ନୂଆଦିଲ୍ଲୀ: କୋରୋନା ବିରୋଧରେ ଲଢେଇରେ ଭାରତ ନିଜ ଉଦାରପଣିଆ ଓ ମହାନତାର ପରିଚୟ ଦେଇଛି । ସମଗ୍ର ବିଶ୍ବ ଭାରତର ପଦକ୍ଷେପକୁ ପ୍ରଶଂସା କରିବା ସହ ଏହି ଲଢେଇରେ ନେତୃତ୍ବ ନେଇଛି ଭାରତ । ନିଜ ଦେଶ ସହ ପଡୋଶୀ ଦେଶକୁ ମଧ୍ୟ ସହଯୋଗର ହାତ ବଢାଇଛି ଭାରତ । ଉତ୍ତମ ବନ୍ଧୁତ୍ବର ସମ୍ପର୍କ ବଜାୟ ରଖି ପଡୋଶୀ ଦେଶଙ୍କୁ ପଠାଉଛି ସାହାଯ୍ୟ ।
ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ଦିଆଯାଇଥିବା ସୂଚନାନୁସାରେ ଭାରତୀୟ ନୌସେନା ଓ ବାୟୁସେନା ପଡୋଶୀ ଦେଶକୁ ସାହାଯ୍ୟ ଲାଗି ପ୍ରସ୍ତୁତ ଅଛନ୍ତି । ବର୍ତ୍ତମାନ ସୁଦ୍ଧା ନୌସେନାର 6ଟି ଜାହାଜ ଷ୍ଟାଣ୍ଡବାଏରେ ଅଛି । ଆବଶ୍ୟକ ପଡିଲେ ପଡୋଶୀ ଦେଶକୁ କୋରୋନା ଲଢେଇରେ ଏହା ସାହାଯ୍ୟ କରିବ ।
ସେହିପରି 5ଟି ମେଡିକାଲ ଟିମ ପଡୋଶୀ ଦେଶରେ ମୁତୟନ ପାଇଁ ପ୍ରସ୍ତୁତ ହୋଇ ରହିଛନ୍ତି । ଏବେ ଏମାନଙ୍କୁ ମଧ୍ୟ ଷ୍ଟାଣ୍ଡବାଏରେ ରଖାଯାଇଛି । ମେଡିକାଲ ସହାୟତା ପାଇଁ ମିଆଁମାର, ଶ୍ରୀଲଙ୍କା, ବାଂଲାଦେଶ, ନେପାଳ, ଭୁଟାନ ଓ ଆଫଗାନିସ୍ତାନ ଅନୁରୋଧ କରିଥିବା ପ୍ରତିରକ୍ଷା ମନ୍ତ୍ରାଳୟ ସୂଚନା ଦେଇଛି । ପୂର୍ବରୁ ଔଷଧ ସାମଗ୍ରୀ ପହଞ୍ଚାଇଥିବାରୁ ଭାରତୀୟ ବାୟୁସେନାକୁ ଧନ୍ୟବାଦ ଦେଇଥିଲେ ମାଳଦ୍ବୀପ ପ୍ରତିରକ୍ଷା ମନ୍ତ୍ରୀ ।
ସୌଜନ୍ୟ@ANI
