ସିମଲା: ଉତ୍ତର ଭାରତୀୟ ପାହାଡି ରାଜ୍ୟ ହିମାଚଳ ପ୍ରଦେଶର ଅନେକ ସ୍ଥାନରେ ପ୍ରବଳ ତୁଷାରପାତ ଜାରି ରହିଛି। ଏଠାରେ ଅବସ୍ଥିତ ଥିବା ପ୍ରସିଦ୍ଧ ହିଲ ଷ୍ଟେସନ ମନାଲି ଏବଂ ଏହାର ଆଖପାଖ ଅଞ୍ଚଳରେ ବରଫପାତ ହୋଇଥିବା ଦେଖିବାକୁ ମିଳିଛି। ଗୁରୁବାର ରାତିରେ ବିଶ୍ବବିଖ୍ୟାତ ରୋହତାଙ୍ଗ ପାସ୍ରେ ପ୍ରବଳ ତୁଷାରପାତ ଯୋଗୁଁ, ପ୍ରଶାସନ ପକ୍ଷରୁ ସେହି ରାସ୍ତା ଦେଇ ଯାତାୟତ କରିବା ଉପରେ ପ୍ରତିବନ୍ଧକ ଲଗାଯାଇଥିଲା।
ହେଲେ ଲୋକେ ଏହି ଚେତାବନୀ ନମାନି ସେହି ମାର୍ଗ ଯାତାୟତ କରୁଥିବା ସମୟରେ ସେଠାରେ ଫସି ଯାଇଥିଲେ। ବରଫପାତ ଯୋଗୁଁ ଲୋକେ ଫସି ରହିଥିବା ଜାଣିବା ପରେ ବିଆରଓ(Border Roads Organisation) ଫୋର୍ସର ଯବାନଙ୍କ ଉଦ୍ଧାର ଅପରେସନ କରାଯାଇଥିଲା। ଉଦ୍ଧାର ହୋଇଥିବା ଲୋକଙ୍କ ମଧ୍ୟରେ 12 ପୁରୁଷ ଓ 2 ମହିଳା ଥିବା ଜଣାପଡିଛି।
ଏହା ଉପରେ ପ୍ରତିକ୍ରିୟା ରଖି ଏସଡିଏମ ମନାଲି ରମଣ ଘରସଙ୍ଗୀ କହିଛନ୍ତି, ରୋହତାଙ୍ଗ ପାସରେ ବରଫପାତ ଯୋଗୁଁ ଗାଡି ଫସି ରହିଥିବାର ଖବର ମିଳିବା ପରେ ବିଆରଓ ଫୋର୍ସ ଉଦ୍ଧାର କାର୍ଯ୍ୟ ଆରମ୍ଭ କରିଥିଲା। ସେଠାରେ ଫସି ରହିଥିବା ସମସ୍ତ ଲୋକଙ୍କୁ ଉଦ୍ଧାର କରାଯାଇଛି। ପାଣିପାଗ ବିଭାଗ ପକ୍ଷରୁ କ୍ରମାଗତ ଭାବେ ତୁଷାରପାତ ଲାଗି ରହିବା କାରଣରୁ 3ଦିନ ପାଇଁ ରାଜ୍ୟରେ ସତର୍କତା ଜାରି କରାଯାଇଛି।
ବ୍ୟୁରୋ ରିପୋର୍ଟ, ଇଟିଭି ଭାରତ
