କାବୁଲ:ତାଲିବାନ ଓ ଆଫଗାନିସ୍ତାନ ସରକାରଙ୍କ ମଧ୍ୟରେ ବିବାଦ ବଢିବାରେ ଲାଗିଛି । ତେବେ ମଙ୍ଗଳବାର ରାତିରେ ଦକ୍ଷିଣ ଆଫଗାନିସ୍ତାନରେ, ତାଲିବାନ ପୁଣି ସୁରକ୍ଷା ପୋଷ୍ଟ ଉପରେ ଆକ୍ରମଣ କରିଥିଲା ଯେଉଁଥିରେ ସମୁଦାୟ 28 ଜଣ ପୋଲିସକର୍ମୀଙ୍କ ପ୍ରାଣ ହରାଇଥିବା ବୁଧବାର ଜଣେ ଅଧିକାରୀ ସୂଚନା ଦେଇଛନ୍ତି । ତେବେ ତାଲିବାନ ନେତା ଏବଂ ଆଫଗାନିସ୍ତାନ ସରକାରଙ୍କ ଦ୍ବାରା ନିଯୁକ୍ତ ବୁଝାମଣାକାରୀ, କତାରରେ ଐତିହାସିକ ଶାନ୍ତି ଆଲୋଚନା କରୁଥିବା ବେଳେ ଏହି ହିଂସା ଘଟିଛି।
ପ୍ରାଦେଶିକ ରାଜ୍ୟପାଳଙ୍କ ମୁଖପାତ୍ର ଜେଡ୍ ଇବାଦିଙ୍କ ଅନୁଯାୟୀ, ମଙ୍ଗଳବାର ବିଳମ୍ବିତ ରାତିରେ ଦକ୍ଷିଣ ଉରୁଜଗନ ପ୍ରଦେଶରେ ଏହି ଆକ୍ରମଣ ଆରମ୍ଭ ହୋଇଥିଲା। ତେବେ ସେହି ଅଞ୍ଚଳର ପୋଲିସ ସେମାନଙ୍କ ନିକଟରେ ଆତ୍ମ ସମର୍ଫମ କରିବାକୁ ମନା କରିବାରୁ ତାଲିବାନ ଆକ୍ରମଣ କରିଥିଲେ ବୋଲି ତାଲିବାନର ମୁଖପାତ୍ର କାରୀ ମହମ୍ମଦ ୟୁସୁଫ ଅହମ୍ମଦୀ କହିଛନ୍ତି । ହେଲେ ଇବାଦିଙ୍କ କହିବା ମୁତାବକ, ପୋଲିସକର୍ମୀ ଆତ୍ମ ସମର୍ପଣ କରିବା ପରେ ହିଁ ତାଙ୍କୁ ମାରି ଦିଆଯାଇଥିଲା ।
