ପୁନେ: ଆନ୍ନା ହଜାରେଙ୍କ ଅନଶନକୁ ନେଇ ସାରା ଦେଶରେ ଦେଖାଦେଇଛି ଚହଳ । ଅନଶନ ଯୋଗୁଁ ଶରୀର ଧିରେ ଧିରେ ଅବନ୍ନତି ହେଉଥିଲେ ମଧ୍ୟ ଆନ୍ନା ଏଥରୁ ଓହରୁନାହାନ୍ତି । ନିଜ ଜିଦରେ ସେ ଅଟଳ ଅଛନ୍ତି । ତେବେ ଆନ୍ନାଙ୍କ ସମର୍ଥନରେ ଆସି ସମାଜସେବୀ ତୃପ୍ତି ଦେଶାଇ ମୋଦି ସରକାରଙ୍କୁ ଧମକ ଦେଇଛନ୍ତି ।
ରିପୋର୍ଟ ଅନୁସାରେ ଆଜି ଆନ୍ନାଙ୍କ ଗାଁ ରାଲେଗାଁସିଦ୍ଧିରେ ଅନଶନ ସ୍ଥଳୀରେ ତାଙ୍କୁ ଭେଟିଥିଲେ ତୃପ୍ତି । ଏହି ଅବସରରେ ସେ ମୋଦି ସରକାରଙ୍କୁ ଫେବୃୟାରୀ 8 ପର୍ଯ୍ୟନ୍ତ ସମୟସୀମା ଦେଇଛନ୍ତି । ଏହା ଭିତରେ ଆନ୍ନାଙ୍କ ଦାବି ପୂରଣ ପାଇଁ ସେ ସରକାରଙ୍କୁ ଚେତାବନୀ ଦେଇଛନ୍ତି । ସମୟସୀମା ଭିତରେ ଦାବି ପୂରଣ ନହେଲେ ସେ ରାସ୍ତାକୁ ଓହ୍ଲାଇବେ ବୋଲି ଧମକ ଦେଇଛନ୍ତି । ସେ ତାଙ୍କ ଭୂମାତା ବ୍ରିଗେଡ କର୍ମୀଙ୍କ ସହ ଏହି ଆନ୍ଦୋଳନ କରିବେ ବୋଲି ସରକାରଙ୍କୁ ଚେତାବନୀ ଦେଇଛନ୍ତି ।
ସୂଚନାଯୋଗ୍ୟ ଜାନୁୟାରୀ 30ରୁ ୮୧ ବର୍ଷୀୟ ଆନ୍ନା ଏହି ଅନଶନରେ ବସିଛନ୍ତି । ଲୋକପାଳ ଓ ଲୋକାୟୁକ୍ତ ନିଯୁକ୍ତି ଦାବିରେ ସେ ଏହି ଅନଶନ କରୁଛନ୍ତି । ସେ କହିଛନ୍ତି ଯେ ୨୦୧୪ ମସିହାରେ ବିଜେପି ତାଙ୍କୁ ବ୍ୟବହାର କରିଥିଲା । ସମସ୍ତେ ଜାଣନ୍ତି ଲୋକପାଳ ପାଇଁ ତାଙ୍କ ଆନ୍ଦୋଳନ ବିଜେପି ଏବଂ ଆପକୁ କ୍ଷମତାକୁ ଆଣିଥିଲା । କିନ୍ତୁ କେନ୍ଦ୍ର ସରକାର ଏବେ ତାଙ୍କୁ ଭୁଲି ଯାଇଛନ୍ତି ।
ବିଜେପି ସରକାର ଦେଶକୁ ଭୁଲ ବାଟରେ ନେଇ ଯାଉଥିବାବେଳେ ମହାରାଷ୍ଟ୍ର ସରକାର ମଧ୍ୟ ଗତ ୪ ବର୍ଷ ଧରି କେବଳ ମିଛ କହୁଛନ୍ତି । ଏପରିକି ସରକାର ତାଙ୍କ ପ୍ରତିଶ୍ରୁତି ପୁରଣ ନକଲେ ସେ ପାଇଥିବା "ପଦ୍ମ ଭୂଷଣ" ସମ୍ମାନ ଫେରାଇ ଦେବେ ବୋଲି ଧମକ ଦେଇଛନ୍ତି । ଏହାସହ ତାଙ୍କର କିଛି ଘଟିଲେ ଏଥିପାଇଁ ମୋଦି ସରକାର ହିଁ ଦାୟୀ ରହିବେ ବୋଲି ସେ କହିଛନ୍ତି ।
