ଲକ୍ଷ୍ନୌ: ବେପାରୀଙ୍କୁ ମାଡ ମାରି ନିଲମ୍ବିତ ହେଲେ ଦୁଇ ପୋଲିସ ଅଧିକାରୀ । ଉତ୍ତରପ୍ରଦେଶ ଆଗ୍ରା ଜିଲ୍ଲାରେ ପୋଲିସର ବର୍ବରତା ଚେହେରା ସାମ୍ନାକୁ ଆସିଛି । ଜଣେ ବେପାରୀ ଔଷଧ ନେଇ ଘରକୁ ଫେରୁଥିବା ବେଳେ ପୋଲିସ କର୍ମଚାରୀମାନେ ତାଙ୍କୁ ପ୍ରବଳ ମାଡ ମାରି ଲହୁଲୁହାଣ କରିଛନ୍ତି । ଯାହାକୁ ନେଇ ଦୁଇ ପୋଲିସ କର୍ମୀଙ୍କୁ ଚାକିରୀରୁ ହାତ ଧୋଇବାକୁ ପଡିଛି ।
ସୂଚନା ଅନୁଯାୟୀ, ଗୁରୁବାର ନ୍ୟୁ ଆଗ୍ରା କମଳା ନଗରରେ ଡି ବ୍ଲକରେ ଜଣେ ପ୍ରତିଷ୍ଠିତ ନ୍ୟୁରୋ ସର୍ଜନଙ୍କ ଭାଇ ତଥା ପ୍ରତିଷ୍ଠିତ ବେପାରୀ ରାକେଶ ଗୁପ୍ତା ପରିବାରର ଜଣେ ଅସୁସ୍ଥ ବ୍ୟକ୍ତିଙ୍କ ପାଇଁ ଔଷଧ ନେଇ ନିଜ ଘରକୁ ଫେରୁଥିଲେ । ସେହି ସମୟରେ ଦୁଇ ଜଣ ପୋଲିସ କର୍ମୀ ଆସି ତାଙ୍କୁ ରୋକି ଗାଳିଗୁଲଜ କରିବା ସହ ତାଙ୍କୁ ଲାଠିରେ ମାଡ ମାରିଥିଲେ ।
ଏହି ଦୃଶ୍ୟ ସିସିଟିଭିରେ କଏଦ ହୋଇଥିବା ବେଳେ ଏହି ଘଟଣାକୁ ନେଇ ସାଧାରଣ ଲୋକ ସେଠାରେ ପୋଲିସଙ୍କ ଏପରି କାଣ୍ଡକୁ ନେଇ କ୍ରୋଧିତ ହୋଇଥିଲେ । ଖବର ପାଇ ଘଟଣା ସ୍ଥଳରେ ଏସଏସପି ପହଞ୍ଚି ଲୋକଙ୍କୁ ବୁଝାସୁଝା କରିବା ସହ ଦୁଇ ପୋଲିସ କର୍ମୀଙ୍କୁ ନିଲମ୍ବିତ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
