ନୂଆଦିଲ୍ଲୀ: କଂଗ୍ରେସରେ ନେତୃତ୍ବ ସଙ୍କଟ ମଧ୍ୟରେ ଦଳ 2 ଭାଗ ହେବା ପରି ସ୍ଥିତିରେ ଥିବା ବେଳେ ଅନ୍ତରୀଣ ଅଧ୍ୟକ୍ଷ ସୋନିଆ ଗାନ୍ଧୀଙ୍କୁ ସମର୍ଥନ କରିଛନ୍ତି ବରିଷ୍ଠ ନେତା ସଲମାନ ଖୁର୍ସିଦ । କଂଗ୍ରେସର ବରିଷ୍ଠ ନେତା ସଲମାନ ଖୁରସିଦ କହିଛନ୍ତି ଯେ ସୋନିଆ ଗାନ୍ଧୀ ଏହି ପଦବୀରେ ଥିବାରୁ କଂଗ୍ରେସ ପାଇଁ କୌଣସି ନିର୍ବାଚିତ ଅଧ୍ୟକ୍ଷଙ୍କ ଆବଶ୍ୟକତା ନାହିଁ। ତେଣୁ ତାଙ୍କୁ ନେତୃତ୍ବ ପ୍ରସଙ୍ଗରେ ନିଷ୍ପତ୍ତି ନେବାକୁ ମଧ୍ୟ କ୍ଷମତା ଦିଆଯାଇଛି ।
ସଲମାନ ଖୁର୍ସିଦ ପୂର୍ବତନ କେନ୍ଦ୍ର ମନ୍ତ୍ରୀ ଏବଂ ଗାନ୍ଧୀ ପରିବାରର ଜଣେ ଘନିଷ୍ଠ ନେତା ଭାବରେ ପରିଗଣିତ । ଖୁର୍ସିଦ ଏକ ସାକ୍ଷାତକାରରେ କହିଛନ୍ତି ଯେ ଯଦି ବିଦ୍ରୋହୀ ନେତା ତାଙ୍କ ସହ ଯୋଗାଯୋଗ କରିଥାନ୍ତେ, ତାହେଲେ ମଧ୍ୟ ସେ ଚିଠିରେ ଦସ୍ତଖତ କରିନଥାନ୍ତେ । ସୋନିଆ ଗାନ୍ଧୀଙ୍କଠାରୁ ଏହି ସଂଗଠନରେ ବ୍ୟାପକ ପରିବର୍ତ୍ତନ ପାଇଁ ଦାବି କରାଯାଇଛି। ଚିଠିରେ ପୂର୍ଣ୍ଣକାଳୀନ ନେତୃତ୍ବ ପାଇଁ ଏକ ଦାବି ମଧ୍ୟ ଉଠାଯାଇଥିଲା।
ଗୁଲାମ ନବୀ ଆଜାଦଙ୍କ ପ୍ରଶ୍ନ ଉପରେ ଖୁର୍ସିଦ କହିଛନ୍ତି ଯେ ସେ ବର୍ଷ ବର୍ଷ ଧରି କଂଗ୍ରେସର ବରିଷ୍ଠ ନେତାଙ୍କ ମଧ୍ୟରେ ଅଛନ୍ତି। ଏହା ପରେ ମଧ୍ୟ ଅଧ୍ୟକ୍ଷ ପଦ ପାଇଁ କୌଣସି ନିର୍ବାଚନ ଅନୁଷ୍ଠିତ ହୋଇନଥିଲା ଏବଂ ଏହା ସତ୍ତ୍ବେ ଦଳ ଆଗକୁ ବଢି ଚାଲିଥିଲା | ଏହି ଚିଠିରେ ଦସ୍ତଖତ କରିଥିବା 23 ନେତାଙ୍କ ମଧ୍ୟରେ ଗୁଲାମ ନବୀ ଆଜାଦଙ୍କ ନାମ ରହିଛି। ଏହି ନେତାମାନେ ସଂଗଠନରେ ପରିବର୍ତ୍ତନ ଆଣିବାକୁ ଦାବି କରିଛନ୍ତି, ଯାହା ଦ୍ବାରା ଆଗାମୀ ଦିନରେ କଂଗ୍ରେସ କ୍ଷମତା ବାହାରେ ରହିବ ନାହିଁ। ଖୁର୍ସିଦ କହିଛନ୍ତି ଯେ ଆଜି ଆଜାଦ ଯେଉଁ ପରିବର୍ତ୍ତନ ଚାହୁଁଛନ୍ତି, ସେ ଦଳରେ ଦୀର୍ଘ ବର୍ଷ ଧରି ଜାରି ରଖିଛନ୍ତି। ଖୁର୍ସିଦଙ୍କ ଅନୁଯାୟୀ କଂଗ୍ରେସ ନେତୃତ୍ବ ଆଜାଦଙ୍କ ଭଳି ଜଣେ ବରିଷ୍ଠ ନେତାଙ୍କ କଥାକୁ ଗୁରୁତ୍ବ ଦେବ ।
