ମୁମ୍ବାଇ: ମହାରାଷ୍ଟ୍ର ମହାଟ୍ବିଷ୍ଟ ପରେ ଏବେ ରାଜ୍ୟରେ ଚାଲିଛି ରାଜନୈତିକ ହଟଚମଟ । ଦେବେନ୍ଦ୍ର ଫଡନାଭିସ ମୁଖ୍ୟମନ୍ତ୍ରୀ ପଦ ପାଇଁ ଶପଥ ଗ୍ରହଣ ପରେ ଏବେ ଫ୍ଲୋରଟେଷ୍ଟ ନାଟକ ବି ଜାରି ରହିଛି । ସେପଟେ ମାମଲା ଯାଇ ସୁପ୍ରିମକୋର୍ଟରେ ପହଞ୍ଚିଲାଣି । ତେବେ ଚିତ୍ର ପୁରା ସ୍ପଷ୍ଟ ନହୋଇଥିଲେ ବି କଂଗ୍ରେସ-ଏନସିପି-ଶିବସେନା ସରକାର ଗଢିବା ନେଇ ଆପ୍ରାଣେ ଉଦ୍ୟମ ଚଳାଇଛନ୍ତି ।
ଭିଡିଓ ସୌଜନ୍ୟ- ଇଟିଭି ଭାରତ
ନିର୍ବାଚନ ଫଳାଫଳ ଆସିବାର ଦୀର୍ଘ ଦିନ ପରେ ବି ମେଣ୍ଟ ସରକାର ଗଢିବା ସମ୍ଭବ ହୋଇନଥିଲା । ମୁଖ୍ୟମନ୍ତ୍ରୀ ପଦ ନେଇ ଚୌକି ଟଣାଓଟରା ଭିତରେ ସମର୍ଥକ ମାନେ ବି ଚାତକ ପରି ଚାହିଁ ବସିଥିଲେ ନିଜ ସମର୍ଥିତ ଦଳକୁ ଗାଦିରେ ଦେଖିବାକୁ ।
ତେବେ ଶିବସେନା ସରକାର ଗଢିନଥିବାରୁ ଜଣେ ସମର୍ଥକ 45 ବର୍ଷୀୟ ରମେଶ ବାଲୁ ଆତ୍ମହତ୍ୟା ଉଦ୍ୟମ କରିଛନ୍ତି । ବ୍ୟକ୍ତି ଜଣଙ୍କ କେମିତି ଆତ୍ମହତ୍ୟା ଉଦ୍ୟମ କରିଛନ୍ତି ତାହା ଜଣାନପଡିଥିଲେ ବି ଘଟଣା ଟି ମହାରାଷ୍ଟ୍ରର ୟବାତମାଲ ଅଞ୍ଚଳର ବୋଲି ଜଣାପଡିଛି ।
