ତାମିଲନାଡୁ: ବର୍ତ୍ତମାନ ସମୟରେ ସବୁ ଜିନିଷର ଦରଦାମ ଆକାଶ ଛୁଆଁ । ଆଉ ଏମିତି ସ୍ଥିତିରେ ଏକ ଟଙ୍କାରେ ପେଟପୂରା ଖାଇବା କଥା ସ୍ବପ୍ନର ବିଷୟ । ଟଙ୍କାକରେ ଗୋଟିଏ ଚକ୍ଲେଟ ଛଡା ଆଉ କିଛି ବି ଆଶା କରିବା ବୃଥା । ଆପଣ ଜାଣି ଆଶ୍ଚର୍ଯ୍ୟ ହେବେ ଯେ ଏକ ଟଙ୍କାରେ ପେଟପୂରା ଇଡିଲି ସହ ସମ୍ବର ଓ ଚଟଣୀ ଖାଇବାକୁ ମିଳିଛି ।
ତାମିଲନାଡୁର ପେରୁ ନିକଟବର୍ତ୍ତୀ ଭଦିଭେଲାମପଲୟମ ଗାଁରେ ରହୁଥିବା 80 ବର୍ଷୀୟ ବୃଦ୍ଧା କେ କମଲାଥଲ । ମାତ୍ର ଟଙ୍କାକରେ ସେ ଇଡଲି ସହ ସମ୍ବର ଓ ଚଟଣୀ ବିକ୍ରି କରୁଛନ୍ତି । ଖାଲି ସେତିକି ନୁହେଁ ନିଜ ବୟସର ଅନ୍ୟ ବୃଦ୍ଧାଙ୍କ ଠାରୁ ସେ ଯଥେଷ୍ଟ ସୁସ୍ଥ ଓ ସବଳ । ବୃଦ୍ଧା କମଲାଥଲଙ୍କ ଏହି କାମ ସମସ୍ତଙ୍କୁ ବେଶ ଆକୃଷ୍ଟ କରିଛି।
ଏପରିକି ମହିନ୍ଦ୍ରା ଗ୍ରୁପର ଅଧ୍ୟକ୍ଷ ଆନନ୍ଦ ମହିନ୍ଦ୍ରା ଉକ୍ତ ବୃଦ୍ଧାଙ୍କ ଏକ ଭିଡିଓକୁ ଟ୍ବିଟ କରି କ୍ୟାପସନ ମଧ୍ୟ ଲେଖଛନ୍ତି । ଉକ୍ତ ଭିଡିଓରେ କମଲାଥଲ ମାତ୍ର ଗୋଟିଏ କାଠରେ ଜଳୁଥିବା ଚୁଲିର ବ୍ୟବହାର କରୁଛନ୍ତି । ଆନନ୍ଦ ମହିନ୍ଦ୍ରା ପୋଷ୍ଟରେ ମଧ୍ୟ ଲେଖିଛନ୍ତି ଯେ, ଯଦି କେହି ସେହି ବୃଦ୍ଧାଙ୍କୁ ଜାଣିଛନ୍ତି ତାହେଲେ ମୁଁ ତାଙ୍କୁ ଗୋଟିଏ ଇନ୍ଧନ ଗ୍ୟାସ ଚୁଲି ସହ ତାଙ୍କ ବ୍ୟବସାୟରେ ଟଙ୍କା ନିବେଶ କରିବାକୁ ଚାହୁଁଛି।
ଅପରପକ୍ଷେ ଏସମ୍ପର୍କରେ କମଲାଥଲଙ୍କୁ ପଚାରିଲେ ସେ କୁହନ୍ତି, ପ୍ରତ୍ୟେକ ଦିନ ଦୋକାନକୁ ଆସୁଥିବା ଲୋକେ ଯେମିତି ପେଟପୂରା ଇଡିଲି ଖାଇପାରିବେ ତାହା ମୋର ଲକ୍ଷ୍ୟ । ଯେଉଁକାରଣରୁ ସେ ଇଡଲିର ଦାମ ଏକ ଟଙ୍କା ରଖିଛନ୍ତି । ଯହା ଦ୍ବାରା ଏଠାକୁ ଆସୁଥିବା ପ୍ରତ୍ୟେକ ଲୋକ କିଛି ପଇସା ବଞ୍ଚେଇବା ସହ ନିଜ ପେଟ ମଧ୍ୟ ଭରିପାରିବେ ।
ପୂର୍ବରୁ ଏହାର ଦାମ 50 ପଇସା ଥିଲା, ମାତ୍ର ଜିନିଷର ଦରଦାମ ବଢିବାରୁ ମୋତେ ଏହାର ଦାମ ଏକ ଟଙ୍କା କରିବାକୁ ପଡିଲା । ପ୍ରତିଦିନ ପାଖାପାଖି ସେ ଏକ ହଜାର ଇଡଲି ବିକ୍ରି କରନ୍ତି । ଯେଉଁଥିରୁ 200 ଟଙ୍କା ରୋଜଗାର ହୋଇଥାଏ । ଆଗାମୀ ଦିନରେ ସେ ଏହାର ଦାମ ବଢାଇବେ ନାହିଁ ବୋଲି କହିଛନ୍ତି।
