ନୂଆଦିଲ୍ଲୀ: ଆସନ୍ତା 2020-21 ଶିକ୍ଷାବର୍ଷ ପାଇଁ ଜବାହାରଲାଲ ନେହେରୁ ବିଶ୍ବବିଦ୍ୟାଳୟରେ ମାର୍ଚ୍ଚ 2ରୁ ଆରମ୍ଭ ହେବ ଆଡମିଶନ ପ୍ରକ୍ରିୟା । ଏନେଇ ବିଶ୍ବବିଦ୍ୟାଳୟ ପକ୍ଷରୁ ସମୟ ସାରଣୀ ପ୍ରକାଶ ପାଇଛି । ସମୟ ସାରଣୀରେ ପ୍ରବେଶିକା ପରୀକ୍ଷା ପାଇଁ ସମୟ ସୂଚୀ ସମ୍ପର୍କରେ ସମସ୍ତ ସୂଚନା ଦିଆଯାଇଛି ।
ସୂଚନା ଅନୁଯାୟୀ ଆସନ୍ତା ମେ’ 11ରୁ ପ୍ରବେଶିକା ପରୀକ୍ଷା ଆରମ୍ଭ ହେବାକୁ ଥିବା ବେଳେ ଏହା ଆସନ୍ତା ମେ’ 24 ପର୍ଯ୍ୟନ୍ତ ଜାରି ରହିବ । ସେପଟେ ଏନେଇ ଇଚ୍ଛୁକ ବିଦ୍ୟାର୍ଥୀ ମାର୍ଚ୍ଚ 2ରୁ ମାର୍ଚ୍ଚ 3 ମଧ୍ୟରେ ଫର୍ମ ପୂରଣ କରିପାରିବେ । ତେବେ ଚଳିତ ବର୍ଷ ପ୍ରବେଶିକା ପରୀକ୍ଷା ସମ୍ପୂର୍ଣ୍ଣ ଭାବେ କମ୍ପ୍ୟୁଟର-ବେସ୍ଡ ଟେଷ୍ଟ ହେବା ନେଇ ସୂଚନା ରହିଛି ।
ପ୍ରବେଶିକା ପରୀକ୍ଷା ପାଇଁ ଏପ୍ରିଲ 21ରେ ଆଡମିଟ କାର୍ଡ ମିଳିବାକୁ ଥିବା ବେଳେ ପରୀକ୍ଷାର ଫଳାଫଳ ମେ’ 31ରେ ପ୍ରକାଶ ପାଇବ । ପ୍ରକାଶ ଯେ ଜେଏନୟୁ ପାଇଁ ନ୍ୟାସନାଲ ଟେଷ୍ଟିଂ ଏଜେନ୍ସି ଦ୍ବାରା ଏହି ପ୍ରବେଶିକା ପରୀକ୍ଷାର ଆୟୋଜନ କରାଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
