ନୂଆଦିଲ୍ଲୀ: ସଂସଦରେ ଏସପିଜି (ସଂଶୋଧନ) ବିଧେୟକ, 2019 ପାରିତ । ପୂର୍ବରୁ ଏହି ବିଧେୟକ ଲୋକସଭାରେ ପାରିତ ହୋଇଥିବାବେଳେ ମଙ୍ଗଳବାର ଏହା ରାଜ୍ୟସଭାରେ ପାରିତ ହୋଇଛି । ଧ୍ବନିମତରେ ପାରିତ ହୋଇଛି ବିଧେୟକ । ତେବେ ବିଧେୟକ ପାରିତ ସମୟରେ କଂଗ୍ରେସ ସାଂସଦ ଗୃହତ୍ୟାଗ କରିଥିଲେ।
ରାଜ୍ୟସଭାରେ ଗୃହମନ୍ତ୍ରୀ ଅମିତ ଶାହଙ୍କର ବିବୃତି ପରେ ଏହି ବିଧେୟକ ଧ୍ବନିମତରେ ପାରିତ ହୋଇଛି । ଏହି ବିଧେୟକକୁ ବିଜେଡି ସମର୍ଥନ କରିଛି । ବିଜେଡି ସାଂସଦ ପ୍ରସନ୍ନ ଆଚାର୍ଯ୍ୟ ଏହାକୁ ସମର୍ଥନ କରିବା ସହ ବିଜେଡି ଏହି ବିଧେୟକକୁ ସମର୍ଥନ କରୁଛି ବୋଲି କହିଥିଲେ ।
ସଂଶୋଧନ ବିଧେୟକ ଅନୁସାରେ, ଏସପିଜି ସୁରକ୍ଷା କେବଳ ପ୍ରଧାନମନ୍ତ୍ରୀ ଓ ତାଙ୍କ ପରିବାରକୁ ଯୋଗାଇ ଦିଆଯିବ । ଏହାସହ ପୂର୍ବତନ ପ୍ରଧାନମନ୍ତ୍ରୀ ଓ ତାଙ୍କ ପରିବାରକୁ ସରକାରୀ ଘରେ ରହିଲେ ସର୍ବାଧିକ 5 ବର୍ଷ ପାଇଁ ଏହି ସୁରକ୍ଷା ଯୋଗାଇ ଦିଆଯିବ ବୋଲି ବିଧେୟକରେ ଉଲ୍ଲେଖ ରହିଛି। କିଛି ଦିନ ପୂର୍ବେ କଂଗ୍ରେସ ଅଧ୍ୟକ୍ଷ ସୋନିଆ ଗାନ୍ଧୀ, ପୁଅ ରାହୁଲ ଗାନ୍ଧୀ ଓ ଝିଅ ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ନିକଟରୁ ଏସପିଜି ଉଠାଯିବା ପରେ ସାରା ଦେଶରେ ଏନେଇ ଚର୍ଚ୍ଚା ଜୋର ଧରିଛି।
