୂର୍ବତନ ମୁଖ୍ୟମନ୍ତ୍ରୀ ଦିଗବିଜୟ ସିଂ, କମଲନାଥଙ୍କୁ ସାପ ଓ ସାପୁଆ କେଳା ଭାବେ କାଟୁର୍ନ ସଜାଯାଇଥିବା ଦେଖିବାକୁ ମିଳିଛି । ଯାହାକୁ ନେଇ ବିଜେପି ଓ କଂଗ୍ରେସ ପରସ୍ପର ଉପରକୁ ଦୋଷ ଲଦାଲଦି ହେଉଛନ୍ତି ।
ଭାଇରାଲ ଭିଡିଓରେ କମଲନାଥ ସାପୁଆ କେଳା ହୋଇଥିବାବେଳେ ଦିଗବିଜୟ ସିଂହଙ୍କୁ ପେଡିରେ ଥିବା ସାପ ଭାବେ ଚିତ୍ରିତ କରାଯାଇଛି । କମଲାନାଥ ତାଙ୍କୁ ଖେଳାଉଥିବା ଦେଖିବାକୁ ମିଳିଛି । ଏହାସହ କଂଗ୍ରେସ ନେତା ଜିତୁ ପଟ୍ଟୱାରୀ କମଲନାଥଙ୍କ ସହଯୋଗୀ ଭାବେ ଛିଡା ହୋଇଥିବା ଭିଡିଓରେ ଦେଖାଯାଇଛି ।
ଏପରି ଭିଡିଓ ପାଇଁ କଂଗ୍ରେସ ପକ୍ଷରୁ ବିଜେପିକୁ ଦାୟୀ କରାଯିବା ସହ ହୀନ ମାନସିକତା ବୋଲି ଦର୍ଶାଯାଇଛି । ବିଜେପି ଉପନିର୍ବାଚନରେ ଜିତିବା ପାଇଁ ଏପରି କରିଛି ବୋଲି କଂଗ୍ରେସ ପକ୍ଷରୁ କୁହାଯାଇଛି। ଅନ୍ୟପଟେ ଭିଡିଓ ନେଇ ବିଜେପି ନେତା କଂଗ୍ରେସକୁ ଦାୟୀ କରିଛନ୍ତି । ଏହା ତାଙ୍କରି ଦଳର କୌଣସି କର୍ମୀ କରିଥାଇପାରନ୍ତି ବୋଲି ବିଜେପି ନେତା ଜମା ଖାନ କହିଛନ୍ତି ।
ସୂଚନାଥାଉକି, ମଧ୍ୟପ୍ରଦେଶରେ 28ଟି ବିଧାନସଭା ଆସନ ପାଇଁ ଉପନିର୍ବାଚନ ହେଉଛି । ନଭେମ୍ବର 3 ତାରିଖରେ ଏହି ଆସନରେ ଭୋଟ ଗ୍ରହଣ ହେବାକୁ ଥିବାବେଳେ ନଭେମ୍ବର 10 ତାରିଖରେ ଭୋଟ ଗଣତି ହେବ ।