କୋଲକାତା: ବଢିବାରେ ଲାଗିଛି ଟିକଟକର ଦୁର୍ବ୍ୟବହାର । ବିଶେଷ କରି ଅଧିକାଂଶ ଛାତ୍ରଛାତ୍ରୀମାନେ ଏହି ଭିଡିଓ କରୁଥିବା ଦେଖିବାକୁ ମିଳୁଛି । ହେଲେ ନିକଟରେ ସମସ୍ତ ସୀମା ପାର କରିଛନ୍ତି ପଶ୍ଚିମବଙ୍ଗ, ମାଲଦା ଜିଲ୍ଲା ରାଜନଗର ବିଦ୍ୟାଳୟର ଜଣେ ଛାତ୍ରୀ । ଛାତ୍ରୀ ଜଣଙ୍କ ପରୀକ୍ଷା ଆରମ୍ଭ ହେବାର କିଛି ସମୟରେ ଇଂରାଜୀ ପ୍ରଶ୍ନପତ୍ରର ଫଟୋ କ୍ଲିକ କରି ଏକ ଟିକଟକ ଭିଡିଓ ପ୍ରସ୍ତୁତ କରିଥିଲେ ଏବଂ ଏହାକୁ ସୋସିଆଲ ମିଡିଆରେ ସେୟାର ମଧ୍ୟ କରିଥିଲେ । ଯାହା ଏବେ ଭାଇରାଲ ହେବାରେ ଲାଗିଛି ।
ସୂଚନା ମୁତାବକ ପରୀକ୍ଷା ସମୟରେ ସମସ୍ତ ସ୍କୁଲ ଓ କଲେଜରେ ପରୀକ୍ଷା ହଲ ଭିତରକୁ ମୋବାଇଲ ଫୋନ ବ୍ୟାନ ହୋଇଥିବା ବେଳେ ପଶ୍ଚିମବଙ୍ଗର ଏହି ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି । କେଉଁ ପରିସ୍ଥିତିରେ ଛାତ୍ରୀ ଜଣଙ୍କ ହଲ ଭିତରକୁ ଫୋନ ନେଇଥିଲେ ଓ ଏହାର ବ୍ୟବହାର କରିଥିଲେ ତାହା ଜଣା ପଡିପାରିନାହିଁ । ତେବେ ଘଟଣାଟି ପ୍ରଘଟ ହେବା ପରେ ଛାତ୍ରୀ ଜଣଙ୍କୁ ଗୁରୁବାର ଜିଲ୍ଲା ଜୁଭେନାଇଲ କୋର୍ଟରେ ହାଜର କରାଯାଇଛି ।
ତେବେ ଅନ୍ୟ ଏକ ଆଶ୍ଚର୍ଯ କଥା ହେଉଛି କି ଭାଇରାଲ ଭିଡିଓରେ ଦେଖାଯାଇଥିବା ପ୍ରଶ୍ନପତ୍ରରେ ବୋର୍ଡର କୌଣସି ଲୋଗୋ ରହିନଥିଲା । ସେପଟେ ଏନେଇ ଡବ୍ଲୁବିବିଏସଇ ଅଧ୍ୟକ୍ଷ କଲ୍ୟାଣମୋୟ ଗାଙ୍ଗୁଲି କହିଛନ୍ତି କି ସେ ଗଣଶିକ୍ଷା ମନ୍ତ୍ରୀ ପାର୍ଥ ଚାଟାର୍ଜୀଙ୍କୁ ଖୁବଶୀଘ୍ର ଭେଟି ଘଟଣା ସମ୍ପର୍କରେ ଆଲୋଚନା କରିବେ ବୋଲି କହିଛନ୍ତି । ତେବେ ଭିଡିଓରେ ଦେଖାଯାଇଥିବା ପ୍ରଶ୍ନପତ୍ର ପ୍ରକୃତ ପ୍ରଶ୍ନପତ୍ର କି ମିଛ ସେନେଇ ମଧ୍ୟ ତଦନ୍ତ ହେବ ବୋଲି ସେ କହିଛନ୍ତି ।
ସମ୍ପୃକ୍ତ ଘଟଣାରେ ସମ୍ପୃକ୍ତ ପରୀକ୍ଷା ଇନଚାର୍ଜ ଓ ସିକ୍ୟୁରିଟିକୁ ନେଇ ଏବେ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି । ସେପଟେ ମଙ୍ଗଳବାର ଘଟିଥିବା ଏହି ଘଟଣାକୁ ନେଇ ଉଚ୍ଚସ୍ତରୀୟ ତଦନ୍ତ ଆରମ୍ଭ ହୋଇଛି ବୋଲି ସୂଚନା ଦେଇଛନ୍ତି ଏସପି ଆଲୋକ ରଜୌରିଆ ।
ବ୍ୟୁରୋ ରିପୋର୍ଟ, ଇଟିଭି ଭାରତ
