ଡେରାଡୁନ: ଉତ୍ତରାଖଣ୍ଡ ବାସିନ୍ଦାଙ୍କ ପାଇଁ ଚାରିଧାମ ଯାତ୍ରା ଆରମ୍ଭ କରିବା ପରେ ବର୍ତ୍ତମାନ ଅନ୍ୟ ରାଜ୍ୟର ଲୋକଙ୍କୁ କୋରୋନାର ନେଗେଟିଭ ରିପୋର୍ଟ ସହିତ ଚାରିଧାମ ଯାତ୍ରା କରିବାକୁ ଅନୁମତି ଦିଆଯିବ। ଉତ୍ତରାଖଣ୍ଡ ଚାରିଧାମ ଦେବସ୍ତାନମ ପରିଚାଳନା ବୋର୍ଡର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ରବିନାଥ ରମଣ ଶୁକ୍ରବାର କହିଛନ୍ତି ଯେ, ଯାତ୍ରା ଉପରେ ଜାରି କରାଯାଇଥିବା ନୂତନ ଷ୍ଟାଣ୍ଡାର୍ଡ ଅପରେଟିଂ ପ୍ରଣାଳୀ (SOP) ଅନୁଯାୟୀ ରାଜ୍ୟ ବାହାରେ ଥିବା ଲୋକମାନେ ମଧ୍ୟ କିଛି ସର୍ତ୍ତ ସହିତ ଚାରିଧାମ ଯାତ୍ରା କରିପାରିବେ।
ଡେରାଡୁନରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସେ କହିଛନ୍ତି ଯେ, ଯଦି ବାହାର ରାଜ୍ୟରୁ ଆସୁଥିବା ଲୋକଙ୍କ ପାଖରେ 72 ଘଣ୍ଚା ପୂର୍ବର କୋରୋନା ନେଗେଟିଭ ରିପୋର୍ଟ ଥାଏ ଏବଂ ବୋର୍ଡ ଦ୍ବାରା ଜାରି କରାଯାଇଥିବା ଇ-ପାସ ଥାଏ, ତେବେ ସେମାନେ ଏହି ଚାରିଧାମ ପରିଦର୍ଶନ କରିପାରିବେ। ବହୁ ଦିନର ଆଲୋଚନା ପରେ ବୋର୍ଡ ରାଜ୍ୟରେ ରହୁଥିବା ଲୋକଙ୍କୁ ଜୁଲାଇ 1 ରୁ ଚାରି ଧାମ ଯଥା, ବଦ୍ରିନାଥ, କେଦାରନାଥ, ଗଙ୍ଗୋତ୍ରୀ ଏବଂ ଯମୁନେତ୍ରୀ ପରିଦର୍ଶନ କରିବାକୁ ଅନୁମତି ଦେଇଥିଲା।
ରମଣ କହିଛନ୍ତି ଯେ, ଏହା ହେଉଛି ରାଜ୍ୟ ସରକାରଙ୍କ ଉଦ୍ୟମ ଯେ, ଚାରି ଧାମରେ ତୀର୍ଥଯାତ୍ରୀଙ୍କ ଧୀରେ ଧୀରେ ଆଗମନ ହେବା ଉଚିତ । ଯାହା ଦ୍ବାରା ପର୍ଯ୍ୟଟନ ଏବଂ ତୀର୍ଥଯାତ୍ରା ଧୀରେ ଧୀରେ ବୃଦ୍ଧି ପାଇବ। ସେ ଏହା ମଧ୍ୟ କହିଛନ୍ତି ଯେ, ବର୍ତ୍ତମାନ ପର୍ଯ୍ୟନ୍ତ ଉତ୍ତରାଖଣ୍ଡର ଦଶ ହଜାରରୁ ଅଧିକ ତୀର୍ଥଯାତ୍ରୀ ଚାରିଧାମ ପରିଦର୍ଶନ କରିଛନ୍ତି ଏବଂ ଦେବସ୍ତାନମ ବୋର୍ଡ ଶୁକ୍ରବାର ପର୍ଯ୍ୟନ୍ତ 21 ହଜାର 178 ଟି ଇ-ପାସ ଜାରି କରିଛି।
ସମସ୍ତ ଧାମରେ ଭକ୍ତମାନଙ୍କୁ ଥର୍ମାଲ ସ୍କ୍ରିନିଂ ଏବଂ ସାନିଟାଇଜେସନ ପରେ ହିଁ ମନ୍ଦିରରେ ପ୍ରବେଶ କରିବାକୁ ଦିଆଯାଉଥିବାବେଳେ, ମାସ୍କ ପିନ୍ଧିବା ବାଧ୍ୟତାମୂଳକ ସହ ସାମାଜିକ ଦୂରତା ମଧ୍ୟ ପାଳନ କରାଯାଉଛି । ତୀର୍ଥଯାତ୍ରୀଙ୍କ ସୁବିଧା ପାଇଁ ଯାତ୍ରା ମାର୍ଗରେ ଦେବସ୍ଥାନମ ବୋର୍ଡର ଯାତ୍ରୀ ବିଶ୍ରାମ ଗୃହ ଖୋଲାଯାଇଛି। ଆଉ ଯଦି ଅତି ଆବଶ୍ୟକ ହେଉଛି କୌଣସି ଯାତ୍ରୀ ଧାମରେ ଅଟକି ରହିବେ ଏବଂ ମନ୍ଦିର ପରିଦର୍ଶନ କରିବା ପରେ ନିକଟସ୍ଥ ଷ୍ଟେସନକୁ ଫେରିବାକୁ ଚେଷ୍ଟା କରିବେ।
