ଭୁବନେଶ୍ବର: ଆଜି(ବୁଧବାର) ‘ବିଶ୍ବ ପରିବେଶ ଦିବସ’। ପରିବେଶ ସୁରକ୍ଷା ପାଇଁ ଜନସଚେତନତା ସୃଷ୍ଟି କରିବା ଲକ୍ଷ୍ୟରେ ଏହି ଦିବସ ପାଳନ କରାଯାଏ । 1974 ମସିହା ପରଠାରୁ ଜାତିସଂଘର ଅନୁମୋଦନ ପରେ ପ୍ରତି ବର୍ଷ ଜୁନ 5 ତାରିଖକୁ ଏହି ଦିବସ ଭାବେ ପାଳନ କରାଯାଉଛି ।
ତେବେ ପ୍ରତିବର୍ଷ ବିଭିନ୍ନ ବାର୍ତ୍ତା ନେଇ ଏହି ଦିବସ ପାଳନ କରାଯାଉଥିବାବେଳେ ଚଳିତ ବର୍ଷର ବାର୍ତ୍ତା ରହିଛି ‘ବାୟୁ ପ୍ରଦୂଷଣ’। ଚଳିତ ବର୍ଷ ସୁଦ୍ଧା 143ଟି ରାଷ୍ଟ୍ରରେ ଏହି ଦିବସ ପାଳନ କରାଯାଉଛି । ରାଷ୍ଟ୍ରପତି ରାମନାଥ କୋବିନ୍ଦ ଟ୍ବିଟରରେ ସମାଜକୁ ବାର୍ତ୍ତା ଦେଇ ‘ବିଶ୍ବ ପରିବେଶ ଦିବସ ଉପଲକ୍ଷେ ଆସନ୍ତୁ ଆମ୍ଭେମାନେ ପୁଣିଥରେ ଗୋଟିଏ ସ୍ବଚ୍ଛ ଓ ସ୍ଥାୟୀ ଗ୍ରହ ନିର୍ମାଣ ନିମନ୍ତେ ସଂକଳ୍ପବଦ୍ଧ ହେବା । ପ୍ରକୃତି ସହ ଆଗକୁ ବଢିବା ଭାରତୀୟ ସଂସ୍କୃତିର ପରମ୍ପରା ଅଟେ । ଜଳବାୟୁ ପରିବର୍ତ୍ତନ କରି ଆଗାମୀ ପିଢୀକୁ ସବୁଜିମା ପରିବେଶ ଭେଟି ଦେବାକୁ ଭାରତ ବଚନବଦ୍ଧ’ ବୋଲି କହିଛନ୍ତି ।
1987 ମସିହାରୁ ଆବାହକ ରାଷ୍ଟ୍ର ମାଧ୍ୟମରେ ଏହି ଦିବସକୁ ଅଧିକ ଲୋକାଭିମୁଖୀ କରାଯାଉଛି । ତେବେ ଚଳିତ ବର୍ଷ ଆବାହକ ରାଷ୍ଟ୍ର ଚାଇନା ହୋଇଛି । ଦିନକୁ ଦିନ ବାୟୁ ପ୍ରଦୂଷଣର ମାତ୍ରା ବଢିବାରେ ଲାଗିଥିବାରୁ ଚଳିତ ବର୍ଷର ବାର୍ତ୍ତା ‘ବାୟୁ ପ୍ରଦୂଷଣ’ରହିଥିବା କୁହାଯାଉଛି । ସୂଚନା ଥାଉକି, ବାୟୁ ପ୍ରଦୂଷଣ ପାଇଁ ଭାରତରେ ପ୍ରତିବର୍ଷ ପ୍ରାୟ 12 ଲକ୍ଷଙ୍କର ଜୀବନ ହାନୀ ଘଟୁଥିବା ଏକ ରିପୋର୍ଟରୁ ଜଣାପଡିଛି ।
